Idi Pebrero 24, 2022, sinakup ti Russia ti Ukraine. Adda nasurok a 129,000 a Saksi ni Jehova agraman dagiti annakda idiay Ukraine. Nangbukel ti sanga nga opisina iti 27 a Disaster Relief Committee (DRC) tapno maipaay ti tulong kadagiti kapammatiantayo. Kasta met, kas panangipakita iti Nakristianuan nga ayat, ar-aramiden dagiti kakabsat ti amin a kabaelanda tapno maipaayda ti praktikal ken emosional a tulong iti tunggal maysa ken kadagiti kaarrubada bayat daytoy narigat a tiempo.

Kaaduan a kakabsat ti nagtalinaed iti pagilian, ngem dadduma ti nagdesision a pumanaw iti lugarda. Na-stranded dagiti nagbakuit gapu iti atiddog a pila, dadduma ti immabut iti 30 a kilometro (18 mi), ken inkapilitan a naguray ti dadduma iti tallo wenno uppat nga aldaw sakbay a makalasatda iti customs. Iti lugar a nagkamanganda, bayat a nakapilada, binirok ida dagiti kapammatianda tapno maikkanda ida iti makan ken danum ken dadduma pay a praktikal a tulong. Idi nakaballasiwen dagiti kakabsat iti border dagiti asideg a pagilian, sinabet ida dagiti Saksi a nakaiggem iti jw.org sign, ken nakasaganada a mangipaay iti liwliwa ken praktikal a tulong.

• Makapaladingit, idi Marso 1, 2022, 1 a tuleng (deaf) a brother a taga-Kharkiv ti natay ken nakaro ti pannakadangran ti asawana bayat dagiti panagbomba

• 3 pay a sister ti nadangran

• Nasurok a 5,000 a kakabsat ti nangpanaw iti balbalayda

• 2 a balay ti interamente a nadadael

• 3 a balay ti nakaro ti dadaelna

• 35 a balay ti saan unay a nadadael

• 2 a Kingdom Hall ti nadadael

• Adu a kakabsat ti naawanan iti koriente, heater, koneksion ti telepono, ken danum

• 27 a DRC ti naapointaran idiay Ukraine

• 867 a kakabsat ti tinulongan ti DRC a makabirok iti nataltalged a pagyanan

• Ikagkagumaan dagiti DRC ti mangipaay kadagiti kangrunaan a suplay, kas iti makan ken danum

Dagiti naibaga a bilang ket naibasar iti kaaw-awat laeng a report.

Ikararagtayo nga agtultuloy koma a maaddaan dagiti kakabsattayo iti sirib ken pannakaawat tapno kabaelanda a sanguen dagiti di mapakpakadaan ken narigat a situasion ken maipakitada latta ti nainkabsatan nga ayat.—Proverbio 9:10; 1 Tesalonica 4:9.