Kadagiti lugar nga apektado iti nakaro a panaglalaban, kas iti Mariupol, awan ti koriente wenno heater, ken kanayon met nga awan ti signal ti telepono ken Internet. Nadadael dagiti tawa ti adu a balay. Bassit ti suplay a makan ken danum. Nasurok a 2,500 a kakabsat ti saan a makapanaw idiay Mariupol. Iti dadduma a siudad, kas iti Bucha, Chernihiv, Hostomel, Irpin, Kyiv, ken Sumy, naikkan dagiti tattao iti gundaway a pumanaw iti lugarda. Isu nga adu a kakabsat ti nakapagkamang iti nataltalged a lugar.

Maysa a panglakayen ken payunir nga agtawen iti 36 nga aggigian idiay Hostomel, ti nakapanaw a kadua ti asawana ken dagiti nagannakna. Inyestoriana ti kapadasanda idi nangrugi ti panaglalaban iti siudadda:

“Mangmangngegko dagiti helicopter iti batog ti balaymi. Kanayon nga adda dagiti lugan ti soldado kadagiti kalsada. Sinerrek dagiti soldado ti balaymi bayat nga addakami iti basement. Maysa kadakuada ti namin-ano a nagpaltopaltog iti basement-mi. Natamaan iti bala ti go bag ni nanangko ngem awan met ti nasaktan kadakami. Siguro tallo wenno uppat nga oras a saankami a nagkutkuti wenno nagun-uni bayat nga agbibinnomba ken agpipinnaltogda. . . . Kabigatanna, idi pumampanawkamin, adda naglalaban iti asidegmi. Adda dagiti tangke iti kalsada . . . Nakadeldelikado, ngem mas delikado no saankami a pumanaw.

“Nagdakkel ti nagbalbaliwan ti biagmi gapu kadagitoy a pasamak. Nasursuromi no kasano nga iyaplikar ti adu a prinsipio ti Biblia. Kas pagarigan, no kasano ti saan a madanagan iti sumaruno nga aldaw, agbalin a kontento kadagiti kangrunaan a kasapulan, ken no kasano ti agtalek ken Jehova iti karirigatan a situasion.”

Ammotayo a makitkita ni Jehova a Dios ti amin a narigat a situasion a pakaipaspasanguan dagiti kakabsattayo idiay Ukraine. Saanna ida a pulos baybay-an.—2 Pedro 2:9.

Dagitoy a bilang manipud Ukraine ket naibasar iti report agingga idi Marso 10, 2022:

• 2 a kakabsat ti natay

• 8 a kakabsat ti nadangran

• 25,407 a kakabsat ti nangpanaw iti balbalayda ken nagkamang iti nataltalged a lugar iti pagilian

• 25 a balay ti interamente a nadadael

• 59 a balay ti nakaro ti dadaelna

• 222 a balay ti saan unay a nadadael

• 7 a Kingdom Hall ti nadadael

• 27 a Disaster Relief Committee (DRC) ti tumultulong idiay Ukraine

• 10,566 a kakabsat ti tinulongan ti DRC a makabirok iti nataltalged a pagyanan

• 9,635 a kakabsat ti nagkamang iti dadduma a pagilian ken tultulongan dagiti kakabsat sadiay