Nakapegpeggad ti coronavirus kadagiti nataengan. Gapu iti dayta, nainsiriban nga agtultulnog dagiti babbaket ken lallakayen a kakabsattayo kadagiti rekomendasion dagiti eksperto iti salun-at isu a dida rumrummuar iti pagtaenganda. Ngem makikomkomunikarda latta ken adda pay dadduma nga ar-aramidenda. Us-usarenda ti nadumaduma a teknolohia tapno makipasetda kadagiti gimong ken ministerio.

Idiay Rome, Italy, adda 94-ti-tawenna a kabsat a nabautisaran idi 1952. Saan a rumrummuar iti balayna uray pay sakbay ti sangalubongan a panagwaras ti coronavirus. Nupay buybuyaenna dagiti gimong iti JW Stream, medio nabayagen a dina nabuya dagiti gimong ti nakaitimpuyoganna a kongregasion. Ngem ita, ang-angayenen dagiti panglakayen iti kongregasionna dagiti gimong babaen ti videoconferencing software. Gapu iti dayta, makitanan ti amin a kakongregasionna ken mabuyanan dagiti gimong ti kongregasionna.

Iti Spanish Fork, Utah, U.S.A., ni Sister Stephanie Aitken a maysa nga umel ket agnanaed iti nursing home a saanen nga umawat kadagiti bumisita. Maysa a panglakayen ken ti asawana ti immay iti sarming a ridaw ti nursing home nga ayanna. Inseniasda no kasanona nga iy-install ti videoconference app iti tabletna. Idi nay-install-en ni Sister Aitken ti app, inarakupna ti tablet-na. Agyamyaman ta mabalinnan ti makikonektar iti kongregasionna.

Us-usaren dagiti kakabsattayo, a pakairamanan dagiti lallakay ken babbaket iti intero a lubong, ti teknolohia tapno makibagayda iti agbaliwbaliw a kasasaad gapu iti panagwaras ti virus. Ipalagip dayta kadatayo ti kari ni Jehova nga usaren a nainsiriban dagiti agserserbi kenkuana “ti gatas dagiti nasion.” (Isaias 60:16) Ammotayo a kanayon nga ipaay ni Jehova ti kasapulan dagiti agserserbi kenkuana ditoy daga kadagiti tiempo ti rigat.