Idi Enero 2021, impakaammo ti Bagi a Manarawidwid ti pannakairuar ti Agbiagka a Naragsak iti Agnanayon! a libro ken broshur. Makatulong dagitoy a publikasion tapno lumaingtayo a mangisuro ken agbalintayo a mas epektibo a mangyadal iti Biblia.

Adda dagiti baro a feature a nainayon iti JW Library app tapno mas makaengganio ti digital a format ti libro ken broshur ken mas ag-enjoy ti mangyad-adal ken ti iyad-adalanna. Kabesaduem dagitoy a baro a feature.

• Kayatmo kadi nga ipakita iti iyad-adalam ti maysa nga espesipiko a punto iti leksion? I-tap-mo ti parapo tapno agparang ti context menu. I-tap-mo ti opsion a Share tapno mai-share-mo ti link dayta a parapo.

• Kayatmo kadi a denggen ti pannakaibasa ti maysa a parapo a kadua ti iyad-adalam? I-tap-mo ti parapo tapno agparang ti context menu. I-tap-mo ti opsion a Play tapno mangrugi nga ag-play iti dayta a parapo ti audio recording.

• Mabalin a nayimprenta nga edision ti us-usaren ti iyad-adalam ngem digital nga edision ti us-usarem. Kayatmo kadi a makita ti itsura ti nayimprenta a panid? Iti More menu (tallo a tulnek iti makinngato a kannawan a paset), i-tap ti Printed Edition. Tapno makasublika iti digital nga edision, i-tap ti Digital Edition iti dayta met laeng a menu.

• Kayatmo kadi a tulongan dagiti iyad-adalam tapno mamonitorda ti panagrang-ayda iti digital a format? Paregtaem ida nga usarenda dagiti kahon a pangisuratanda iti petsa no kaanoda a nalpas ti maysa a leksion wenno dagiti kalat a kayatda pay nga aramiden. Mabalinda met nga itsek dagiti kahon iti tsart nga “Imonitormo ti Panagbasam iti Biblia.”