Gapu iti agtultuloy a panagbomba idiay Ukraine, maipaspasango dagiti kakabsat idiay Mariupol, Kharkiv, Hostomel, ken dadduma pay a siudad iti narigat a kasasaad. Dadduma kadakuada ti saan a nakapanaw iti basement wenno kadagiti nagkamanganda iti agarup makalawas. Bassiten ti suplayda a taraon, ken manmano nga adda koriente, Internet, ken signal ti selponda isu a narigatda a kontaken dagiti kakabsat.

Makapaladingit, natay ni Brother Dmytro Rozdorskyi, nga agtawen iti 28 ken panglakayen iti Myrnohrad, gapu kadagiti sugatna kalpasan a nakabaddek iti bomba. Ikararagantayo dagiti kakabsat a natayan iti ipatpateg iti biag ken dagidiay adda kadagiti lugar a nakaro ti panagbomba.—2 Tesalonica 3:1.

Dagitoy a bilang manipud Ukraine ket naibasar iti report agingga idi Marso 7, 2022:

• 2 a kakabsat ti natay

• 8 a kakabsat ti nadangran

• 20,617 a kakabsat ti nangpanaw iti balbalayda ken nagkamang iti nataltalged a lugar iti pagilian

• 25 a balay ti interamente a nadadael

• 29 a balay ti nakaro ti dadaelna

• 173 a balay ti saan unay a nadadael

• 5 a Kingdom Hall ti nadadael

• 27 a Disaster Relief Committee (DRC) ti tumultulong idiay Ukraine

• 6,548 a kakabsat ti tinulongan ti DRC a makabirok iti nataltalged a pagyanan

• 7,008 a kakabsat ti nagkamang iti dadduma a pagilian ken tultulongan dagiti kakabsat sadiay

• 1 nga Assembly Hall ken agarup 30 a Kingdom Hall idiay western Ukraine, kas iti Chernevtsi, Ivano-Frankivsk, Lviv, ken dagiti rehion iti Transcarpathian, ti naisagana tapno mapagyanan dagiti kakabsat a nagbakuit