Maladingitankami a mangireport a dua a kakabsattayo a babbai ti natay bayat dagiti panagbomba iti siudad ti Mariupol. Iti agdama, adda pay nasurok a 2,000 a kakabsat a saan a makapanaw iti siudad gapu iti nakaro a panaglalaban. Bayat ti naglabas nga al-aldaw, agarup 150 a Saksi ti nakapanaw iti siudad. Pinadas dagiti kakabsat a boluntario iti Disaster Relief Committee (DRC) ti mangipan iti relief supply idiay Mariupol ngem nagsublida idi pinaltopaltoganda ida agraman ti dadduma pay a convoy a mangipan iti tulong. Adda bimtak a bomba iti lote ti maysa a Kingdom Hall ken maysa nga Assembly Hall. Agarup 200 a kakabsat ti adda idi iti basement ti Kingdom Hall iti dayta a tiempo. Awan ti nasaktan kadagiti kakabsat, ngem nadadael dagiti luganda, isu a lalon a marigatanda a pumanaw iti siudad.

Inyestoria ti maysa a panglakayen (makita ti piktiurna iti baba) a nakapanaw iti Mariupol a kadua ti pamiliana: “Napukawmi ti apartment-mi, trabahomi, ken saanmin a makontak dagiti gagayyemmi. Nagbalin nga innem nga aldaw ti maysa laeng koma nga aldaw a biahemi. Bayat a pumampanawkami [a rummuar iti siudad], nakitami nga agas-asuk dagiti di pay bimtak a bomba iti dalan. Iti panagbiahemi, tinulongandakami dagiti kakabsat a makabirok iti makan ken pagdagusanmi. Nariknami nga inaywanannakami ni Jehova, ti naayat nga Amatayo . . . Nakombinsirkami a naan-anay nga agtalek ken Jehova.”

Dadduma a Saksi a pimmanaw iti Ukraine ti napan iti sabali a pagilian iti Europe para iti seguridadda. Kas pagarigan, maysa a ministerial nga adipen, ti asawana, ken ti tallo nga annakda, nga agtawen iti 7, 11, ken 16, ti nagbiahe a napan iti Portugal ta adda dagiti kabagianda a Saksi ni Jehova sadiay. Nagurayda iti 11 nga oras sakbay a makalasatda iti border, ken nagbiahe ti pamilia iti nasurok a 4,000 a kilometro (2,485 mi) iti uppat nga aldaw sakbay a nakadanonda iti balay dagiti kabagianda. Nakasangpetda sakbay la unay a mangrugi ti gimong ti kongregasion. Uray no saanda nga ammo ti ag-Portuguese, intultuloy ti pamilia ti naespirituan a rutinada isu a nagkonektarda latta iti gimong. Nagbilib dagiti kakabsat iti kongregasion a nakigimonganda gapu ta naragsak latta ti pamilia uray narigat ti situasionda.

Inyestoria met ti sister a nagkamang idiay Germany a kadua ti pamiliana: “Talaga a napabileg ken naparegtakami iti panagbasami iti Biblia, panangpampanunotmi kadagiti nasayaat a bambanag, ken ti nakaskasdaaw a namnamatayo. . . . Nariknami ti ima ni Jehova a mangkibkibin ken mangtultulong kadakami babaen kadagiti kakabsat. Inawat ken tinulongandakami idi addakami idiay Ukraine, Hungary, ken ita ditoy Germany!”

Nalawag a tultulongan ni Jehova ti amin nga ipatpategtayo a kakabsat idiay Ukraine.—Salmo 145:14.

Dagiti bilang iti baba manipud Ukraine ket naibasar iti report agingga idi Marso 16, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian:

• 4 a kakabsat ti natay

• 19 a kakabsat ti nadangran

• 29,789 a kakabsat ti nangpanaw iti balbalayda ken nagkamang iti nataltalged a lugar iti pagilian

• 45 a balay ti interamente a nadadael

• 84 a balay ti nakaro ti dadaelna

• 366 a balay ti saan unay a nadadael

• 16 a Kingdom Hall ti nadadael

• 27 a DRC ti tumultulong idiay Ukraine

• 20,981 a kakabsat ti tinulongan ti DRC a makabirok iti nataltalged a pagyanan

• 11,973 a kakabsat ti nagkamang iti dadduma a pagilian ken tultulongan dagiti kakabsat sadiay