Agarup 3,000 a balay dagiti Saksi ni Jehova ti adda dadaelna wenno interamente a nadadael sipud nangrugi ti gubat idiay Ukraine idi Pebrero 2022. Idi Agosto, iti panangiwanwan ti Disaster Relief Department (DRD) ken ti Local Design/Construction Department, rinugian dagiti kakabsat idiay Ukraine ti panangtarimaan kadagiti adda dadaelna a balay kadagiti lugar a natalged nga aramiden dayta. Karaman iti dayta ti panangsukat kadagiti nadadael nga atep ken tawtawa ken dadduma pay a babassit a panangtarimaan. Iti dadduma a situasion, no interamente a nadadael ti balay, ti garahe wenno paglinongan ti maaramid a simple a balay. Nalpasen ti 37 a proyekto a panagibangon, ken 48 pay ti madama a maar-aramid.

Nagrigat ti agtarimaan kadagiti balbalay bayat dagitoy a nariribuk a tiempo. Ngem saan a nagsardeng dagiti kakabsat a tumulong iti trabaho a panangsaranay. Imbaga ni Sister Svitlana, nga agtawen iti 70, a taga-Velyka Dymerka, Kyiv Region: “Kurang ti kuartak a pagpatarimaanko iti atep ken sango ti balayko. Ngem sinorpresanak ni Jehova. Immay dagiti kakabsat ket tinarimaanda ti balayko iti uneg laeng ti tallo nga aldaw.”

Imbaga ni Sister Nadiia a taga-Horenka, Kyiv Region, a ti trabaho a panangsaranay ket nakatulong kadakuada iti ministerio. Kunana: “Nagdakkel a panangsaksi ti trabaho a panagtarimaan. Uray dagiti saanko nga am-ammo ibagbagada ti maipapan iti pudno nga ayat nga ipakpakita dagiti Saksi ni Jehova. Masmasdaawda ta immaydak tinulongan dagiti kapammatiak.”

Uray dagidiay naawanan iti balay ket tumultulong, kas kada Yevhen ken Tetiana. Interamente a nadadael ti balay dagitoy nga agassawa idi natamaan iti bomba. Imbes a sangkapanunotda ti napukawda, nakagaggagetda a tumulong kadagiti kapammatianda. “Kanayon a kayatmi ti tumulong iti dadduma,” kuna ni Yevhen. “Nakatulong ti panagserbimi iti sabsabali tapno makayami ti bukodmi a problema.”

Umasping iti dayta, ti sister a ni Lidiia ket natignay a tumulong iti panangsaranay kalpasan a tinarimaan dagiti kakabsat ti balayna idiay Hostomel, Kyiv Region. Imbagana: “Iti uneg ti dua a lawas, immabut iti 16 a kakabsat ti nagtrabaho a mangtarimaan iti balayko. Kasla addaakon iti baro a lubong. Ita, kayatko met ti tumulong iti sabsabali.”

Maysa a miembro ti Komite ti Sangay iti Ukraine ti nabiit pay a bimmisita kadagiti lugar nga adda panangsaranay tapno paregtaenna dagidiay naawanan iti balay. Imbagana: “Nagsayaaten ti panangipakita dagiti kakabsat ditoy Ukraine iti ayatda iti maysa ken maysa. Ngem gapu iti gubat, lallalo pay a dimmekket ti relasionda iti maysa ken maysa. Makaparagsak a makita a gapu iti tulong a naipaay kadagiti ipatpategtayo a kakabsat, ad-adda a rimmegtada iti ministerio ken iti ‘panangyebkas iti panagyamanda iti Dios,’ kas nadakamat iti 2 Corinto 9:12.”

Dagiti bilang iti baba manipud Ukraine ket naibasar iti report agingga idi Disiembre 20, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 47 a kakabsat ti natay

• 97 a kakabsat ti nadangran

• 11,477 a kakabsat ti agdama a nangpanaw iti lugarda

• 590 a balay ti interamente a nadadael

• 645 a balay ti nakaro ti dadaelna

• 1,722 a balay ti saan unay a nadadael

• 7 a Kingdom Hall ti interamente a nadadael

• 19 a Kingdom Hall ti nakaro ti dadaelna

• 68 a Kingdom Hall ti saan unay a nadadael

• 26 a Disaster Relief Committee (DRC) ti tumultulong idiay Ukraine

• 54,212 a kakabsat ti tinulongan ti DRC a makabirok iti nataltalged a pagyanan

• 26,892 a kakabsat ti nagkamang iti dadduma a pagilian ken tultulongan dagiti kakabsat sadiay