Naangay ti 2024 Winter Youth Olympic Games iti uppat a siudad iti South Korea manipud Enero 19 agingga iti Pebrero 1, 2024. Ti rinibu nga atleta, journalist, ken dagiti napan nagbuya ket naggapuda iti 70 a pagilian. Nasurok a 2,600 a Saksi ni Jehova ti nakiraman iti espesial a panangasaba bayat dayta nga event. Naipuesto dagiti literature cart iti 34 a lugar, ken available iti uppat a lengguahe dagiti naibatay iti Biblia nga impormasion.

Adda agtutubo a lalaki a Mandarin ti pagsasaona nga immasideg iti dua a brother ket imbagana a nakakita kadagiti literature cart iti nadumaduma a paset ti siudad. Ngem idi nakitana ti poster maipapan iti kinaragsak ti pamilia, immasideg tapno agsaludsod kadakuada. Inlawlawag dagiti brother no kasano a mai-download-na iti Mandarin ti broshur a Posible nga Agbalin a Naragsak ti Pamiliam iti jw.org. Linuktan a dagus ti lalaki ti website-tayo iti selponna ken nagyaman kadagiti brother iti tulongda.

Adda lalaki a taga-Ukraine a nakasarita ti agassawa a Saksi iti di pormal a pamay-an. Gapu ta saanda a makasao iti lengguahena, nagusarda iti translation app iti selponda a nakisarita kenkuana. Bayat nga agsasaritada, impakita ti lalaki ti maysa a piktiur ti nadadael a paset ti lugarda gapu iti missile. Nakisimpatia ti agassawa sa impakitada ti maysa a bersikulo ti Biblia a mangibagbaga a dandanin agpatingga dagiti gubat. Gapu ta nabasa ti lalaki daytoy a kari ti Biblia iti mismo a lengguahena, natukay ti pusona. Nakitulag ti agassawa a kontakendanto manen isuna tapno maituloyda ti panagsasaritada.

Kinasarita ti maysa a sister a ni In-Sook iti English ti taga-Finland nga agtutubo a figure skater ken ti nanangna. Bayat nga agsasaritada, impakita ti sister ti agduduma a topiko iti website-tayo nga adda iti seksion a “Panangpadakkel Kadagiti Tin-edyer.” Naragsakan ti ina iti dayta nga impormasion ken imbagana a bisitaennanto manen ti website-tayo.

Maragsakantayo para kadagiti kakabsattayo iti South Korea gapu iti gundawayda a nakapangasaba iti adu a tattao bayat daytoy nga internasional nga event, ket ‘naidaydayawda ti nagan ni Jehova.’—Salmo 148:13.