Manipud Hulio 23 agingga iti 31, nabautisaran ti dadduma nga agibumbunannag nga adda idiay Ukraine ken kadagiti pagilian a nagkamanganda bayat ti 2022 a Sapulenyo ti Talna! a Kombension. Idi Agosto 2, addan 1,113 a taga-Ukraine ti nabautisaran. Imbaga ti maysa a kabsat a taga-Ukraine: “Uray ti gubat dina mapasardeng ti trabaho a panagaramid iti adalan kas iti inkari ni Jesus nga, ‘addaak kadakayo iti amin nga al-aldaw.’”—Mateo 28:20.

Maragsakankami a mangipadamag kadagitoy a kapadasan.

Ni Natalia a taga-Kreminna, Luhansk Region, ket agtawen iti 63. Nakipagadal kadagiti Saksi ni Jehova a kadua ti dua a balasangna idi 1990’s. Rimmang-ay iti naespirituan ti babbalasangna ken nagpabautisarda, ngem saan a kasta ti napasamak kenkuana. Idi nangrugi ti gubat, inkuyog ti maysa a pamilia dagiti Saksi ni Jehova ni Natalia iti natalged a lugar a nagbakuitanda. Pinadagusda ni Natalia iti maysa a Kingdom Hall iti Ivano-Frankivsk.

Kuna ni Natalia: “Kalpasan ti adu a nakaam-amak a panangbomba, kasla nalipatakon ti umisem. Ngem pinakitaandak dagiti kakabsat iti pudpudno a pannakaseknan. Saanko a ninamnama nga ipaayda dagiti kasapulak. Iti dayta a tiempo, nariing manen ti ayatko ken Jehova. Kanayonkon a basbasaen ti Biblia. Maysa a sister ti nangawis kaniak nga agadal iti Biblia babaen ti libro nga Agbiagka a Naragsak iti Agnanayon! Ibilangko isuna a regalo ni Jehova kaniak.” Innayon ni Natalia: “Nakaragragsakak itan kas maysa a bautisado a Saksi ni Jehova. Kayatko ti agbiag maitunos iti kangrunaan a bilin nga, ‘ayatem ni Jehova a Diosmo iti amin a pusom ken amin a kararuam ken amin a panunotmo.’”—Mateo 22:37.

Ni Olia a taga-Cherkasy ket di bautisado nga agibumbunannag idi nangrugi ti gubat. Idi Marso 6, nagkamang idiay Poland a kadua ti anakna ken apokona. Imbagana: “Simmangpetkami sadiay a go bag laeng ti awitmi, ngem inaywanandakami a tallo dagiti kakabsat. Gapu iti daytoy, kombinsidoak nga adda panagkaykaysa ti organisasion ni Jehova ken iturturong dayta ti espirituna. Kalpasan a napadasak dagita, mas determinadoak a mangidedikar iti biagko ken Jehova. Tinulongannak kadagiti karirigatan a paset ti biagko, ket ita kayatkon ti agserbi kenkuana ken ipakita ti panagyamanko.”

Ni Yulia a taga-Donetsk Region ket agtawen iti 18. Dimmakkel iti Saksi a pamilia ngem saan a nagpabautisar. Inyestoriana ti napadasanna idi karugrugi ti gubat. Imbagana: “Nakaiddaak iti datar, napanunotko a mabalinak a matay aniaman nga oras. Nadadael ti balaymi ken dagiti balbalay iti aglawlawmi ngem nakalasatkami. Gapu iti napadasak ken panagkarkararag ken panangpampanunotko kadagiti kualidad ni Jehova, dimmekket ti relasionko kenkuana, ken saanakon a nagpangadua a mangidedikar iti biagko ken Jehova. Impakita ni Jehova a nakasingsinged kaniak babaen ti panangsungbatna kadagiti kararagko. Adda laeng idi pannakaammok maipapan iti Dios, ngem ita ay-ayatekon.” Nabautisaran ni Yulia idi Hulio 23.

Idi nangrugi ti gubat, nagkamang ti 11 ti tawenna a ni David ken ti pamiliana idiay Germany. Sipud idi siam ti tawenna, di bautisadon nga agibumbunannag. Ar-aramidenna ti amin tapno magaw-atna dagiti kalatna iti panagserbi ken Jehova. Imbagana: “Nagdesisionak nga agpabautisar gapu ta ay-ayatek ni Jehova ken kayatko ti agbalin a gayyemna. Idi nabautisaranak, nakasangitak gapu iti ragsak ta pasetakon iti nakasaysayaat a pamilia ni Jehova. Kaykayatko nga ibaga ti maipapan ken Jehova ken ti panggepna para kadagiti tattao, isu a ti sumaruno a goal-ko ket agpayunir. Kayatko met a pagserbian dagiti kakabsat iti kongregasion ken sapay koma ta agbalinakto a ministerial nga adipen. Ti kadakkelan a goal-ko ket ti panagserbi iti Bethel. Goal-kon dayta manipud idi binisitami ti branch office idiay Lviv idi 2018.”

Ni Olena a taga-Kyiv ket nagbalin a di bautisado nga agibumbunannag idi 2011. Ngem nagbalin a di aktibo iti 10 a tawen. Idi 2020, kinontak dagiti panglakayen iti kongregasionna ken inikkanda iti broshur nga Agsublika ken Jehova. Imbagana: “Intuloyko manen ti agadal iti Biblia ken makigimong. Ngem di nagbayag, nagsardengak manen. Bayat ti gubat, sinungbatan ni Jehova dagiti kararagko, ken nabigbigko a prinotektarannak ni Jehova, impakitaannak iti ayat, ken inikkannak iti talna ti panunot. Nagkamangak idiay Romania ken nasarakak dagiti Saksi. Ti ayat ken panangaywan a naawatko kadagiti kakabsat ket kas iti naimeng nga ules nga inkagay ni Jehova kaniak.” Nabautisaran ni Olena idi Hulio 23. Imbagana: “Agyamyamanak ken Jehova ta nakaan-anus kaniak. Ammok itan nga ‘adda pigsak a mangsango iti amin a banag gapu iti daydiay mangpabpabileg kaniak.’”—Filipos 4:13.

Dagiti bilang iti baba manipud Ukraine ket naibasar iti report agingga idi Agosto 2, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 43 a kakabsat ti natay

• 97 a kakabsat ti nadangran

• 22,568 a kakabsat ti nangpanaw iti lugarda

• 586 a balay ti interamente a nadadael

• 613 a balay ti nakaro ti dadaelna

• 1,632 a balay ti saan unay a nadadael

• 5 a Kingdom Hall ti interamente a nadadael

• 10 a Kingdom Hall ti nakaro ti dadaelna

• 37 a Kingdom Hall ti saan unay a nadadael

• 27 a Disaster Relief Committee (DRC) ti tumultulong idiay Ukraine

• 53,836 nga indibidual ti tinulongan ti DRC a makabirok iti nataltalged a pagyanan

• 24,867 a kakabsat ti nagkamang iti dadduma a pagilian ken tultulongan dagiti kakabsat sadiay