Iti umuna a gundaway iti pakasaritaan ti South Korea, dagiti abogado ti gobierno kiniddawda kadagiti korte a pagapelaran nga ikeddengda a saan a nakabasol ti lima a kakabsattayo a nagkedked nga agsoldado. Kas resultana, inabsuelto ti korte dagiti kakabsat ken inserradan dagiti kasoda. Daytoy a desision binaliktadna ti desision nga impaulog ti nababbaba a korte a nakabasol dagiti kakabsattayo gapu ta saanda a kayat ti agserbi iti militar.

Naipaulog dayta a desision idi Disiembre 14, 2018 ket dayta ti nakaibatayan ti pannakaabsuelto ti nasurok a 900 a kakabsat a saan pay a nalpas ti kasoda iti korte ti Korea. Urayen dagiti naabsuelto a kakabsat ti pannakaipatungpal ti alternatibo a serbisio a mabalinda nga aramiden no saanda a kayat ti agsoldado.

Ti desision dagiti korte a pagapelaran ket naibatay iti dua a nagpateg a desision ti Constitutional Court ken ti Korte Suprema ti Korea idi 2018. Dagita a desision ti nangwaswas iti 65 a tawenen a linteg nga automatiko a maibalud dagiti agkedked nga agsoldado uray no naibatay dayta iti narelihiosuan a patpatienda.

Dayta a desision ti dua a nangato a korte, a nangbigbig iti kalintegan nga agkedked nga agsoldado gapu iti narelihiosuan a patpatien, ket nagustuan dagiti organisasion a mangitantandudo iti kalintegan ti tao. Kuna ti National Human Rights Commission of Korea: “Ti desision ti Korte Suprema pinagpatinggana ti nasaem a panangdusa kadagiti agkedked nga agsoldado a nangrugi pay idi 1950s, a nangapektar iti dandani 20,000 a tattao . . . Kayatmi nga iyebkas ti nauneg a panagraemmi kadagiti sakripisio dagiti nagkedked nga agsoldado kasta met dagiti pamiliada gapu iti panagibturda.”

Ita, makiddawen kadagiti agkedked nga agsoldado a paneknekanda a ti panagkedkedda ket naibatay iti “nauneg, natibker ken pudno” a patpatienda. Naibilin kadagiti hues a mangbirokda iti ebidensia a ti agkedked nga agsoldado ket talaga a napasnek kadagiti patpatienna. Kuna ti Korte Suprema, “Iti amin nga aspeto ti biagna . . . masapul nga iyap-aplikarna dagiti napasnek a patpatienna.” Idi sinungbatan dagiti kakabsattayo dagiti saludsod dagiti hues, naaddaanda iti nagsayaat a gundaway a mangilawlawag iti personal a desisionda a saanda a kayat ti makigubat ken agsoldado.—1 Pedro 3:15.

Iti nasurok nga innem a dekada, maibalbalud dagiti Saksi ni Jehova iti Korea ta saanda nga agsoldado gapu kadagiti patpatienda. Pammaneknek daytoy a kas Kristiano, neutral ti takdertayo ta kayattayo a tungpalen ti maikadua a kadakkelan a bilin nga “ayatem ti kaarrubam a kas iti bagim.”—Mateo 22:39.