Makapaladingit ta idi Marso 29, 2022, pito pay a kakabsattayo iti siudad ti Mariupol ti natay. Sangapulo ket pito aminen a kakabsattayo idiay Ukraine ti natay.

Kasla saan a mabambannog dagiti Disaster Relief Committee (DRC) idiay Ukraine a mangipapaay kadagiti relief supply nga uray la irisgoda ti biagda tapno mabirokanda dagiti kapammatianda kadagiti lugar a napakaruan ti gubat.

Kas pagarigan, nakaitulod dagiti kakabsattayo nga agtrabtrabaho iti DRC kadagiti makan, agas, ken dadduma pay a kasapulan dagiti kakabsat kadagiti siudad a napuruan ti gerra, kas iti Kharkiv, Kramatorsk, ken Mariupol. Maysa a miembro ti DRC ti inaldaw nga agbibiahe iti nasurok a 500 a kilometro (310 mi). Adu a checkpoint ti militar ti labsanna tapno makaitulod iti makan ken agas iti agarup 2,700 nga agibumbunannag.

Nangyurnos dagiti DRC kadagiti pagluganan tapno maipanaw dagiti kakabsattayo iti paggugubatan. Imbaga ti maysa a kabsat manipud iti Chernihiv DRC: “Idi bombaenen dagiti soldado ti paggigianan dagiti residente, nalawagen a nakadeldelikado ti agtalinaed iti siudad. Bayat ti panagbombada, awan ti koriente ken Internet isu a nagdardaras dagiti panglakayen a napan kadagiti kakabsat a nagkamang iti basement tapno pakaammuanda ida nga adda pagluganan a mangipanaw kadakuada iti siudad.”

Maysa a negosiante ti nangipabulod kadagiti ipapaarkilana a van ken bus. Naminsiam a nagsublisubli tapno maipanawna ti 254 a kakabsattayo manipud iti Chernihiv. Naminsan, tinarimaanna pay ti kalsada babaen kadagiti dadakkel a trak tapno makalasat ti bus-na. Agyamyaman unay dagiti kakabsat iti tulongna.

Makipagladingittayo kadagidiay natayan iti ay-ayaten iti biag kabayatan daytoy mapaspasamak a gubat. Segseggaantayo ti kaitungpalan ti namnama a mabasa iti Sao ti Dios, ti Biblia, nga awanton ti ipapatay ken panagladingit.—Apocalipsis 21:3, 4.

Dagiti bilang iti baba manipud Ukraine ket naibasar iti report agingga idi Marso 29, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 17 a kakabsat ti natay

• 35 a kakabsat ti nadangran

• 36,313 a kakabsat ti nangpanaw iti balbalayda ken nagkamang iti nataltalged a lugar iti pagilian

• 114 a balay ti interamente a nadadael

• 144 a balay ti nakaro ti dadaelna

• 612 a balay ti saan unay a nadadael

• 1 a Kingdom Hall ti interamente a nadadael

• 7 a Kingdom Hall ti nakaro ti dadaelna

• 23 a Kingdom Hall ti saan unay a nadadael

• 27 a DRC ti tumultulong idiay Ukraine

• 34,739 a kakabsat ti tinulongan ti DRC a makabirok iti nataltalged a pagyanan

• 16,175 a kakabsat ti nagkamang iti dadduma a pagilian ken tultulongan dagiti kakabsat sadiay