Gapu iti COVID-19 pandemic ken iti panangikagumaan dagiti Saksi ni Jehova a mangasaba iti panawen ti Memorial, immadu dagiti bumisbisita iti website a jw.org tapno makagun-odda iti naespirituan a liwliwa, impormasion manipud iti Biblia, ken damdamag. Idi Marso, ngimmato iti nasurok a 50 a porsiento ti bilang dagiti bimmisita iti website no ikompara idi Pebrero ken nadanon ti kangatuan pay laeng a bilang dagiti nagkiddaw iti panangyadal iti Biblia.

Idi nangrugi ti pandemic, immadu ti bumisbisita iti jw.org. Idi Pebrero, agarup dua a milion ti bumisbisita iti website iti kada aldaw, a gagangay a bilang ti bumisbisita. Idi Marso, ngimmato daytoy ta nasuroken a tallo a milion ti bumisbisita iti website iti kada aldaw, ken nasurok nga 4.5 a milion ti bimmisita kadagiti aldaw a nairuar dagiti update maipapan iti coronavirus. Idi Abril 7, 2020, ti aldaw ti Memorial, nasurok a pito a milion ti bimmisita, a kaaduan kadagitoy ti nangbuya iti espesial a programa ti panagdaydayaw iti agsapa ken ti palawag iti Memorial.

“Iti daytoy a tiempo iti tawen, adu ti bumisbisita iti jw.org tapno ammuenda no sadino ken kaano a maatenderanda ti Memorial,” kuna ni Brother Clive Martin, nga overseer ti MEPS Programming Department iti sangalubongan a hedkuarter dagiti Saksi ni Jehova iti Warwick, New York. “Ita a tawen, gapu ta adu nga interesado ti saan a makaatender kadagiti kongregasion iti lugarda, inkabilmi iti website ti espesial a palawag ken ti palawag iti Memorial para iti 2020 a naipatarus iti nasurok a 500 a lengguahe. Minilion ti nangbuya ken nangi-download kadagita a programa. Ipakita ti iyaadu dagiti bumisbisita iti website bayat ti pandemic a nagdakkel ti maitulong ti jw.org a mangted kadagiti naespirituan nga instruksion ken liwliwa, saan laeng a kadagiti Saksi ni Jehova no di ket iti dadduma pay a tattao.”

Adu a bumisbisita iti website ti agbirbirok kadagiti impormasion maipapan iti salun-at ken panangliklik iti sakit, agraman dagiti topiko maipapan iti stress ken panagdanag. Immadu met ti agbirbirok iti impormasion manipud iti Biblia maipapan kadagiti pagilasinan ti maudi nga al-aldaw ken ti uppat a kumakabalio iti Apocalipsis kapitulo 6.

Makapainteres ta immadu met ti bilang dagiti nagkiddaw a mayadalan iti Biblia iti website, a gagangay nga agarup 250 iti inaldaw. Iti bulan ti Marso, immadu iti 40 a porsiento, kayatna a sawen, agarup 350 a kiddaw iti kada aldaw wenno dandani 11,000 a kiddaw iti dayta a bulan. Iti uneg laeng ti 48 nga oras, iti aldaw ti Memorial ken kabigatanna, nasurok a 1,000 ti nagkiddaw a mayadalan iti Biblia iti website.

Imbaga ni Jesus a naragsak dagidiay sipapanunot iti naespirituan a kasapulanda. (Mateo 5:3) Maragsakantayo ta adu a tattao ti umas-asideg ken Jehova ken iti organisasionna tapno makasarak iti liwliwa ken naespirituan a tulong bayat dagitoy napeggad a tiempo.—2 Corinto 1:3, 4.