Sipud idi Disiembre 26, 2022, nageskuela manen iti Pioneer Service School (PSS) dagiti regular ken special pioneer iti Ukraine kadagiti lokasion a natalged nga aramiden dayta. Depende iti kasasaad iti lugarda, mabalin nga umatender dagiti payunir, in person wenno via Zoom. Uray no adda dagiti problema kas iti panagbomba, brownout, pinansial a problema, ken agpukawpukaw a koneksion iti Internet, inkagumaan dagiti kakabsat ti umatender tapno umawat iti espesial a pannakaisuro. Kas resultana, adu a naespirituan a bendision ti naawatda.

Imbaga ni Natalia a taga-Kryvyi Rih: “Ti eskuelaan ket kasla salbabida. Tinulongannak tapno saanak a malmes kadagiti pakadanagan ken pagbutbutngak.” Innayon met ni Anastasia a taga-Chernivtsi: “Gapu iti eskuelaan, nakombinsirak a dungdungnguennak ni Jehova. Nakaad-adu dagiti nakabutbuteng a napasamak iti napalabas a tawen, ngem ti eskuelaan ti eksakto a kasapulak. Naparegtaak a mangaramid iti amin a kabaelak tapno bendisionannak ni Jehova.”

Idi damo, madanagan ni Svitlana, a payunir a taga-Kitsman, idi naawatna ti surat nga umatender iti PSS. Inlawlawagna: “Imbagak ken Jehova ti amin a pakadanagak, agraman ti pinansial a problemak. Nagtalekak kenkuana ket awan ti nagbabawyak. Nariknak ti ayat ken panangaywan ni Jehova.” Gapu iti ar-aramiden ni Svitlana, natignay ni lakayna a saan a Saksi ni Jehova a makikadua a makigimong.

Namindua a masapul nga umakar dagiti estudiante a taga-Zhytomyr iti underground a pagkamangan gapu iti pakdaar nga adda panagbomba. Nagusarda iti dalikan a mangpapudot iti kuarto, isu a naitultuloyda ti klase. Uray naipasangoda kadagita a problema, imbaga ni Valentyna, a nabiit pay nga immakar idiay Zhytomyr: “Diak malipatan daytoy a panageskuelak. Kaslaak la adda iti sirok dagiti nabileg a payak ni Jehova.”

Kas iti adu a pagilian, permi ti ragsak dagiti payunir idiay Ukraine idi naammuanda a naksayanen ti makalikaguman nga oras. Kalpasan a naammuan ni Yulia ti pakaammo, kunana: “Lalo manen nga inayatko ni Jehova. Itay agsapa laeng a nagkararagak ken Jehova ket impakpakaasik kenkuana a palubosannak nga agtultuloy a payunir. Diak ammo no kasanona a sungbatan ngem ammok a sungbatannak. Kalpasan a naammuak a naksayanen ti makalikaguman nga oras, ad-adda manen a nariknak a talaga nga ipatpategnak ni Jehova. Daytoy a kabaruan a damag ket kasla nagimas a dessert kalpasan ti panageskuelami.”

Dagiti bilang iti baba manipud Ukraine ket naibasar iti report agingga idi Enero 24, 2023. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 47 a kakabsat ti natay

• 97 a kakabsat ti nadangran

• 8,953 a kakabsat ti agdama a nangpanaw iti lugarda

• 590 a balay ti interamente a nadadael

• 645 a balay ti nakaro ti dadaelna

• 1,722 a balay ti saan unay a nadadael

• 8 a Kingdom Hall ti interamente a nadadael

• 17 a Kingdom Hall ti nakaro ti dadaelna

• 76 a Kingdom Hall ti saan unay a nadadael

• 26 a Disaster Relief Committee (DRC) ti tumultulong idiay Ukraine

• 46 a balay ti natarimaan

• 5 a Kingdom Hall ti natarimaan

• 54,445 a kakabsat ti tinulongan ti DRC a makabirok iti nataltalged a pagyanan

• 27,655 a kakabsat ti nagkamang iti dadduma a pagilian ken tultulongan dagiti kakabsat