Iti tulong ni Jehova, maib-ibturan da Sister Liudmyla Mozul ken Kateryna Rozdorska ti saem ken ladingit a resulta ti gubat. Dagiti assawada, a da Petro Mozul ken Dmytro Rozdorskyi, ket karaman kadagiti immuna a natay a Saksi ni Jehova gapu iti gubat idiay Ukraine. Makapaladingit, ta iti agdama, addan 34 a kakabsat a natay gapu iti gubat.

Nabautisaran da Petro ken Liudmyla idi 1994. Uppat a pulo ket tallo a tawendan nga agassawa.

“Inaldaw a makaaw-awatak kadagiti makaliwliwa a mensahe manipud kadagiti kakabsat,” imbaga ni Liudmyla. “Kanayondak a tawtawagan. Nakasangitak met idi nakaawatak iti makaliwliwa a surat manipud iti sangay iti Ukraine.”

Nangrugi ti gubat idi Pebrero 24, 2022. Ni Petro, nga agserserbi kas ministerial nga adipen iti sign-language a kongregasion, ket natay bayat nga ikagkagumaanda a sangapamiliaan ti pumanaw gapu iti nakaro a panagbomba idiay Kharkiv idi Marso 1, 2022.

Iti dayta nga aldaw, kalpasan ti sumagmamano nga aldaw a panagbomba, rinugian met a bombaen dagiti fighter jet ti siudad. Innala laeng ti pamilia ti bambanag a kasapulanda sada pimmanaw iti uneg ti 30 a minuto. Nagkadua ni Petro ken Liudmyla iti maysa a lugan. Nagkadua met ti anakna a ni Oleksii, ken ti asawana a ni Maryna, iti sabali a lugan. “Addakami iti dalan nga ayan dagiti kabalbalayan idi nagtinnag dagiti bomba iti aglawlawmi,” kuna ni Liudmyla. “Uray la nagunggon ti luganmi gapu iti panagbettak dagiti bomba.”

Ni Petro, nga agtawen iti 67, kinabigna ti manibela tapno saanna a madungpar ti lugan ni Oleksii, ngem kaskasdi a nakaro ti pannakadangranna. Naitarayda ken Liudmyla iti ospital ngem natay met laeng ni Petro. Nasugat ti saka ken tian ni Liudmyla gapu kadagiti metal a naggapu iti bomba. Saan a naan-ano da Oleksii ken Maryna. Naammuan laeng ni Liudmyla a natay ni Petro idi rimmuar iti ospital kalpasan ti tallo nga aldaw.

Imbaga ni Liudmyla: “No ad-adda a panunotek ti kinaimbag ken nagsayaat a panggep ni Jehova, ad-adda met a kumalma ti riknak. Siguradoak a makitakto manen ni lakayko inton baro a lubong, ket magagaranakon iti dayta a naragsak a tiempo.”

Walo a tawenen nga agassawa da Dmytro ken Kateryna. Idi timmawag manipud iti trabahona, ti maudi nga imbaga ni Dmytro ken Kateryna ket, “Dandaniakon agawid.”

Kalpasan ti sumagmamano nga oras, idi Marso 8, 2022, timmawag ti maysa a katrabahuan ni Dmytro ken Kateryna ket imbagana a nakabaddek ni lakayna iti bomba isu a naipan iti ospital. Natay ni Dmytro lima nga oras kalpasan a naopera.

Idi naammuan ni Kateryna a natayen ni Dmytro, imbagana: “Iti dayta a rabii, saan laeng nga iniggaman ni Jehova ti imak, inubbanak. Nariknak a nakaas-asideg ni Jehova kaniak.”

Ni Dmytro, nga agtawen iti 28, ket nabautisaran idi 2006 ken nagserbi a panglakayen iti Donetsk Region idiay Ukraine.

Kalpasan a naipumpon ni Dmytro, nagbiahe ni Kateryna iti 12 nga oras a mapan iti nataltalged a paset ti Ukraine. “Nakaawatak kadagiti pammaregta manipud kadagiti kakabsat iti Ukraine ken iti dadduma a pagilian. Impariknada nga ay-ayatendak unay, isu a naep-ep ti saem a marikriknak.”

Imbagana pay: “Maliwliwaak met no mangasabaak. . . . No kasla diakon kaya, ibagak dagiti bersikulo iti Biblia kas iti Filipos 4:6, 7.”

Agtalektayo nga agtultuloy ni Jehova a gubuayan ti bileg ken liwliwa para kadagiti ay-ayatentayo a kakabsat a natayan iti ipatpateg iti biag gapu iti gubat idiay Ukraine.—Salmo 61:1-3.