NEW YORK—Aw-awisen dagiti Saksi ni Jehova ti amin nga umatender iti 2016 a Rehional a Kombension nga “Agtalinaed a Nasungdo ken Jehova!” Inton Biernes, Mayo 20, iruginto dagiti Saksi dagitoy a kombension iti United States ken iti intero a lubong. Awan ti bayadan dagiti mayat nga umatender kadagitoy.

Iti daytoy a tallo nga aldaw a programa, adda 49 a presentasion a mangilawlawag iti maipapan iti “kinasungdo.” Kanayonanna, nangisagana dagiti Saksi iti 35 a video para iti programa. Nangisaganada pay iti dua nga ababa a pelikula a maipabuya iti Sabado ken Domingo. Iti kada aldaw, mangrugi dagiti sesion iti agsapa ken malem babaen kadagiti music video a nairekord para iti kombension.

Kas iti ar-aramiden dagiti Saksi iti napalabas a tawtawen, agiwarasdanto kadagiti espesial nga imbitasion a mangawis iti amin nga umatender iti programa. Dagiti petsa ken lokasion dagiti kombension ket makita iti jw.org, ti opisial a website dagiti Saksi. Para iti kanayonan nga impormasion, mabalin a kontaken dagiti reporter ti kaasitgan a sanga nga opisina dagiti Saksi ni Jehova, a pakairamanan ti media contact para kadagidiay agplamplano nga agaramid iti report maipapan iti kombension.

Imbaga ni David A. Semonian, a pannakangiwat dagiti Saksi ni Jehova iti sangalubongan a hedkuarterda iti Brooklyn, New York: “Patienmi a nakapatpateg ti kinasungdo tapno agbalin a nasayaat ti maysa a relasion. Itampok ti kombensionmi ita a tawen dagiti makatulong tapno agbalin a nadekdekket ti relasiontayo kadagiti gayyemtayo, kapamilia ken, kangrunaan iti amin, iti Dios. Masiguradomi a maragsakan ti amin nga umatender iti daytoy a programa.”

Media Contact:

David A. Semonian, Office of Public Information, tel. +1 718 560 5000