NOBIEMBRE 16, 2022
UKRAINE
UPDATE #13 | Agar-ari ti Nainkabsatan nga Ayat iti Laksid ti Agtultuloy a Krisis Idiay Ukraine
Panagsubli iti Panangasaba iti Binalaybalay
Idi Agosto 2022, naipakaammo a mabalin manen ti in-person a mangasaba kadagiti natalged a lugar idiay Ukraine. Magagaran dagiti kakabsat a mangasaba. Nakitada nga adu a tattao ti interesado a dumngeg iti mensahe ti Biblia. Imbaga ti maysa a mayat nga agpayadal iti Biblia: “Idi nakitak ti nakabutbuteng ken ti nakaro a rigat nga epekto ti agdama a gubat, patiek a ti laeng Dios ti makasolbar iti problema dagiti tattao.” Ti sumaganad ket kapkapadasan iti ministerio.
Medio madanagan ni Ruslan manipud iti kongregasion ti Lanivtsi a mangasaba manen iti binalaybalay. Inkararagda ken baketna a patureden koma ida ni Jehova ken iturongna ida kadagiti tattao nga interesado iti nasaysayaat a masakbayan. Nasdaaw dagitoy nga agassawa ta iti uneg laeng iti dua nga oras a panangasabada, addan walo a tattao a nakasaritada nga interesado nga agpayadal iti Biblia.
Bayat a mangaskasaba ni Olha manipud iti kongregasion ti Kremenets, adda lalaki nga immasideg kenkuana ken iti kaduana. Nagsaludsod no makisarsaritada kadagiti tattao maipapan iti Sao ti Dios. Kalpasanna, inlawlawagna: “Agsigsigarilioak ken adda problemak iti arak. Ammok a sumangoakto iti Dios. Ket iti dayta nga oras, diak kayat a kastoyakto pay laeng.” Nayurnos nga iyadalan iti Biblia dagiti brother iti dayta a lugar.
Bayat a mangaskasaba iti maysa a purok ni Vasyl ken dagiti kagrupona manipud iti kongregasion ti Lviv-Riasne-Skhidnyi, natandaananna ti balay ti maysa a babai a nakasaritana tawtawenen ti napalabas. Nalagipna a daytoy a babai ket makaung-unget idi ken dina kayat ti makisarita kadagiti Saksi ni Jehova. Ngem kayatna latta ti agtuktok iti ridaw ken iyopreser ti panagadal iti Biblia. Nasdaaw ta linuktan dayta a babai ti ridaw ken imbagana a kayatna a maawatan ti Nasantuan a Kasuratan. Inawatna ti panagadal iti Biblia, ken nayurnos a masarungkaran.
Ni Serhii, manipud iti kongregasion ti Illintsi, ket nabautisaran idi 2021 ngem saanna pay pulos napadasan ti mangasaba iti binalaybalay. Agnerbios, isu nga inwayaanna ti agsagana. Imbaga ni Serhii: “Namin-anok a binuya dagiti video ti pagtuladan iti pannakisarita. Isu a ti kasapulak laengen ket tured.” Makaparagsak ta imbagana a nasuktan ti danagna iti napalaus a ragsak ta naaddaan iti gundaway a mangibaga iti sabsabali ti naimbag a damag.
Kasta met laeng ti narikna ni Nikol manipud iti kongregasion ti Rozdil a nagbalin a di bautisado nga agibumbunannag idi Agosto 2022. Imbagana: “Permi ti nerbiosko ken mabutengak iti in-person a panangasaba. Ngem idi napadasak dayta, nakamaymayat gayam nga ibaga ti maipapan ken Jehova iti personal!”
Dua a sister a mangaskasaba iti binalaybalay
Dagiti bilang iti baba manipud Ukraine ket naibasar iti report agingga idi Nobiembre 11, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.
Epektona Kadagiti Kakabsat
46 a kakabsat ti natay
97 a kakabsat ti nadangran
12,569 a kakabsat ti agdama a nangpanaw iti lugarda
590 a balay ti interamente a nadadael
645 a balay ti nakaro ti dadaelna
1,722 a balay ti saan unay a nadadael
6 a Kingdom Hall ti interamente a nadadael
19 a Kingdom Hall ti nakaro ti dadaelna
63 a Kingdom Hall ti saan unay a nadadael
Naited a Tulong
27 a Disaster Relief Committee (DRC) ti tumultulong idiay Ukraine
53,948 a kakabsat ti tinulongan ti DRC a makabirok iti nataltalged a pagyanan
25,983 a kakabsat ti nagkamang iti dadduma a pagilian ken tultulongan dagiti kakabsat sadiay