Iti damo a gundaway, impalubos ti gobierno ti South Korea a mangaramid iti alternatibo a panagserbi dagiti sibilian a saan a mayat nga agsoldado gapu iti konsiensiada. Idi Oktubre 26, 2020, 63 kadagiti kakabsattayo ti nangawat iti daytoy a kita ti panagserbi ken nangrugida nga agtrabaho iti tallo a tawen iti maysa kadagiti dua a pagbaludan. Karaman iti trabahoda ti panagluto ken panagidasar iti taraon, panaggatang, panagisuro, panagdalus ken panangaywan iti salun-at, ken panagmantener. Iti agdama a linteg, no nakapagserbin dagiti kakabsat iti dua a bulan, mapalubosanda a mapan mangasaba ken makigimong no nalpasdan ti trabahoda. Ngem masapul a makasublida iti saan a naladladaw ngem 9:00 ti rabii.

Imbaga ni Brother Kim Hyun-soo, a maysa kadagiti 63: “Nupay daytoy nga alternatibo a serbisio ket saan a maitunos iti internasional a pagalagadan, inawatko daytoy ta ti trabaho ket para iti sibilian ken awan ti koneksionna iti militar.”

Agtalektayo a dagiti agtutubo ken matalek a kakabsattayo idiay South Korea ket agtultuloy a mangyeg iti dayaw ken Jehova babaen ti ‘nasayaat nga aramidda.’—Mateo 5:16.