Nalayus ti adu a paset ti North Carolina, South Carolina, ken dadduma pay nga estado gapu iti bagyo a Florence. Idi nagbalin a Category 4 ti bagyo, saan a kumurang a 32 a tattao ti natay ken rinibu ti nangpanaw kadagiti balayda.

Impadamag ti sangay iti United States nga uray no nasurok nga 4,000 a Saksi ti nangpanaw kadagiti balayda, awan ti agibumbunannag a natay wenno nakaro a nasugatan bayat ti bagyo. Uray sumaysayaaten ti kasasaad, adda latta dagiti lugar a saan a mabalin a papanan gapu iti layus. Ipakita dagiti agdama a report nga adda 351 a pagtaengan dagiti kakabsat ken 21 a Kingdom Hall ti nadadael.

Iyur-urnos ti Disaster Relief Committee (DRC) ti pannakaipaay ti taraon, danum, bado, pagyanan, ken medikal a kasapulan. Karaman iti trabaho a panagsaranay ti dua a team a tumultulong a mangikkat kadagiti natumba a kayo. Ti kangrunaan a problema itan ket ti panangtarimaan kadagiti dinadael ti layus. Tapno maasikaso daytoy, adda dagiti boluntario kadagiti lokal a kongregasion ken iti dadduma pay a lugar a naawis a tumulong ken makipagtrabaho iti DRC. Sarsarungkaran dagiti lokal a panglakayen ken manangaywan iti sirkito dagiti naapektaran tapno pabilgenda ida.

Ikararagantayo dagiti kakabsattayo nga agpaspasar iti narigat a kasasaad gapu iti nabiit pay a bagyo ken segseggaantayo ti tiempo nga awanton ti pagbutngantayo.—Isaias 12:2.