Iti intero a Ukraine, naragsakan dagiti kakabsat iti pannakaisubli ti panangasaba iti publiko ken adu ti positibo a resulta dayta. Inreport dagiti manangaywan iti sirkito ken dagiti panglakayen nga adu ti naragsakan iti pannakaisubli dagiti literature cart-tayo ken imbaga pay ti dadduma a tattao a kailiwda a makita dagiti Saksi ni Jehova iti lugarda.

Nagdesision ni Tatiana, a paset ti kongregasion ti Serhiivka iti rehion ti Odesa, a bisitaen dagiti nakasaritana sakbay ti pandemia. “Manipud iti rugi, nakitakon ti pamendision ni Jehova iti panagreggettayo nga agsubli iti ministerio.” Naminsan, binisitana ti babai a saanna idi a kayat ti agpayadal iti Biblia sakbay ti pandemia ngem magagaran itan a makisarita ken kayatnan ti makipagadal iti Biblia. Imbaga ni Tatiana, “Kasapulak a bisitaen ti amin a sarsarungkarak tapno saggaysaek nga awisen ida nga agadal iti Biblia!”

Da Yevheniy ken ni Lilia ket dati a taga-Mariupol. Kasapulan idi a panawanda ti balayda ket agnaedda iti nataltalged a lugar iti Ukraine. Regular a makipaspasetda iti panangasaba. Imbagada a nakatulong ti ministerio tapno saanda a mapanunot dagiti problemada. Kunada: “Ammomi a saanen a kas iti dati ti biagmi. Nagrigat ti mangabaruanan, ngem ammomi a saan nga ababa ti ima ni Jehova. Tultulongannakami ti espirituna ken nakasagana dagiti kakabsat a tumulong kadakami a mangirugi manen iti biagmi iti baro a lugar.”

Iti dadduma a paset ti pagilian, makaipapaay met dagiti kakabsattayo iti panangsaksi babaen kadagiti nasayaat nga aramidda. Kas pagarigan, maysa a grupo dagiti kakabsattayo iti siudad ti Mykolaiv ti timmulong iti maysa nga internasional nga organisasion a mangipapaay iti saranay tapno matarimaan ken mausar ti maysa a warehouse para iti relief supply. Tinarimaan dagiti kakabsat ti water system, nangaramidda kadagiti kabinet, ken inyempakeda ti sumagmamano a tonelada ti relief supply. Idi napan kinita ti pannakabagi ti organisasion ti inaramidda, uray la nakalua. Kunana, “Diak ninamnama a kastoy kasayaat ti inaramidyo.”

Nupay maipaspasango dagiti kakabsattayo idiay Ukraine iti narigat a kasasaad, naragsakda latta gapu ta aktiboda iti ministerio ken ‘agar-aramidda iti nasayaat.’—Galacia 6:9.

Dagiti bilang iti baba manipud Ukraine ket naibasar iti report agingga idi Hulio 13, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 42 a kakabsat ti natay

• 97 a kakabsat ti nadangran

• 28,683 a kakabsat ti nangpanaw iti lugarda

• 524 a balay ti interamente a nadadael

• 588 a balay ti nakaro ti dadaelna

• 1,554 a balay ti saan unay a nadadael

• 5 a Kingdom Hall ti interamente a nadadael

• 10 a Kingdom Hall ti nakaro ti dadaelna

• 36 a Kingdom Hall ti saan unay a nadadael

• 27 a Disaster Relief Committee (DRC) ti tumultulong idiay Ukraine

• 52,947 nga indibidual ti tinulongan ti DRC a makabirok iti nataltalged a pagyanan

• 23,863 a kakabsat ti nagkamang iti dadduma a pagilian ken tultulongan dagiti kakabsat sadiay