Idi Sabado, Oktubre 5, 2019, inangay ti Watch Tower Bible and Tract Society of Pennsylvania ti tinawen a miting ti korporasionna iti Assembly Hall dagiti Saksi ni Jehova idiay Newburgh, New York, U.S.A. Kalpasanna, ti programa a makapabileg iti naespirituan ket imparang ti Bagi a Manarawidwid iti 20,679 nga immatender, a pakairamanan dagiti nakakonektar kadagiti sabali a lokasion. Dagitoy ti sumario ti tunggal paset. a

Ni Brother Gerrit Lösch, a tserman ti programa, ti nangipaay iti panglukat a palawag a naibatay iti Mateo 23:10, a mangipalagip kadatayo a ni Jesu-Kristo ti lidertayo, saan a ti asinoman a tao.

Inlawlawag ni Brother Stephen Lett ti kinapateg ti naragsak a panangted. Ti maysa a pamay-an a maipakitatayo ti kinaparaburtayo ket ti panangtulongtayo kadagiti nadidigra. Impadamag ni Brother Lett dagiti nadadael kadagiti natural a didigra ken ti naaramid a panangsaranay idi 2018 ken 2019 a tawen serbisio. Nasurok a 900,000 a kakabsat ti naapektaran kadagita ken nasurok a 700 a Kingdom Hall ken 15,000 a balbalay dagiti kakabsattayo ti naperdi wenno nadadael. Nakagasto dagiti Saksi ni Jehova iti $49.5 a milion kadagita a panangsaranay.

Iti daytoy a paset, naipabuya dagiti video a mangipakita iti naimpusuan a panagyaman dagiti kakabsat a natulongantayo.

Inlawlawag daytoy a video a dandani 80,000 a pasilidad iti intero a lubong ti as-asikasuen dagiti Saksi ni Jehova. Naipakita met dagiti pamay-antayo a mangmantener, mangpabaro, ken mangbangon kadagiti pasilidad ti organisasion.

Naipabuya iti daytoy a video ti pannakainterbiu ti tallo a brother a timmulong idi iti panangpili ken pananggatang kadagiti pasdek ken daga para iti sangay iti United States ken sangalubongan a hedkuarter: da Brother Max Larson, George Couch, ken Gilbert Nazaroff. Inyestoriada a nalawag a nakitada ti ima ni Jehova tapno maaddaantayo iti nadumaduma a pasdek ken daga.

Nayanunsio iti daytoy a video ti plano dagiti Saksi ni Jehova a pagkaykaysaen ti media production iti baro a pasilidad a maibangon idiay Ramapo, New York. Ti pakaibangonanna ket 3 a kilometro manipud sangalubongan a hedkuarter iti Warwick, New York. Planoda a rugian ti konstruksion inton 2022 ken malpas iti Disiembre 2026. Inton katibok ti trabaho, natantia a 1,500 a boluntario ti kasapulan iti kada aldaw.

Nailawlawag iti daytoy a video a mangrugi inton Enero 2020, dagiti agibumbunannag nga interesado a mangpalawa iti ministerioda mabalindan ti ag-fill out kadagiti application iti jw.org ken isumite dagita iti bagi dagiti panglakayen tapno ma-review.

Dagiti audio files iti jw.org ket mabalinen nga i-access babaen ti Amazon Alexa wenno Google Assistant.

Linawlawagan ni Brother David Splane ti pannakaawattayo iti padto a naisurat iti Joel kapitulo 2 a mangiladawan iti sangapangen a dudon. Daytoy a pannakalawlawag iti pannakaawat ket segseggaantayo nga adalen iti Pagwanawanan.

Impaganetget ni Brother Samuel Herd ti pagsayaatan ti New World Translation of the Holy Scriptures (Study Edition) a ma-access online. Kalpasanna, inruarna ti nayimprenta a New World Translation of the Holy Scriptures (Study Edition) manipud iti libro a Mateo agingga iti Aramid. Mabalinen nga agkiddaw dagiti agibumbunannag iti kopiada iti kongregasionda.

Inyunay-unay ni Brother Anthony Morris a ti panangikasaba iti naimbag a damag ti kangrunaan a trabaho dagiti pudno a Kristiano. Dagiti pasilidad ti organisasion ti tumultulong iti Bagi a Manarawidwid iti panangorganisar iti trabaho a panangasaba ken panangipaay iti naespirituan a taraon iti ili ni Jehova. Kinotar ni Brother Morris dagiti makaparegta a sasao manipud iti Nobiembre 15, 1976 a ruar Ti Pagwanawanan: “Inton dumteng ti “dakkel a rigat” maranaanna koma a ti trabahotayo a panangasaba ket adda iti kangitingitan ti iyaabantena, iti tampok ti kapeggesna iti intero a daga. Ti iyaay ni Apo Jesus tapno mangukom umapayto a kas naan-anay a kellaat—uray pay kadagiti tattao ni Jehova, yantangay awan duadua a magtengannanto ida iti panawen a kaaduan ti trabahoda!”

Inlawlawag ni Brother Mark Sanderson a kas iti impadto ni Jesus, ekspektaren ti ili ti Dios a guraen ida ti “amin a nasion.” (Mateo 24:9) Ngem pinaregtanatayo ni Brother Sanderson nga agbutengtayo ken Jehova, saan a kadagiti tattao.—Salmo 111:10.

Naipabuya ti makatukay puso a video dagiti naidadanes a kakabsat iti Russia. Inyestoriada no kasanoda a napagballigian ti butengda iti pannakaidadanes. Iti daytoy a palawag ken video, naiparegta iti amin nga adipen ni Jehova a dida met agbuteng.

Nangted ni Brother Geoffrey Jackson iti praktikal a pannakayaplikar dagiti teksto iti Christian Greek Scriptures a nangusar iti termino a “managparbeng.” Impaganetgetna met ti kinapateg ti agtultuloy a ‘panangusartayo iti abilidadtayo nga agpanunot’ (iti literal, naan-anay a kinamanagparbeng) bayat dagitoy maudi nga al-aldaw.—1 Pedro 1:13.

Inyanunsio ni Brother Kenneth Cook a ti teksto iti tawen 2020 ket Mateo 28:19: “Inkayo ngarud kadagiti tattao . . . ket pagbalinenyo ida nga adalak, ken bautisaranyo ida.” Impaganetgetna a masapul a tulongantayo dagidiay mayat nga agsursuro maipapan ken Jehova a mangidedikar iti biagda kenkuana ken agpabautisarda.

Dagiti naespirituan a programa a kas iti tinawen a miting ti mangparegta kadatayo nga agtultuloy nga agregget nga agserbi ken Jehova.