Idi Abril 7, 2020, bayat ti coronavirus pandemic, linaglagip dagiti Saksi ni Jehova iti intero a lubong ti ipapatay ni Jesu-Kristo. Kas imbaga ni Brother Stephen Lett ti Bagi a Manarawidwid: “Awan ti virus, wenno makapapatay a sakit, a mangpukaw iti panagyamantayo iti inaramid ni Jehova ken ni Jesus para kadatayo, wenno mangpakapuy iti determinasiontayo a manglaglagip iti pangrabii ti Apo.” Kasano a napaneknekan dayta iti daytoy a tawen?

Daytoy ti umuna iti serye dagiti artikulo iti Newsroom a mangireport no kasano a sinelebraran dagiti kakabsat iti intero a lubong ti Memorial bayat ti coronavirus pandemic. Iti daytoy umuna nga artikulo, kitaentayo no kasano a naselebraran ti Memorial iti sangalubongan a hedkuarter dagiti Saksi ni Jehova ken iti sanga nga opisina iti United States.

Kas panagtulnog iti panangiparit ti gobierno kadagiti panagtataripnong ti publiko, nagdesision ti Bagi a Manarawidwid a maysa laeng a programa ti Memorial ti maaramid para iti amin a miembro ti pamilia ti Bethel. Imparang ni Brother Anthony Morris ti palawag iti auditorium iti Warwick. Mabalin a buyaen ti amin a miembro ti pamilia ti Bethel iti United States ti programa kadagiti kuartoda. Nupay manmano laeng ti makiramraman iti emblema, naikkan latta iti emblema ti amin a miembro ti pamilia.

Mabalin met a makikadua dagiti Bethelite iti kongregasionda iti panagselebrar iti Memorial babaen ti videoconference. Kasta met, mabalin a pilien dagiti panglakayen a Bethelite ti agpalawag iti Memorial babaen ti videoconference.

Adu a miembro ti pamilia ti Bethel ti nangibaga a daytoy a Memorial ti kaespesialan pay laeng a naatenderanda. Uray no saanda a makadua dagiti kakabsatda, mariknada a naikaykaysada kadagiti kakabsatda iti intero a lubong a nanglagip iti dua a kadakkelan nga ebkas ti ayat—ti ayat ti Diostayo, ni Jehova, ken ti ipatpategna nga Anak, ni Jesu-Kristo.—Juan 3:16; Mateo 20:28.