Maragsakankami a mangipadamag a binendisionan ni Jehova ti ilina isu a naselebraran dagiti kakabsattayo idiay Ukraine ti Memorial ti ipapatay ni Kristo. Naangay ti Memorial iti sumagmamano a Kingdom Hall iti makinlaud a paset ti Ukraine a nagkamangan dagiti kakabsattayo. Sinelebraran dagiti kakabsattayo ti Memorial kaaduanna iti babassit a grupo ken inkonektarda babaen ti videoconference dagiti saan a makapanaw iti pagtaenganda.

Iti kaaduan a paset ti pagilian, mangngeg ti uni ti sirena a mangipakdaar iti panagbomba dagiti jet iti intero nga aldaw ti Memorial. Idi rumabiin, simmardengen ti panaguni dagiti sirena. “Inkarkararagmi a saan koma a mapasardeng ti Memorial gapu iti panagbomba,” imbaga ni Sherhiy a taga-Druzhkivka, iti Donetsk Region. “Sakbay la unay nga ag-Memorialkami, nagsardengen ti panagbomba ken awanen ti mangngeg a sirena.”

Maysa a grupo dagiti nataengan ken masaksakit a kakabsat iti Nemishaeve, nga asideg iti Kyiv, ti nasurok a makabulanen a saan a makagimgimong. Inkarkararagda a makaatenderda koma iti Memorial. Maysa a panglakayen, a ni Vitaliy, ti timmulong kadakuada a mangselebrar iti Memorial. “Awan idi ti koriente,” kunana, “isu a flashlight laeng ti silawmi a nag-Memorial. Awan ti heater. Awan met ti sound system, isu a nag-violin ti balasangko tapno makantami dagiti kanta.”

Inyestoria ni Oleksandr, a maysa a panglakayen nga agnanaed iti lugar a paggugubatan: “Bayat ti panagawis para iti Memorial, saanmi a masuratan dagiti tattao iti teritoria ti kongregasion ta nabomba ken pinanawanda ti balbalayda. Isu nga inawismi dagiti gagayyemmi, dagiti naam-ammomi iti basement, ken dagiti padami a nagbakuit. Adu a naam-ammomi ti saan idi a dumngeg kadagiti Saksi. Ngem adu kadakuada ti naawismi a maki-Memorial.”

Uray no saan pay a kompleto ti report ti amin a kongregasion iti Ukraine, naammuanmi a nasurok a 210,000 ti immatender iti Memorial.

Imbaga ti maysa a kabsat idiay Ukraine ti riknana maipapan iti Memorial: “No kasano a ti parola ipasiguradona kadagiti aglaylayag nga asidegdan iti igid ti baybay, ti pananglaglagip iti Memorial ipasiguradona kaniak a nakaas-asidegen ti aldaw ni Jehova. Ad-adda a napabileg ti pammatik gapu iti Memorial ita a tawen.”

Dagiti bilang iti baba manipud Ukraine ket naibasar iti report agingga idi Abril 21, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 35 a kakabsat ti natay

• 60 a kakabsat ti nadangran

• 43,792 a kakabsat ti nangpanaw iti balbalayda ken nagkamang iti nataltalged a lugar iti pagilian

• 374 a balay ti interamente a nadadael

• 347 a balay ti nakaro ti dadaelna

• 874 a balay ti saan unay a nadadael

• 1 a Kingdom Hall ti interamente a nadadael

• 10 a Kingdom Hall ti nakaro ti dadaelna

• 27 a Kingdom Hall ti saan unay a nadadael

• 27 a Disaster Relief Committee (DRC) ti tumultulong idiay Ukraine

• 44,971 a kakabsat ti tinulongan ti DRC a makabirok iti nataltalged a pagyanan

• 19,961 a kakabsat ti nagkamang iti dadduma a pagilian ken tultulongan dagiti kakabsat sadiay