Iti tulong ti 27 a Disaster Relief Committee (DRC), agtultuloy a tultulongan ti sangay ti Ukraine dagiti kakabsat a nagkamang iti sabali a paset ti pagilian. Manipud idi nangrugi ti gubat, nasuroken a 250 a tonelada a relief supply ti naipatulod manipud Poland, a pakairamanan ti makan, badbado, ken personal a pagdalus iti bagi. Nainayon pay iti dayta ti nasurok a 80 a tonelada a makan a naggapu kadagiti kakabsat nga adda iti nataltalged a paset ti Ukraine.

Imbaga ti sister nga agnagan Valentyna a taga-Kyiv a nakaawat iti tulong manipud kadagiti kakabsat nga agserserbi iti DRC: “Idi nangrugi ti panaglalaban, nakadeldelikadon ti agtalinaed iti siudad isu a nagkamangak iti bassit nga ili iti rehion ti Cherkasy. Dua a bulanko ditoyen. Nakaay-ayat kaniak dagiti kakabsat iti kongregasion ditoy. Inikkandak iti sumagmamano a kahon ti makan, ken personal a pagdalus iti bagi. Idi nakitak amin dagitoy a tulongda, diak mailadawan ti mariknak. Iti maysa a kahon, adda pay maysa a postcard ken drowing ti maysa nga ubing nga agtawen iti uppat a ni Blanca . . . Idulinko dagitoy a drowing tapno adda pakalaglagipak iti regaloda. Kasta unay ti panagyamanko kadagiti amin a kakabsat ken kangrunaanna ken Apo Jehova.”

Insurat ti 83 ti tawenna a baldado a sister nga agnagan met iti Valentyna a taga-Sieverodonetsk: “Agmaymaysaakon nga agbibiag idi nangrugi ti gubat. Natay ti kakaisuna nga anakko a lalaki sakbay ti gubat. Permi ti butengko idi ta agmalmalem a mabombomba ti siudadmi. Awan ti danum, koriente, gas, ken nagkapuy ti Internet. Agyamyamanak unay kadagiti kakabsat a timmulong kaniak, uray no masapul nga irisgoda ti biagda.”

Imbagana pay: “Idi agangay, impandak dagiti kakabsat ken ti dua pay a padak a baldado a sister iti nataltalged a siudad ti Dnipro. Tinulongandak dagiti kakabsat idiay Dnipro nga agbirok iti pagyanak. Aggigianak ita iti maysa a pamilia a Saksi. Ay-aywanandak ken imbilangdakon a kapamilia. Tinulongandak pay a maaddaan iti smartphone tapno makaatender ken makapartisiparak kadagiti gimong. Diakto pulos malipatan ti kinaimbag dagiti kakabsat kaniak.”

Napno ti pusotayo iti rag-o ken panagyaman iti naayat nga Amatayo a ni Jehova nga agtultuloy a mangay-aywan kadagiti ipatpategtayo a kakabsat idiay Ukraine tapno ‘saanda nga agkurang iti aniaman a nasayaat.’—Salmo 34:10.

Dagiti bilang iti baba manipud Ukraine ket naibasar iti report agingga idi Hunio 7, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.

• 42 a kakabsat ti natay

• 82 a kakabsat ti nadangran

• 46,145 a kakabsat ti nangpanaw iti lugarda

• 469 a balay ti interamente a nadadael

• 540 a balay ti nakaro ti dadaelna

• 1,405 a balay ti saan unay a nadadael

• 5 a Kingdom Hall ti interamente a nadadael

• 8 a Kingdom Hall ti nakaro ti dadaelna

• 33 a Kingdom Hall ti saan unay a nadadael

• 27 a DRC ti tumultulong idiay Ukraine

• 50,663 a kakabsat ti tinulongan ti DRC a makabirok iti nataltalged a pagyanan

• 22,995 a kakabsat ti nagkamang iti dadduma a pagilian ken tultulongan dagiti kakabsat sadiay