NEW YORK—Bayat nga umad-adu ti makapkaptan iti makapapatay a sakit nga Ebola iti Makinlaud nga Africa, agtultuloy ti napinget a panangisuro dagiti Saksi ni Jehova kadagiti miembroda maipapan iti dayta a sakit.

Ti Ebola virus ket nagbalin nga epidemia idiay Guinea ken nagbiit a nagwaras iti kabangibangna a Liberia ken Sierra Leone. Idi naammuan dayta dagiti sanga nga opisina dagiti Saksi ni Jehova iti dayta a rehion, insigida a nangipatulodda kadagiti surat a mamagannad iti amin a kongregasion iti tallo a pagilian. Nailanad kadagita a surat dagiti pagannurotan ken suhestion dagiti ahensia ti lokal a gobierno ken nailawlawag dagiti peggad ti virus, no kasano a mayakar ti virus, ken no ania dagiti pamay-an ti panagannad a rumbeng a maaramid tapno malapdan ti panagwaras ti sakit. “Idi damo, saan nga ammo ti adu a tattao ti aramidenda yantangay agnanaedda iti lugar a saan unay a pamiliar dagiti umili kadagiti sakit ken nasaknap dagiti di umiso a sayangguseng maipapan iti nagtaudan ti Ebola,” kuna ni Collin Attick a pannakangiwat dagiti Saksi ni Jehova iti Sierra Leone. “Ngem dagus a nagtignay ken nagtulnog dagiti miembro ti kongregasionmi idi nangngegda dagiti instruksion kadagiti Kingdom Hall-da.”

Idi Hulio, inrugi dagiti agdaldaliasat a pannakabagi dagiti Saksi ni Jehova ti espesial a dua nga aldaw nga ibibisita iti tunggal kongregasion iti Sierra Leone ken Guinea. Kadagita nga ibibisita, naitampok ti palawag a napauluan iti “Ti Panagtulnog—Mangsalbar iti Biag.” Panggep dayta nga isuro dagiti praktikal a pamay-an ti panagannad kontra iti Ebola ken ti panangiparegta iti agtultuloy a panagtulnog kadagiti magun-odan a kabaruan nga instruksion. Agtultuloy dagita nga ibibisita agingga iti Nobiembre 2014. Iti met asideg ti pagserkan iti tunggal pasdek a pagdaydayawan dagiti Saksi (a pagaammo kas Kingdom Hall) iti Guinea, Liberia, ken Sierra Leone, nangikabil dagiti Saksi kadagiti pagbugguan iti ima nga addaan iti danum a nalaokan iti bleach. Kaaduan a Saksi kadagita a pagilian ti mangtultulad iti dayta babaen ti panangikabilda kadagiti kasta a pagbugguan iti imada iti mismo a pagtaenganda.

Sigun iti report ti World Health Organization a napetsaan iti Oktubre 1, 2014, naipadamag a 7,178 ti nakaptan ken nasurok a 3,300 ti natayen iti nabiit pay a panagwaras ti sakit nga Ebola iti Makinlaud nga Africa, nupay manamnama a ngumato pay ti bilang. Idi Oktubre 2, kadagiti 2,800 a Saksi iti Guinea ken Sierra Leone, maysa a babai a Saksi a nars ti nakaptan iti Ebola virus ken natay idi Septiembre 25, 2014. Kadagiti 6,365 a Saksi iti Liberia, 10 ti natay gapu iti dayta a sakit; 6 ti health worker. Nupay nagwaras met ti virus iti Nigeria itay nabiit, awan kadagiti Saksi sadiay ti nakaptan. Awan met kadagiti Saksi a misionero kadagita a pagilian ti naipadamag a nakaptan ta bayat ti panagwaras ti virus, adu kadakuada ti nagbakasion wenno dimmar-ay kadagiti kombension iti Europa ken United States. Dadduma ti nabiit pay a nagsubli iti trabahoda kas misionero ken sursurotenda dagiti kasapulan a panagannad ken instruksion a naggapu iti sanga nga opisina iti ayanda a pagilian. Saan pay a nakasubli ti dadduma a misionero iti destinoda gapu kadagiti restriksion iti panagtayab wenno dadduma pay a sirkumstansia.

Dagiti komite a pangsaranay a buklen dagiti Saksi a boluntario ket tumultulong kadagiti lumugar a Saksi iti panangasikaso iti kasapulan dagiti pamiliada ken karelihionanda kadagiti pagilian iti Makinlaud nga Africa a kakaruan a naapektaran iti Ebola. “Ti panangsurotmi kadagiti prinsipio ti Biblia maipapan iti kinadalus ken panangkuarentinas ti tumultulong kadakami a mangsango iti kasasaad,” kuna ni Thomas Nyain, Sr. a pannakangiwat dagiti Saksi ni Jehova iti Liberia. “Kas Saksi ni Jehova, saanmi nga an-annuroten dagiti di naibasar-Biblia a kostumbre iti panangipumpon. Napaneknekan a maysa dayta a proteksion kadagiti amin a miembromi, nangruna iti daytoy napeggad a tiempo.”

Iti Sierra Leone, adda naipatangatang nga anunsio iti maysa a lokal nga estasion ti radio a nangibinsabinsa no kasano a tinulongan dagiti Saksi ni Jehova dagiti karelihionanda, ken ti dadduma pay a saan a Saksi iti komunidad tapno maliklikanda ti Ebola virus. Kiniddaw met dagiti autoridad sadiay iti komite a pangsaranay dagiti Saksi a tulonganda dagiti ahensia ti gobierno iti dayta a rehion.

“Maparparegtakami a makakita kadagiti karelihionanmi iti Makinlaud nga Africa a kanayon nga agan-annad bayat nga itultuloyda dagiti narelihiosuan nga aktibidadda ken ti trabahoda a panangisuro iti Biblia agingga a posible,” kinuna ni J. R. Brown nga internasional a pannakangiwat dagiti Saksi iti sangalubongan a hedkuarterda iti New York. “Kanayon a pampanunotenmi ken ikarkararaganmi dagiti karelihionanmi ken ti dadduma pay a mangib-ibtur iti epekto daytoy nga Ebola virus.”

Media Contact(s):

International: J. R. Brown, Office of Public Information, tel. +1 718 560 5000

Guinea: Thierry Pourthié, tel. +224 631 40 96 50

Liberia: Thomas Nyain, Sr., tel. +231 886 513 414

Nigeria: Paul Andrew, tel. +234 7080 662 020

Sierra Leone: Collin Attick, tel. +232 77 850 790