Nangrugi ti panagibangon ken panag-renovate iti sangay iti Thailand idi 2019. Dagiti boluntario ket naggapu iti Thailand ken iti nagduduma a pagilian. Ngem idi nangrugi ti COVID-19 pandemic, 42 kadagiti 50 nga international construction volunteer ti nagawid kadagiti pagilianda. Bayat a makiskissayan dagiti restriksion, naituloy manen ti trabaho. Ad-adu pay a boluntario iti pagilian ti naawis tapno masanay ken tumulong iti proyekto. Nalpas ti maudi a paset ti trabaho idi Abril 30, 2023.

Karaman kadagiti boluntario a taga-Thailand da Brother Setthasat Tawansirikul ken ni baketna a ni Waraporn. Madandanaganda idi ta awan pay ti kapadasanda. Kuna ni Setthasat: “Idi addakamin sadiay, nagmayat ti panang-training-da kadakami.”

Gapu ta nakaragragsak ken makapnek ti makipagtrabaho iti daytoy a proyekto, naparegta ti adu a boluntario a taga-Thailand nga agaplay iti dadduma pay a kita ti amin-tiempo a panagserbi. Dadduma kadakuada ti agtrabtrabahon kadagiti proyekto a panagibangon a maar-aramid iti teritoria ti sangay. Adda maysa a sister nga ages-eskuelan iti School for Kingdom Evangelizers. Dadduma met ti agserserbin iti Bethel. Ni Brother Rapeepat Woradetsakul ti maysa kadagita a baro a miembro ti pamilia ti Bethel. Imbagana: “Napadasak a mismo ti tulong ni Jehova bayat ti proyekto a panagibangon isu a naturedak a nangawat iti imbitasion nga agserbi iti Bethel. Ammok a tulongannakto ni Jehova iti daytoy baro nga asaynmentko.”

Karaman iti trabaho a panagibangon ken panag-renovate iti sangay iti Thailand ti pannaka-renovate dagiti kuarto ken opisina, pannakaibangon ti baro a pasdek para iti maintenance ken storage, ken pannakaaramid ti baro a parking area. Kasta met, innem nga apartment iti asideg ti sanga nga opisina ti nagatang ken na-renovate tapno adda kanayonan a pagyanan dagiti miembro ti pamilia ti Bethel.

Maragsakantayo ta situtulok nga agserserbi ken Jehova dagiti kakabsattayo iti Thailand ken mapadpadasanda a husto ti ibagbaga ti Salmo 34:8: “Nanamenyo ken kitaenyo a ni Jehova ket naimbag.”