Agtultuloy ti krisis iti Venezuela. Bassit ti suplay ti makan, danum, langis, ken agas gapu iti kurang a suplay ken nangina a presio. Masansan nga agawan ti koriente isu a kimmaro ti kinakurang ti taraon ta saanda a maipreserba dagita iti refrigerator. Kanayon nga adda krimen.

Iti laksid dagitoy a narigat a kasasaad, naregta latta iti ministerio ti nasurok a 136,500 nga agibumbunannag iti Venezuela. Kas pagarigan, idi Enero 2019, nupay naksayan iti 7,000 ti bilang ti agibumbunannag no ikompara iti naglabas a tawen, nanayonan iti 90,000 ti oras a binusbosda iti ministerio. Idi Abril 2019, nakaikonduktada iti nasurok a 195,600 a panangyadal iti Biblia. Immabut iti nasurok a 30,000 ti bilang dagiti regular pioneer. Bayat ti espesial a kampania iti intero a lubong a panangyawis iti Pananglaglagip iti ipapatay ni Kristo, immadu iti 20,400 ti bilang dagiti nag-auxiliary pioneer. Gapu iti dayta, dandani 471,000 ti timmabuno iti Memorial—nasurok a triple iti bilang dagiti agibumbunannag. Adu met ti makigimgimong. Ti maysa a rason ket agtultuloy nga iranranud dagiti kakabsat ti mensahe ti Biblia kadagiti tattao nga agbirbirok iti mapagtalkan a solusion dagiti problemada.

Agtultuloy a mangor-organisar ti sangay iti Venezuela iti panangsaranay kadagiti kakabsat tapno maipaay ti kasapulanda a taraon. Iti tulong dagiti asideg a sangay ken ti nawadwad a donasion iti sangalubongan a trabaho, binulan nga agiwarwaras ti sangay iti Venezuela iti ginasut a tonelada a naidonar a taraon kadagiti 75,000 nga agibumbunannag iti 1,595 a kongregasion.

Adu a rigat ti mapaspasaran dagiti kakabsattayo iti Venezuela, ngem maparparegtatayo ta itultuloyda ti ‘agragsak ken Jehova ken agrag-o iti Dios a mangisalakan kadakuada.’—Habakuk 3:17, 18.