Imonmonitor a naimbag ti sangalubongan a hedkuarter dagiti Saksi ni Jehova ti panagwaras ti novel coronavirus disease (a pagaammo kas COVID-19). Ammotayo nga impadto ti Biblia a dagiti nakaro a sakit ket maysa a nalawag a pagilasinan iti maudi nga al-aldaw. (Lucas 21:11) No mangrugi nga agwaras ti maysa a sakit, nainsiriban a mangaramidtayo kadagiti praktikal a pamay-an tapno maprotektarantayo ti bagitayo ken ti sabsabali.—Proverbio 22:3.

Mabalin a pampanunotentayo no ania ti kasasaad dagiti kakabsattayo kadagiti apektado a lugar. Ti panagwaras ti COVID-19 ket dakkel ti epektona kadagiti sanga nga opisina ken kongregasion idiay Italy, Japan, South Korea, ken dadduma pay a pagilian. Iti dadduma a kasasaad, kapilitan a kinanselar ti sanga nga opisina ti panag-tour ken panagsarungkar dagiti bisita iti Bethel. Iti dadduma a situasion, imparit ti gobierno ti panagtataripnong ti adu a tattao iti publiko, isu a kapilitan a kinanselar ti sangay dagiti asamblea sirkito. Masapul met nga i-adjust dagiti kongregasion dagiti urnos para iti panangasaba ken gimong iti dadduma a lugar. Iti laksid dagitoy a pakarigatan, itultuloy latta dagiti kakabsattayo a pabilgen ti espiritualidadda ken agpipinnaregtada.—Judas 20, 21.

Kadagita a situasion, nakita dagiti kakabsattayo a makatulong dagiti sumaganad a prinsipio. Mabalin a makatulong met dagitoy kenka ken iti pamiliam no adda agwarwaras a sakit iti lugaryo.

• Saanka Unay nga Agdanag. Nupay nasayaat ti agbalin nga alerto kadagiti agwarwaras a sakit ken agan-annad, ti reaksionmo ket masapul a naibatay kadagiti pudno nga impormasion, saan a gapu iti buteng.—Proverbio 14:15; Isaias 30:15.

• Surotem Dagiti Singasing ken Direktiba ti Gobierno. Masansan a mangipatpatungpal dagiti lokal nga autoridad kadagiti pamay-an ti panagannad wenno restriksion tapno maprotektaran ti salun-at ti publiko. Nasayaat a kanayon nga ammuentayo dagita ken surotentayo dagiti direktiba ti gobierno.—Roma 13:1.

• Agbalinka a Managdaldalus. Masapul a kanayon a sabonam ken bugguam dagiti imam wenno agusarka iti hand sanitizer nga adda alkoholna. Masapul met a pagtalinaedentayo a nadalus dagiti masansan a masagsagid a paset ti balay ken Kingdom Hall-tayo. Kasta met, saan nga iparparegta dagiti medical expert ti panaginnalamano, ta mabalin a dayta ti ad-adda a mangiwaras iti sakit. Maipapan iti coronavirus, nangipaay ti World Health Organization kadagiti kanayonan a palagip para iti publiko.

• Ipakitam ti Ayat iti Sabsabali. Ammotayo amin a napateg ti pannakigimong ken panangasaba, ngem no masakitka, nasaysayaat no agtalinaedka iti balayyo tapno saanmo a maakaran ti dadduma. Pakakitaan dayta ti nainkabsatan nga ayat ken mangprotektar kadagiti kakabsattayo ken kadagiti kaarrubatayo a saan a Saksi.—Mateo 22:39.

• Surotem Dagiti Temporario a Panagbalbaliw Dagiti Urnos ti Kongregasion. Kadagiti lugar nga adda agwarwaras a sakit, mabalin a masapul a kanselaren pay laeng ti sanga nga opisina dagiti gimong ti kongregasion, asamblea, ken dadduma pay nga espesial a miting. Kasta ti mapaspasamak iti dadduma a lugar nga apektado unay iti virus ti COVID-19, kas iti dadduma a rehion ti Italy, Japan, ken South Korea. Depende kadagiti lokal a kasasaad, mabalin a mangted dagiti panglakayen iti access kadagiti nairekord a gimong, a mabalin a buyaen dagiti agibumbunannag iti balayda. Mabalin a mangasaba dagiti agibumbunannag babaen ti telepono, selpon, text message, e-mail, wenno surat.

Dagitoy ti dadduma a reperensia nga addaan kadagiti makatulong a prinsipio tapno malapdan ti sakit.

• “Protektaram ti Bagim iti Sakit” Agriingkayo! No. 6 2016, panid 4-6

• “Ti Maaramidam Tapno Nasalsalun-atka” Agriingkayo! Hunio 2015, panid 2-7

• “Mapasayaatmo ti Salun-atmo: 4—Saluadam ti Salun-atmo” Agriingkayo! Marso 2011, panid 7