Idi Enero 18, 2021, sinentensiaan ti korte idiay Turkmenistan ni Brother Artur Yangibayev iti dua a tawen a pannakaibalud gapu ta saan nga ipalubos ti konsiensiana ti agsoldado. Daytoy ti maikadua a gundaway a nasentensiaan a maibalud gapu iti neutral a takderna.

Artur Yangibayev

• Nayanak: 1997 (Seydi)

• Pakasaritaanna: Ubing pay ni Artur idi naipasango kadagiti problema isu a napampanunotna no apay a nagkaro ti kinaawan hustisia iti lubong. Insaludsodna daytoy iti kabsatna a maysa a Saksi ni Jehova. Daytoy ti nakatignayanna nga agadal iti Biblia idi agtawen iti 13. Nabautisaran idi 2014

  Agtrabtrabaho ni Artur iti konstruksion ken agtartarimaan kadagiti apartment. Kuna dagiti nagannakna nga isu ket nasingpet ken responsable nga anak. Maresrespeto iti lugarda ta nasayaat ti reputasionna

Idi Agosto 8, 2016, naipan ni Artur iti pretrial detention facility gapu ta saan nga ipalubos ti konsiensiana ti agsoldado. Idi Agosto 30, nasentensiaan a maibalud iti dua a tawen iti correctional labor. Naikarona ti sentensiana idi Septiembre 2018.

Idi Disiembre 15, 2020, naayaban manen nga agsoldado. Di nagbayag kalpasanna, napalutpot iti prosecutor’s office ken nabilin nga isuratna no apay a saanna a kayat ti agsoldado.

Idi Disiembre 30, imbaga ti prosecutor’s office a nayulin ti darum maikontra kenkuana. Nakompiskar ti passport-na.

Imbaga ni Artur kalpasan ti damo a pannakasentensiana: “Ti Roma 8:37-39 ti nangpabileg iti pakinakemko nga awan ti makalapped kaniak nga agtalinaed a matalek ken Jehova.” Ammotayo nga iti tulong ni Jehova, maibturan manen ni Artur daytoy a pannubok iti biagna.