Ni Brother Eziz Atabayev ket naibalud iti dua a tawen idiay Turkmenistan gapu ta saan nga ipalubos ti konsiensiana ti agsoldado, ngem nakapagtalinaed a matalek. Nawayawayaan idi Disiembre 19, 2020. Iti napalabas a sangapulo a tawen, 46 a kakabsat ti naibalud idiay Turkmenistan gapu ta saan nga ipalubos ti konsiensiada ti agsoldado.

Idi 2016, naayaban ni Brother Atabayev nga agsoldado. Nagkedked nga agsoldado ta saan nga ipalubos ti konsiensiana. Nayuli ti kasona iti prosecutor’s office. Kalpasan ti agarup dua a tawen, nangngeg ti kaso ni Eziz iti korte. Idi Disiembre 19, 2018, sinentensiaan ti korte iti dua a tawen a pannakaibalud.

Imbaga ni Eziz: “Sakbay a naibaludak, kanayon a nakisarsaritaak kadagiti kakabsat a naipasango met iti situasionko wenno kadagiti kakabsat a naibalud met idi tapno ammok ti ekspektarek. Nagbasaak kadagiti nagduduma a pakasaritaan iti biag kadagiti publikasiontayo. Nagbasaak met kadagiti makaparegta a teksto iti Biblia.

“Iti agsapa sakbay ti pannakabistak, impabasa kaniak ti maysa a kabsat ti Isaias 30:15, a kunana: ‘Napigsakayo no agtalinaedkayo a kalmado ken no agtalekkayo.’ Nakatulong ti panangpampanunotko iti daytoy a teksto bayat ti pannakaibaludko.”

Nupay narigat dagiti kasasaad iti pagbaludan, narigrigat para ken Eziz ti mayadayo iti pamiliana. “Idiay pagbaludan, ad-adda a simmingedak kadagiti kakabsat a padak a nakabalud. Nagbalinda a pudno a gagayyemko ken natulongandak tapno saanak unay a mailiw iti pamilia ken gagayyemko.”

Inkagumaan met ni Eziz ti mangasaba no adda gundaway. Imbagana: “Idi damo, saan a kayat ti dadduma a balud a kaskasabaak ida. Ngem idi agangay, dimngeg met laeng dagiti saan a mayat a dumngeg idi. No adda kabbaro a balud a saan a makaam-ammo kaniak, saanna met a kayat ti makasabaan. Ngem indepensadak dagiti nabayagen a balud a nakaskasabaak ken imbagada kadagiti kabbaro a balud dagiti nasursuroda kaniak.”

Tapno mapagballigiantayo dagiti suot a pakaipasanguantayto, imbaga ni Eziz: “Iparegtak a maaddaankayo iti napasnek a personal a panagadal ken kanayon nga agkararagkayo ken Jehova. Ibagayo ken Jehova ti amin a pakaseknanyo, pagdandanaganyo, ken kaririknayo.

“Napagballigiak daytoy a pannubok iti tulong ni Jehova. Sigurado a tulongannakto manen. Saanak a mabuteng kadagiti dumteng a pannubok.”—Salmo 118:6.