Update: Kinompirma ti sanga nga opisina ti United States ti nakalkaldaang a damag nga adda 70 ti tawenna a lakay a kabsat idiay Paradise, Northern California a karaman kadagiti natay gapu iti uram a naawagan iti Camp Fire.

Gapu iti tallo a nagdadakkel nga uram idiay California, United States, nagadu ti nadadael ken di kumurang nga 48 ti natay. Kadagita nga uram, ti kakaruan ket naawagan iti Camp Fire nga agtultuloy a mangur-uram iti Northern California. Ti kalawa ti naapektaranen iti dayta nga uram ket 47,000 nga ektaria ken agarup 7,100 a pasdek ti dimmapo, a kaaduan kadagitoy ket balbalay. Idiay Southern California, ti dua nga uram a Hill Fire ken Woolsey Fire ti nangdadael iti 38,000 nga ektaria ken agarup 435 a pasdek. Sigun iti maysa a report ti media, “nalawlawa pay ngem iti Belgium ken Luxembourg” ti napuoran idiay California ita a tawen gapu kadagiti uram iti kakaykaywan.

Sigun iti damo a report ti sanga nga opisina ti United States, napilitan a nagbakuit ti agarup 427 a kakabsat iti Chico ken Paradise gapu iti nasao nga uram. Makapaladingit ta maysa a baket a kabsat iti Ponderosa Congregation ti natay gapu iti uram. Nakompirma pay a di kumurangen a 94 a balbalay ti kakabsat ti dimmapo wenno nakaro ti pannakadadaelda. Nadadael met ti maysa a Kingdom Hall iti Paradise.

Gapu kadagiti uram a Hill ken Woolsey, naibakuit ti agarup 420 a kakabsat kadagiti siudad ti Oxnard, Simi Valley, ken Thousand Oaks. Nakalkaldaang ta maysa a kabsat a lalaki ken ti nanangna a saan a Saksi ti natay idiay Malibu bayat a tumaltalawda. Sigun iti damo a report, nadadael ti 21 a balay dagiti kakabsattayo ken ti maysa a Kingdom Hall.

Nangorganisar ti sanga nga opisina iti dua a Disaster Relief Committee a mangasikaso kadagiti kasapulan dagiti kakabsattayo. Iti panangiwanwan dagiti manangaywan iti sirkitoda, pabpabilgen ken tultulongan dagiti panglakayen kadagita a lugar dagiti kakabsat a naapektaran kadagita nga uram. Idi Sabado, Nobiembre 10, naangay ti maysa nga espesial a programa para iti nasurok a 270 a kakabsat. Adda miembro ti United States Branch Committee ken dagiti manangaywan iti sirkito a nangipaay iti makaparegta ken naibatay iti Biblia a palawag.

Ikarkararagtayo a liwliwaen ken pabilgen koma ni Jehova dagiti kapammatiantayo a maipaspasango iti daytoy narigat a situasion ken laglagipenda nga asidegen a punasenna dagiti luatayo ken alimonenna ni patay iti agnanayon.​—Isaias 25:8.