Sipapasnek nga ikarkararagantayo dagiti kakabsattayo idiay Mariupol, ta agtultuloy pay la sadiay ti panaglalaban kadagiti kalsada ken panagbomba. Makapaladingit ta innem a kakabsattayo ti natay gapu kadagiti panagbomba. Sangapulo aminen a kakabsat ti natay idiay Ukraine. Kasta met, kas naireport iti news media, nabomba idi napan a lawas ti maysa a teatro a paglemlemmengan ti nasurok a 1,000 a tattao. Awan kadagiti kakabsattayo ti natay iti daytoy a panagbomba, ngem nadangran ti dadduma kadakuada.

Agarup 750 a kakabsattayo ti nakapanaw idiay Mariupol, ngem nabati ti agarup 1,600. Adu kadakuada ti adda iti makindaya a paset ti siudad, a kontrolado itan ti Russia.

Kas naireport iti napalabas, agarup 200 a kakabsat ti naglemmeng iti basement ti maysa a complex nga ayan ti Kingdom Hall ken Assembly Hall. Idi naadda biit ti komunikasion, kastoy ti inreport dagiti kakabsat iti dayta a complex:

“Bayat dagiti panagbomba, mabutbuteng unay ti sumagmamano a kakabsat. Nangrugi nga agsangit ti dadduma. Idi nangngegmi dagiti panagbettak iti ruar, impagarupmi a mataykamin gapu kadagita a panagbettak wenno gapu iti uram. Imbaga ti maysa a panglakayen nga agkantakami kadagiti Kingdom song. Nagsasaruno a kinantami ti 10 agingga iti 15 a kanta. Idi pimmigsa dagiti panagbettak ken nangrugi a magunggon ti building nga ayanmi, impigpigsami met ti agkanta. Kalpasanna, binasami ti Salmo 27 sa nagsasaritaanmi dayta. Idi kuan, imbagan ti tunggal maysa dagiti paboritona a teksto ti Biblia ken inlawlawagna no kasano a napabileg kadagita. . . . Talaga a nariknami a ni Jehova ket ‘Ama a napnuan iti asi ken Dios ti amin a liwliwa,’ a mangpakalma kadatayo iti karirigatan a situasion.”—2 Corinto 1:3, 4.

Dagiti managsakripisio a panglakayen ken miembro ti lokal a Disaster Relief Committee (DRC) birbirokenda dagiti kapammatianda ket ikkanda ida iti makan ken agas no kasapulan, uray agpeggad ti biagda. No dadduma, masapul nga agkaradap dagitoy a brother tapno saanda a mapaltogan bayat a sapsapulenda dagiti kakabsat iti siudad. Ipagpannakkeltayo dagitoy a kakabsat, a ‘mangirisrisgo iti biagda’ para kadagiti kapammatianda.—Roma 16:4.

Gapu ta awan ti gas ken koriente iti intero a siudad, situtured nga agluto dagiti kakabsat a babbai iti ruar babaen ti kayo. Kalpasanna, maitulod dagiti makan kadagiti nataengan ken baldado a kakabsat. Adu a kakabsat ti napukawan iti pagtaengan, lugan, ken material a sanikua, ngem agyamyamanda iti ayat ken panangaywan dagiti kapammatianda.

Ikagkagumaan dagidiay naglemmeng nga itultuloy ti naespirituan a rutinada babaen ti agkakadua a panagadalda iti Biblia ken panangiranudda iti mensahe ti Biblia iti sabsabali no posible.

Dagiti bilang iti baba manipud Ukraine ket naibasar iti report agingga idi Marso 22, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 10 a kakabsat ti natay

• 27 a kakabsat ti nadangran

• 33,180 a kakabsat ti nangpanaw iti balbalayda ken nagkamang iti nataltalged a lugar iti pagilian

• 78 a balay ti interamente a nadadael

• 102 a balay ti nakaro ti dadaelna

• 484 a balay ti saan unay a nadadael

• 1 a Kingdom Hall ti interamente a nadadael

• 4 a Kingdom Hall ti nakaro ti dadaelna

• 18 a Kingdom Hall ti saan unay a nadadael

• 27 a DRC ti tumultulong idiay Ukraine

• 25,069 a kakabsat ti tinulongan ti DRC a makabirok iti nataltalged a pagyanan

• 14,308 a kakabsat ti nagkamang iti dadduma a pagilian ken tultulongan dagiti kakabsat sadiay