Iti dua a pagbaludan iti Palm Beach County, Florida, naibrodkas ti nairekord a palawag iti Memorial idi rabii ti Abril 7, iti nasurok a 1,100 a balud, uray no awan ti Saksi ni Jehova a presente sadiay a mangidaulo iti panagselebrar.

Imbaga ti maysa kadagiti 12 a brother a linawas a mangaskasaba iti pagbaludan: “Nasorpresakami kadagiti nagsayaat a napasamak. Nalawag a kayat ni Jehova a mangngeg dagitoy a tattao ti palawag iti Memorial.”

Nagkiddaw dagiti kakabsat iti pammalubos iti ministro iti pagbaludan tapno angayenda ti Memorial iti dua a pagbaludan. Ngem idi naipatungpal dagiti paglintegan gapu iti panagwaras ti sakit a COVID-19, saanen a maaramid dagiti kakabsat ti plano mainaig iti Memorial. Sakbay a makaisingasing dagiti kakabsat iti sabali a plano, nasorpresada idi nagkiddaw ti ministro iti pagbaludan iti nairekord a palawag iti Memorial. Iyur-urnosna gayamen a maibrodkas ti palawag iti dua a pagbaludan.

Malaksid iti panangited iti video, plano dagiti kakabsat a patulodan ti ministro iti pagbaludan kadagiti imbitasion iti Memorial tapno maiwaras wenno maipaskil. Nasorpresada manen ta nakaipaskilen ti ministro iti pakaammo maipapan iti palawag iti Memorial iti nadumaduma a paset ti pasilidad. Iti rabii ti Memorial, mabalin a mabuya ti tunggal balud ti naibatay iti Biblia a palawag.

Kalpasan ti Memorial, ti ministro iti pagbaludan kinontakna dagiti kakabsat tapno agkiddaw iti ad-adu pay a Biblia para kadagiti balud. Naiwarasen ti amin a Biblia a nabati iti pagbaludan. Ngem saan nga immanay ti suplay a Biblia gapu ta nakaad-adu ti nagkiddaw.

Maragsakantayo ta saan a nalapdan dagiti rehas ti pagbaludan ti Sao ti Dios a dumanon kadagiti tattao.—Mateo 24:14.