Idi Septiembre 2023 ti maika-75 nga anibersario ti sanga nga opisina dagiti Saksi ni Jehova iti Zimbabwe. Iti agdama, masarakan ti sanga nga opisina iti Harare, ti kabesera ti Zimbabwe.

Idi nangrugi a nangasaba dagiti Saksi ni Jehova iti Zimbabwe, ti sanga nga opisina iti South Africa ti mangor-organisar kadagiti aktibidad ti kongregasion. Idi 1932, nangibaon ti sanga nga opisina ti South Africa iti uppat a payunir a mangasaba idiay Zimbabwe, a maaw-awagan idi iti Southern Rhodesia. Dagus nga immadu ti nagbalin nga adipen ni Jehova.

Idi Nobiembre 1940, gapu iti nasionalismo ken panangsuporta iti gubat, naiparit dagiti publikasiontayo. Adu a kakabsat ti naibalud gapu iti neutral a takderda kas Kristiano kadagidi a tawen. Ngem siaannad latta nga intultuloy dagiti kakabsattayo nga ipakaammo ti naimbag a damag iti sabsabali ket nagsayaat dagiti resultana. Naikkat ti panangiparit kalpasan ti innem a tawen. Di nagbayag, immadu ti bilang dagiti agibumbunannag iti pagilian ket immabut iti 3,500.

Tapno masuportaran ti umad-adu a bilang dagiti agibumbunannag, naipasdek ti sanga nga opisina idi Septiembre 1, 1948, iti Bulawayo, ti maikadua a kadakkelan a siudad iti Zimbabwe. Naapointaran ni Brother Eric Cooke kas ti kaunaan a branch servant. Idi agangay, naibaon iti sanga nga opisina iti Zimbabwe dagiti misionero a nasanay iti Gilead a da George ken Ruby Bradley, Phyllis Kite, ken Myrtle Taylor.

Kadagiti simmaganad a dekada, agtultuloy nga immadu dagiti agibumbunannag iti Zimbabwe. Gapu iti dayta, adu ti nagatang a baro a pasilidad para iti sangay tapno maorganisar ti dumakdakkel a trabaho.

Naibangon iti Harare ti agdama a pasdek ket naidedikar dayta idi Disiembre 1998. Ti sanga nga opisina ti mangiwanwanwan iti trabaho a panagipatarus iti pito a lengguahe ken mangay-aywan iti nasurok a 964 a kongregasion iti teritoria. Nasurok a 46,000 a kakabsat ti aktibo nga agserserbi iti pagilian, ket 120,702 ti immatender iti Memorial ti ipapatay ni Kristo idi 2023.

Maragsakantayo a makakita iti agtultuloy nga irarang-ay iti Zimbabwe. Ipakita dayta a panagrang-ay a “dagiti mata ken puso [ni Jehova]” ket kanayon nga adda kadagidiay napudno kenkuana.—2 Cronicas 7:16.