Makapaladingit ta immadu dagiti kakabsattayo a natay gapu iti agtultuloy a gubat idiay Ukraine. Duapulo ket walo aminen a Saksi ni Jehova ti natay.

Kas naireport iti internasional a damdamag, dagiti ili iti asideg ti Kyiv ti nangnangruna a naapektaran iti nakaro a panaglalaban bayat ti umuna a lawlawas ti gubat. Iti agarup 4,900 a kakabsat nga aggigian iti daytoy a rehion, nasurok a 3,500 ti nakapagkamangen kadagiti natalged a lugar.

Ipakita dagiti sumaruno a kapadasan no kasano a napagtalinaed dagiti kakabsattayo kadagitoy a lugar ti natibker a pammatida iti laksid dagiti nakaro a pakasuotan.

Ni Oleksandr, a panglakayen iti ili ti Makariv, ket nagkamang iti nataltalged a lugar iti central Ukraine. Ngem gapu iti pannakaseknanna kadagiti saan a makontak nga uppat a kakabsat iti field service group-na, nagsubli iti lugar nga ayanda uray adda ti panaglalaban. Imbagana: “Ammok nga ipatpateg unay ni Jehova dagiti agdaydayaw kenkuana. . . . Idi simmangpetak iti sango ti balay ti maysa a kabsat, ammok a nabomba dayta. Nakaserra ti ruangan ti basement, ken awan ti sumungsungbat. Nadanaganak.” Pinilit a luktan ni Oleksandr ti ruangan ti basement ket nakitana ti grupo dagiti tattao a nakakita kenkuana. Nakitana dagiti kakabsat ken dagiti kaarrubada a saan a Saksi a kaduada nga aglemlemmeng.

Imbaga ni Yaroslav, maysa kadagiti kakabsat nga adda iti basement, a walo nga aldawdan nga aglemlemmeng. Inyestoriana: “Sumagmamano laeng a biskuit ti kanen ken sangabaso a danum ti inumen ti tunggal maysa iti kada aldaw. Ngem binasami ti Biblia ken dagiti publikasiontayo, sa nagkararag, ken pinaregtami ti maysa ken maysa. Idi nangngegko nga aw-awagan ni Oleksandr ti naganko, impagarupko nga umaydakon alaen dagiti soldado. Kunak no matayakon. . . . [Ngem,] insalakannakami amin. Agyamyamankami ken Jehova kadagiti naayat a kakabsat a mangikarkararag kadakami ken uray la mangirisgo iti biagda tapno maisalakandakami.”

Nagdesision ni Pylyp ken ti sabali pay a kabsat a mangipan iti makan kadagiti nagbati iti ili ti Borodianka. Idi Marso 17, idi agmanmaneho a mapan iti ili, innala dagiti soldado ti lugan ni Pylyp ken dagiti awitda a makan. Inaresto dagiti soldado dagitoy a kakabsat, sada pinosasan ken inabbonganda dagiti matada, sa impanda ida iti kuarto ti maysa a basement a kadua ti pito a sabali pay a lallaki. Kalpasan ti dua nga aldaw, inyakarda ida iti selda a sadiay a kinabkabil ida dagiti guardia iti rabii. Kuna ni Pylyp: “Diak sigurado no makalasatak. Inkararagko a makapagtalinaedak koma a matalek.”

Bayat ti maysa a pannakakabkabilna, nagkararag ni Pylyp iti napigsa para kadagiti nataengan a sister nga awan makanna, iti kinatalged ti pamiliana, ken nagyaman ken Jehova iti adu a tawen a naragsak a panagserbina kenkuana. Insubli ti guardia iti seldana, ket intultuloyna ti nagkararag a maawatan koma dagiti soldado a saan a dakes dagiti kakabsat. Kinasabaan dagitoy a kakabsat dagiti guardia. Iti uneg ti dua nga aldaw, nakasabaanda ti amin a nag-duty a guardia. Kasta met, maysa kadagiti nakabalud ti naginteres iti mensahe ti Biblia. Nagyaman kadagiti kakabsat. Idi Marso 27, nawayawayaan dagiti kakabsat ken ti lalaki a nangipakita iti interes.

Ni Svitlana, a maysa a single a sister idiay Bucha, ket dua a lawas a saan a nakapanaw gapu iti gubat. Imbagana: “Ad-adda a naawatak ita ti kinapateg ti talna nga ited ni Jehova. Saan a gapu ta adda kadatayo ti talna ti Dios ammotayon a kanayon no ania ti aramidentayo. Ngem no kasla awanen ti solusion ti problematayo, naan-anay nga agtalektayo ken Jehova.”

Idi agbibiahe ni Svitlana a mapan iti nataltalged a lugar iti Ukraine, kinasabaanna ti maysa a babai ken ti kaanakanna. Nakadanonda amin iti natalged a lugar ken sinabat ida ti maysa a Saksi a pamilia. Sinangaili ti Saksi a pamilia ni Svitlana ken ti babai ken ti kaanakanna iti dayta a rabii. Kabigatanna, imbaga ti babai a kayatna ti makigimong ken dimmawat iti Biblia ken kadagiti publikasiontayo. Agtultuloy a konkontaken ni Svitlana ti babai.

Dagiti bilang iti baba manipud Ukraine ket naibasar iti report agingga idi Abril 12, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 28 a kakabsat ti natay

• 48 a kakabsat ti nadangran

• 40,778 a kakabsat ti nangpanaw iti balbalayda ken nagkamang iti nataltalged a lugar iti pagilian

• 278 a balay ti interamente a nadadael

• 268 a balay ti nakaro ti dadaelna

• 746 a balay ti saan unay a nadadael

• 1 a Kingdom Hall ti interamente a nadadael

• 9 a Kingdom Hall ti nakaro ti dadaelna

• 26 a Kingdom Hall ti saan unay a nadadael

• 27 a Disaster Relief Committee (DRC) ti tumultulong idiay Ukraine

• 41,974 a kakabsat ti tinulongan ti DRC a makabirok iti nataltalged a pagyanan

• 18,097 a kakabsat ti nagkamang iti dadduma a pagilian ken tultulongan dagiti kakabsat sadiay