NEW YORK—Inton Mayo 19, 2017, irugin dagiti Saksi ni Jehova ti serye ti tallo nga aldaw a tinawen a kombensionda a napauluan iti “Dika Sumuksuko!” Maaramid ti programa kadagiti napili a lokasion iti intero a lubong ken agtultuloy dayta agingga iti Enero 2018. Kas kadagiti napalabas a tawen, makiramraman ita dagiti Saksi iti kampania iti intero a lubong tapno personal nga imbitaranda dagiti tattao nga umatender.

Awan bayadna ti umatender ken awan ti maaramid a panagkolekta. “Dandani 13 a milion ti immatender kadagiti kombensionmi iti intero a lubong idi napan a tawen,” kuna ni David A. Semonian, a pannakangiwat dagiti Saksi ni Jehova iti sangalubongan a hedkuarterda iti Warwick, New York. “Ekspektarenmi nga ad-adu pay ti umatender ita a tawen.”

Adda 52 a paset ti programa a maiparang iti nagduduma a pamay-an, kas iti ababa a lektiur, interbiu, ken ababa a video. Kasta met, kada malem a maipabuya ti maysa a paset ti tallo ti pasetna a pelikula a napauluan iti Laglagipenyo ti Asawa ni Lot. Makita iti jw.org, nga opisial a website dagiti Saksi, ti petsa ken lokasion dagiti kombension. Mabalin a kontaken dagiti media outlet ti kaasitgan a branch office dagiti Saksi ni Jehova para iti kanayonan nga impormasion, a pakairamanan ti nagan ti local media contact para kadagiti reporter nga agplamplano a mangipadamag maipapan iti kombension.

“Gapu kadagiti problema, mabalin a mapukaw ti talna ti panunottayo ken kayat pay ketdin ti dadduma ti sumuko,” kuna ni Mr. Semonian. “Agpada a mabenepisiaran dagiti Saksi ken dagiti saan a Saksi iti kombensionmi ita a tawen gapu ta nadisenio dayta a mangpapigsa iti determinasion dagiti indibidual nga agtultuloy nga agibtur ken mangsango kadagiti problema iti epektibo a pamay-an.”

Media Contact:

David A. Semonian, Office of Public Information, +1-845-524-3000