Bayat a kumarkaro ti panaglalaban iti Donetsk Region idiay Ukraine, namin-adu a nagsublisubli idiay Kramatorsk ni Brother Mykola Bozhedomov tapno tumulong iti adu a pumanaw iti paggugubatan.

Ngem idi Abril 8, 2022, natay ni Mykola idi nabomba ti estasion ti tren idiay Kramatorsk, Donetsk Region.

Malaksid ken Mykola nga agtawen iti 58, maysa a sister ti karaman iti nasurok a 50 a natay. Kasta met, maysa a brother ti karaman iti nasurok a 100 a nasugatan. Nangngeg dagiti Saksi a nakalasat iti dayta nga iyaatake ti dua a makapleng a panagbettak agraman dagiti timmayab a shrapnel.

Imbaga ni Nina, nga asawa ni Mykola iti 32 a tawen: “Kanayon nga iyun-una ni lakayko ti interes ti dadduma. Kayatna unay a tulongan dagiti nataenganen ken masaksakit a kakabsat. Ngem kada agsubli idiay Kramatorsk, mas delikadon ti kasasaad. Dayta koman ti maudi a biahena.”

Nabautisaran dagitoy nga agassawa idi 1997. Adu a tawen a nagserbi ni Mykola kas matalek a panglakayen. Ipakpakita dagiti kakabsat ti ayat ken suportada ken Nina. Imbagana, “Nakatulong kaniak dagiti panangliwliwada iti daytoy a narigat a situasion.”

Imbaga pay ni Nina a naliwliwa babaen ti Kasuratan, nangnangruna ti Isaias 40:28-31. “Tultulongannak ni Jehova a mangpasubli iti pigsak.” Kunana, “Marikriknak ti ayat ni Jehova iti nagpaiduma a pamay-an. Mabasbasak laeng idi ti kasta nga ayat kadagiti publikasiontayo, ngem ita, marikriknakon a mismo dayta.”

Ikararagantayo ni Nina ken ti amin a natayan iti ipatpateg ti biag gapu iti gubat. Ammotayo nga itultuloy ni Jehova a saranayen ida.—Salmo 20:2.