Saan a nagsardeng dagiti kakabsattayo idiay Ukraine a tumulong kadagiti kapammatiantayo. Ipakpakitada ti di agimbubukodan nga ayat iti maysa ken maysa.

Ni Sister Olena ket agtawenen iti 81. Idi Hunio 6, sumagmamano laeng a metro manipud iti balayna ti bimtakan ti maysa a bomba. Dinadael dayta ti balay ti kaarrubana, ken nagresulta iti abut a pito a metro (23 ft) ti kaunegna. Nagpigsa ti panagbettak ti bomba nga uray la nakaro ti pannakadadael ti balay ni Sister Olena.

Imbagana: “Matmaturogak idi narba ti diding iti uluanak. Nakasipsipnget ken nagpuskol ti tapok. Agkaiwara dagiti nabuong a sarming ken batbato. Agyamyamanak ken Jehova ta sibibiagak.” Bimmisita ken Sister Olena dagiti kakongregasionna, sumagmamano a minuto laeng kalpasan ti panagbomba, a pakairamanan ti kabsat a nakaro met ti pannakadadael ti balayna. Intuloy ni Sister Olena: “Idi simmangpet dagiti kakabsat, nakigtot ken dida ammo ti ibagada. Ngem naparegtaak iti kaaddada. Makaparagsak ta addada iti sibayko.”

Imbaga ni Serhii, a maysa a panglakayen a regular a bumisbisita ken Sister Olena a kadua dagiti agtutubo iti kongregasionda: “Idi naammuak nga adda bimtak a bomba iti asideg ti balay ni Sister Olena, permi ti buteng ken danagko. Saak la nabang-aran idi nakitak a nagasgasan laeng ken saan a nakaro ti pannakadangranna. Nakaskasdaaw ta ti immuna a sinapul ni Sister Olena kalpasan a nadadael ti balayna ket ti publikasion a naawatna sumagmamano nga aldaw sakbayna.”

Makaparagsak ta naibirokan dagiti kabagianna iti baro a balay. Agtultuloy a tultulongan dagiti kakongregasionna, ken inaldaw a konkontaken isuna dagiti panglakayen. Inggatangan dagiti kakabsat iti hearing aid tapno mabenepisiaran kadagiti gimong. Kunana: “No dadduma, agkakapsutak, ngem mapabpabilegak kadagiti gimong. Kanayon a tawtawagandak dagiti kakabsat, ket agyamyamanak unay iti dayta.”

Inyestoria ti maysa nga agassawa ti kapadasanda idi nagkamangda iti basement ti maysa a Kingdom Hall a kadua ti 200 pay a kakabsat. Insurat ti asawa a babai: “Bilibak iti naayat a panangaywan dagiti panglakayen. Nalagipko kadakuada ni David, a nangirisgo iti biagna idi nakilaban iti leon ken oso tapno maispal dagiti karnero. Inrisgo met dagiti panglakayen nga adda iti basement ti biagda tapno makaalada iti makan ken danum, kasta met iti gas tapno adda pagsilawmi. Gapu iti dayta, makapaggigimongkami ken adda taripnongmi para iti panangasaba. Uray madama ti panagbomba, regular a bisbisitaen dagitoy a panglakayen dagiti kakabsat a nagtalinaed iti balayda tapno itulodanda ida iti makan ken danum ken tapno liwliwaenda ida. Nauneg ti panagraemko kadagitoy a panglakayen. Sakbay dagitoy a pasamak, am-ammok ida kas mannursuro ken manangaskasaba, ngem ita kas mapangnamnamaan a pastor. Agyamyamanak unay ta nagsayaatda nga ulidan iti kinatured, panangaywan, ken kinamapangnamnamaan!”

Nagsurat ti maysa a kongregasion idiay Ukraine iti sangay ti Ukraine maipapan kadagiti mangidadaulo iti trabaho a panangsaranay. Imbagada: “Agyamyamankami unay. Masmasdaawkami iti panangaywan ni Jehova kadakami babaen kadagiti kapammatiantayo. Talaga a nariknami ti imbaga ni Jesus: ‘Maammuanto ti amin a dakayo dagiti adalak—no agiinnayatkayo.’”—Juan 13:35.

Dagiti bilang iti baba manipud Ukraine ket naibasar iti report agingga idi Hunio 21, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 42 a kakabsat ti natay

• 83 a kakabsat ti nadangran

• 31,185 a kakabsat ti nangpanaw iti lugarda

• 495 a balay ti interamente a nadadael

• 557 a balay ti nakaro ti dadaelna

• 1,429 a balay ti saan unay a nadadael

• 5 a Kingdom Hall ti interamente a nadadael

• 8 a Kingdom Hall ti nakaro ti dadaelna

• 34 a Kingdom Hall ti saan unay a nadadael

• 27 a Disaster Relief Committee (DRC) ti tumultulong idiay Ukraine

• 52,348 nga indibidual ti tinulongan ti DRC a makabirok iti nataltalged a pagyanan

• 23,433 a kakabsat ti nagkamang iti dadduma a pagilian ken tultulongan dagiti kakabsat sadiay