Nangrugi ti gubat idiay Ukraine idi Pebrero 24, 2022. Rinibu a Saksi ni Jehova ti adda pay laeng kadagiti lugar a nakaro ti panaglalaban. Adda grupo ti 21 a kakabsat manipud kadagiti siudad ti Kremenchuk ken Poltava idiay Ukraine a mangipakpakita iti pudno nga ayat kadagiti kakabsatda. Situtulokda a mapan iti paggugubatan tapno isalakanda dagiti kapammatianda ken mangitulod kadagiti relief supply.

Iti laeng innem a lawas, namin-80 a nagbiahe dagiti kakabsat iti agarup 50,000 a kilometro (31,000 mi) kadagiti lugar a nakaro ti panaglalaban kas iti Kharkiv, ken insalakanda ti dandani 400 a kakabsat.

Sipud nangrugida, nakaideliberdan iti 23 a tonelada a taraon, kasta met kadagiti agas, gasolina, ken dadduma pay a suplay. Sakbay ti tunggal panagbiaheda, siaannad a planuen dagiti kakabsat dagiti rutada tapno natalgedda ken maliklikanda dagiti lugar a nakaro ti panaglalaban. Agpaut iti 19 nga oras ti tunggal biahe gapu ta masapul a sumardeng dagiti kakabsat kadagiti checkpoint a sadiay a masukisok ti luganda.

Bayat ti panagbiaheda, agtatayab iti ngatuenda dagiti eroplano a pakigubat. Malablabsan dagiti kakabsat dagiti nabomba a building ken dagiti naperdi a tangke ken lugan. No dadduma, mariknada a magunggon ti daga gapu ta adda bimtak a bomba iti asideg.

Idi Abril 2, 2022, bayat nga agsagsagana ni Roman a mangideliber kadagiti suplay para kadagiti kakabsat idiay Kharkiv, nangrugi nga agtinnag kadagiti kalsada ti nakaad-adu a missile. Nagkamang isuna iti building iti asideg. Tallopulo a minuto kalpasanna, nakitana a nabomba ti kalsada a pagdalananna.

Kuna ni Volodymyr a maysa kadagiti nagboluntario a drayber maipapan iti dayta a delikado a situasion: “Kanayon nga ikarkararagmi ken Jehova nga ikkannakami iti sirib nga agdesision.”

Aggigian ni Oleksandr ken ni baketna a Valentyna idiay Kharkiv a kaduada dagiti nataenganen a nagannakna. Bayat ti panaglalaban, makitkitada dagiti panagbettak a 100 a metro (330 ft) laeng manipud iti tawa ti balayda. Gapu ta awan luganda, saanda a makapanaw.

Idi kuan, simmangpet dagiti kakabsat a mangisalakan kadakuada. “Agyamyamankami ken Jehova iti kararag ta tinulongandakami dagiti kakabsat,” kuna ni Oleksandr.

Ni Vasyl ken ni baketna a Natalia, ken ti tallo nga annakda naglemmengda iti sumagmamano nga aldaw iti basement ti balayda. Idi Pebrero 29, 2022, adda bimtak a bomba iti asideg ti balay a paglemlemmenganda. Gapu iti dayta, nadadael ti balayda. Malagip ni Vasyl ti makapleng a panagbettak ken nakitana a naiddep ti amin a silaw iti basement.

Idi medio simmardeng ti panaglalaban, immakar ti pamiliada iti basement ti kaarrubada a building. Idi Marso 3, 2022, nasarakan ida dagiti kakabsat ket impanda ida iti nataltalged a lugar iti pagilian.

Inyestoria ni Vasyl ti nariknana idi naisalakan ti pamiliana ken nakadanonda iti nataltalged a lugar: “Agyamyamankami unay ken Jehova. Iti umuna a gundaway, kalpasan ti kasla nakaad-adu a lawas a panagdandanagmi, makapangrabiikami met laengen a saanmin a pakadanagan ti kinatalged dagiti annakmi.”

Inlawlawag ni Oleksandr, a maysa kadagiti drayber, a ti panangtulong kadagiti kakabsat ket ebidensia iti panagkaykaysa ti ili ni Jehova. Kunana: “Ad-adda a nakitak a talaga nga ipatpateg ni Jehova ti ilina. Maragragsakanak unay a makakitkita iti nakaragragsak a rupa dagiti kapammatiak.”

Agyamantayo kadagitoy natutured a kakabsat, ken ikararagtayo ken Jehova a bendisionanna ti kinamanagsakripisioda.—Roma 12:10.