NEW YORK—Pimmusay ni Guy H. Pierce a miembro ti Bagi a Manarawidwid dagiti Saksi ni Jehova idi Martes, Marso 18 iti sangalubongan a hedkuarterda idiay Brooklyn, New York iti edad a 79.

Nagserbi ni Mr. Pierce iti nagduduma a komite a mangiwanwanwan kadagiti aktibidad dagiti Saksi ken iti sangalubongan a panangisuroda iti Biblia. Gapu kadagiti responsabilidadna iti organisasion, masapul a kanayon a mapan iti nadumaduma a pagilian. Inusarna dagita a gundaway a mangparegta kadagiti Saksi ni Jehova iti intero a lubong. Nupay adu ti trabahona, pagaammo unay nga adda latta panawenna a dumngeg kadagidiay agkasapulan ti tulong ken balakad. Kanayon met a nakaisem ken managpakatawa isu a komportable ti dadduma kenkuana. Kuna dagiti nasinged kenkuana nga uray dagiti tattao iti nagduduma a kultura ket dagus a limmag-an ti riknada kenkuana. Iti maysa a palawagna idi nagturpos ti maysa a klase dagiti amin-tiempo a ministro, kastoy ti imbalakad ni Mr. Pierce a pagaammo a kasta a mismo ti ar-aramidenna: “Agbalinkayo a natibker kadagiti umiso a prinsipio, ngem agbalinkayo met a mannakibagay. Diyo tagibassiten dagiti agnanaed iti pakaidestinuanyo gapu iti naiduma a kulturada.”

Nayanak ni Guy Hollis Pierce idi Nobiembre 6, 1934 idiay Auburn, California. Nabautisaran kas Saksi ni Jehova idi Agosto 14, 1955 iti edad a 20. Idi Mayo 30, 1977, inkasarna ti padana a Saksi a ni Penelope (Penny) Wong, ket naaddaanda iti annak. Nagserbi da Mr. ken Mrs. Pierce kas amin-tiempo a mangisursuro iti Biblia (aw-awagan dagiti Saksi kas regular pioneer). Idi agangay, nagbalin nga agdaldaliasat a ministro ni Mr. Pierce, a mangbisbisita kadagiti kongregasion dagiti Saksi ni Jehova iti intero a United States tapno mangpabileg iti pammati dagiti padana nga amin-tiempo a mangisursuro iti Biblia ken miembro ti kongregasion. Idi 1997, naawisda nga agtrabaho iti amin-tiempo iti sanga nga opisina dagiti Saksi ni Jehova iti United States. Idi Oktubre 2, 1999, nayanunsio ni Mr. Pierce kas baro a miembro ti Bagi a Manarawidwid.

Idi Sabado ken Domingo, Oktubre 5 ken 6, 2013, ni Mr. Pierce ti nagakem kas tserman iti maika-129 a tinawen a miting ti Watch Tower Bible and Tract Society of Pennsylvania. Agdagup iti 1,413,676 iti 31 a pagilian ti immatender iti mismo a nakaangayanna wenno babaen iti webcast. Sigun iti opisial a website dagiti Saksi, dayta pay laeng ti kadakkelan a panagtataripnong dagiti Saksi ni Jehova.

Malaksid ken baketna a Penny, naulila pay ni Mr. Pierce ti 6 nga annak, sumagmamano nga appoko, ken appokona iti tumeng. Isu ket kailiwto met dagiti Saksi ni Jehova iti intero a lubong nga imbilangna kas kapamiliana.

Nagkomento dagiti padana a miembro ti Bagi a Manarawidwid maipapan iti “nabileg a pammatina ken natibker a takderna maipapan kadagiti linteg ken prinsipio ni Jehova.” Kunada: “Ti nakitami a kinamatalek ken kinaturedna bayat ti panagbiagna ditoy daga ket agtultuloyto a mangpabileg kadakami para iti sumaganad a tawtawen.”

Media Contact(s):

International: J. R. Brown, Office of Public Information, tel. +1 718 560 5000