Iti sumagmamano nga aldaw, adu ti dinadael ti bagyo a Mangkhut iti makinlaud a paset ti Pacific Ocean ken iti South China Sea. Dagiti sumaganad a report ket naggapu kadagiti sanga nga opisina a mangas-asikaso iti kakabsattayo kadagiti lugar a dinalapus ti bagyo.

Micronesia: Dinalapus ti bagyo a Mangkhut ti Rota, a maysa nga isla iti Northern Mariana Islands, idi Septiembre 10, 2018. Dayta ti kapigsaan a bagyo a dimmalapus iti Rota sipud pay idi 2002. Maragsakankami a mangipadamag nga awan ti nadangran a kabsat ken saan a nadadael ti kakaisuna a Kingdom Hall iti isla. Nakidagus pay laeng ti maysa a kabsat agingga a matarimaan ti balayna. Bimmisita ti manangaywan iti sirkito iti isla tapno pabilgenna dagiti kakabsat.

Pilipinas: Idi Septiembre 15, 2018, simrek ti bagyo a Mangkhut (naawagan iti Ompong iti Pilipinas) idiay Baggao iti probinsia ti Cagayan iti Pilipinas. Ti Mangkhut ti kapigsaan a bagyo a dimmalapus iti Pilipinas iti daytoy a tawen. Addan 81 a natay ken mabalin nga ad-adu pay.

Makapaladingit ta maysa a sister a taga-Benguet ti natay ken uppat a brother ti nasugatan gapu iti bagyo. Naipadamag a 938 a balay dagiti kakabsat ti naperdi ken 15 ti nadadael. Di kumurang a 28 a Kingdom Hall ti naperdi, a maysa kadagita ti nadadael gapu iti landslide. Ti uppat a Disaster Relief Committee (DRC) nga adda iti Baguio, Cauayan, Laoag, ken Tuguegarao ket mangipapaay iti pisikal, emosional, ken naespirituan a kasapulan dagiti kakabsat. Addanto miembro ti Branch Committee a bumisita kadagiti kakabsat tapno pabilgenna ida.

Hong Kong: Dimmalapus ti bagyo a Mangkhut iti Hong Kong idi Septiembre 16, 2018. Awan unay ti nadadael iti sanga nga opisina ken iti apartment a pagnanaedan ti pamilia ti Bethel. Adda dua a balay ti Saksi a nakaro ti dadaelna. Natupakan iti kayo ti maysa a balay ken naitayab met ti atep ti maysa gapu iti napigsa nga angin. Adda met dagiti balay a dinadael ti danum. As-asikasuen ti DRC iti Hong Kong dagiti kangrunaan a kasapulan dagiti kakabsat.

Ikarkararagantayo dagiti kakabsat a naapektaran iti bagyo a Mangkhut. Makaliwliwa a maammuan nga ipapaay dagiti naayat a kakabsat ti kasapulan dagiti kapammatiantayo. Talaga a bendision manipud ken Jehova ti nagkaykaysa a naespirituan a pamiliatayo.—Proverbio 17:17.