Naisangsangayan unay iti pakasaritaantayo kas Saksi ni Jehova ti Pananglaglagiptayo iti ipapatay ni Jesus ita a tawen. Iti umuna a gundaway, naibrodkas iti telebision ken radio ti programa ti Memorial iti nagduduma a lengguahe iti adu a lugar iti Africa.

Kas resultana, nasurok nga 407,000 nga agibumbunannag ti nakabuya iti programa ti Memorial, malaksid kadagiti saan a naibilang a kaadu dagiti interesado a nakabuya. Nupay saan a masigurado ti eksakto a bilang dagiti nagbuya iti programa, naibrodkas dayta iti lugar a nasurok a 150 a milion ti populasionna.

Gapu iti COVID-19 pandemic, binuya ti kaaduan a tattao iti nagduduma a paset ti lubong ti palawag iti Memorial babaen ti videoconference. Ngem adu a kakabsat iti Africa ti agnanaed kadagiti lugar a nakanginngina ti bayad ti Internet ken serbisio ti selpon, isu a saanda a makabuya iti streaming wenno maka-download kadagiti video. Gapuna, inaprobaran ti Bagi a Manarawidwid ti dadduma a sangay a makisarita kadagiti lokal ken nasional nga estasion ti telebision ken radio a mabalin a mangibrodkas iti programa ti Memorial iti nababa laeng a gatad.

Sakbay ti Memorial, 11 a sangay—Angola, Benin, Cameroon, Côte d’Ivoire, Democratic Republic of the Congo, Ghana, Malawi, Mozambique, Senegal, Zambia, ken Zimbabwe—ti nakitungtong kadagiti estasion ti telebision ken radio ken inyurnosda ti pannakaibrodkas ti palawag iti Memorial iti 36 a lokasion a sakupen ti 16 a nasion.

Angola

Innem nga estasion ti radio ti immanamong a mangibrodkas iti programa ti Memorial iti innem a lengguahe: Ibinda, Kikongo, Kimbundu, Nyaneka, Portuguese, ken Umbundu. Nagibrodkas dagiti estasion ti radio kadagiti paset ti pagilian nga adu ti populasionna.

Democratic Republic of the Congo

Implano ti maysa a mayad-adalan iti Biblia a buyaenna a bukbukodna ti programa ti Memorial gapu ta bumusbusor ti pamiliana kadagiti Saksi ni Jehova. Ngem idi agsagsagana nga agbuya iti palawag iti Memorial, inayaban ni tatangna iti salasda. Imbaga ni tatangna: “Umaykan, nangrugin!” Napan iti salas ket nakitana nga adda sadiay ti amin a kapamiliana tapno buyaenda ti programa ti Memorial. Sangapuloda amin nga agkakapamilia a nagbuya iti Memorial.

Iti barrio nga asideg iti Luena, maysa a saan a Saksi ti nagkuna: “Awan ti inaramid dagiti pastormi. Ngem dakayo, intultuloyyo latta ti agdaydayaw iti Diosyo uray adda COVID-19 pandemic. Makiramankami kadakayo!”

Ghana

Maysa a nasional nga estasion ti telebision ti immanamong a mangibrodkas iti programa ti Memorial iti lengguahe a Twi. Impatalastas pay dayta nga estasion ti panangawis kadagiti tattao a buyaenda ti Memorial. Kasta met, impabuya pay ti estasion dagiti video nga Apay a Natay ni Jesus? ken Apay nga Ipalpalubos ti Dios ti Panagsagaba? ken dagiti music video nga Idiay Paraiso ken Dayta ket Asidegen.

Senegal

Kuna ti maysa a sister: “Naammuan dagiti tattao iti TV ken radio ti maipapan ken Jehova. Agasem dayta! Mariknami a nabendisionankami ken nakaragragsakkami! Pagpannakkelmi a ni Jehova ti Diosmi!”

Kuna pay ti sabali a sister: “Idi naammuak a maipabuya iti telebision ti palawag iti Memorial, imbagak iti naknakemko, ‘Uray no saankami a nakapagawis gapu iti COVID-19, adunto latta ti makabuya iti Memorial gapu ta maipabuya dayta iti TV.’ Kinontakko a dagus dagiti iyad-adalak iti Biblia, dagiti sarsarungkarak, ken amin a saan a Saksi nga am-ammok tapno ipadamagko ti maibrodkas a programa. Siam kadagiti iyad-adalak ken ti pamiliada ti nakabuya iti palawag. Maysa a kasinsinko a nakabuya idiay Ziguinchor ti nangibaga no mabalinminto a pagsaritaan ti ad-adu pay maipapan iti naipalawag, ket siraragsak a nagwenak.”

Daytoy nga espesial nga urnos ket sabali pay nga ebidensia nga “awan ti imposible” ken Jehova.—Mateo 19:26.