Gapu iti COVID-19, saan a nalaka para kadagiti kakabsat nga adda kadagiti ospital wenno nursing home ti mangselebrar iti Memorial. Kaaduanna a saanda a mapalubosan a rummuar iti pasilidad ken saan a mapalubosan a sumrek dagiti bisita. Ngem gapu iti tulong dagiti panglakayen iti kongregasion, naselebraran met laeng dagitoy a kakabsat ti kapatgan nga okasion iti daytoy a tawen.

Iti Naju City, da Sister Lee Jeom-soon ken Sister Kwon Ae-soon, nga agtawen iti 91 ken 88, agraman ti maysa a baket nga interesado nga agtawen iti 96, ket determinado a mangselebrar iti Memorial. Saksi ni Jehova ti maysa a doktor iti nursing home nga ayanda. Naselebraran daytoy a doktor ti Memorial idiay balayda a kaduana ti kongregasionna. Kalpasanna, nagsubli iti nursing home. Tinulonganna dagitoy dua a babbaket a kakabsat ken ti interesado a baket tapno mabuyada ti nairekord a programa ti Memorial manipud iti jw.org. Nangitugot met daytoy a brother kadagiti emblema.

Iti Uijeongbu City, agtrabtrabaho ni Brother Choi Jae-cheol iti maysa a nursing home nga ayan ti 14 a natataenganen a kakabsat. Uray no adda pandemic, tinulongan daytoy a brother dagiti kakabsat sadiay, a pakairamanan ti dadduma pay nga interesado, tapno maselebraranda ti Memorial babaen ti panangbuyada iti video streaming. Narugian a mayadalan iti Biblia ti dadduma kadagiti immatender.

Ni Sister Kim Tae-sun ket agtawen iti 59 ken agnanaed iti Cheonan. Lima a tawen sakbayna, nadayagnos nga adda kanserna. Nabiit pay a nayospital gapu iti nakaro nga ut-ot a marikriknana. Kakuarto ni Tae-sun iti ospital ti maysa a sister a ni Kim Jeong-mi nga agtawen iti 69 ken adda met kanserna. Saanda a makaruar iti ospital gapu iti pandemic. Ngem tinulongan ida dagiti panglakayenda isu a naselebraranda ti Memorial ken nakaduada dagiti kakongregasionda babaen ti videoconference.

Inyebkas dagitoy dua a sister ti naimpusuan a panagyamanda kadagiti panglakayen babaen ti surat. Kinunada: “Agyamankami iti panangtulongyo kadakami tapno maatenderanmi ti Memorial ken matagiragsakmi ti makikadua kadagiti kapammatiantayo uray iti tiempo ti COVID-19 ken adda nakaro a sakitmi.”

Ni Sister Mieko Fujiwara, nga agtawen iti 70 ken agnanaed iti Mie Prefecture, Japan, ket nayospital. Gapu ta awan ti Wi-Fi Internet ti ospital, saan a makakonektar iti Memorial ti kongregasionda babaen ti videoconference. Ngem sakbay dayta, nangi-send ti maysa a panglakayen ken ti baketna iti nairekord a palawag ti Memorial iti selponna, isu a naselebraranna met laeng dayta nga okasion iti kuartona iti ospital.

Iti Zama City, Kanagawa Prefecture, aggigian iti nursing home ti sister a ni Yuki Takeuchi nga agtawen iti 102. Sakbay ti Memorial, isu ket pinatulodan ti anak ken manugangna iti tinapay ken arak a naikabil iti bassit a pagkargaan. Sinelebraranna ti Memorial a kadua ti anak ken manugangna babaen ti telepono.

Kinuna ti manugangna a ni Brother Mimura: “Manipud nabautisaran ni katugangak idi 1954, awan pay ti nalangananna a Memorial. Uray no naidumduma daytoy a Memorial, maragragsakan ta nakaatender ita a tawen.”

Masiguradotayo a makitkita ni Jehova ti panangikagumaan dagitoy a natataengan ken masaksakit a kakabsat a mangselebrar iti Memorial iti tulong dagiti panglakayenda.—Hebreo 6:10.