Pagyamanan iti interesyo a mangipadamag kadagiti aktibidad dagiti Saksi ni Jehova. Makatulong dagiti sumaganad a termino para iti ispeling ken kaipapanan dagiti termino nga us-usaren ti organisasionmi. No adda aniaman a saludsodyo a saan a nasungbatan ditoy, kontakenyo ti sanga nga opisina dagiti Saksi ni Jehova.

agibumbunannag. Awag iti maysa a makiramraman iti tay-ak ti serbisio ken paset ti maysa a kongregasion dagiti Saksi ni Jehova. Tapno makualipikar ti maysa nga agbalin nga agibumbunannag, masapul a maawatan ken patienna dagiti kangrunaan a pannursuro ti Biblia ken iyap-aplikarna dagiti prinsipio ti Dios. Saan a masuelsuelduan dagiti agibumbunannag iti panangasabada ken saanda met nga empleado iti kongregasion nga ayanda wenno iti aniaman a korporasion a konektado kadagiti Saksi ni Jehova. Ti termino nga “agibumbunannag” ket saan a pammadayaw a titulo.

Agriingkayo! Magasin nga ipabpablaak ken iwarwaras dagiti Saksi ni Jehova. Damo a naipablaak idi 1919 kas The Golden Age, sa nabaliwan ti paulona iti Consolation idi 1937. Ngem idi Agosto 22, 1946, nasuktan dayta iti Agriingkayo! Kasta ti napili a naganna tapno maipaganetget kadagiti agbasbasa a masapul a nasiputda kadagiti napapateg a pasamak iti lubong. Daytoy ti maysa kadagiti kaaduan a maiwarwaras a magasin iti lubong.

asamblea. Kitaen ti:  asamblea sirkito.

 asamblea sirkito. Maysa nga aldaw a panagtataripnong dagiti nagduduma a kongregasion dagiti Saksi ni Jehova. Maaramid dayta mamindua iti kada tawen. Mabalin nga atenderan ti asinoman ken nairanta a tumulong kadagiti tattao nga umasideg iti Dios. Makatulong met ti programa tapno magunggonaan dagiti umatender kadagiti balakad ti Biblia, aniaman ti edadda. Adda met dagiti presentasion a mangipakita no kasano a mayaplikar iti inaldaw a panagbiag dagiti isursuro ti Biblia. Masansan a maangay dayta kadagiti Assembly Hall Dagiti Saksi ni Jehova. Mabalin met a maangay kadagiti narentaan a pasilidad wenno mabuya online. Kaaduanna a maaramid dayta iti ngudo ti lawas. Libre ti umatender iti amin a sesion ken awan ti maaramid a panagkolekta.

Assembly Hall Dagiti Saksi ni Jehova. Dakkel a pasilidad a pagdaydayawan a kukua dagiti Saksi ni Jehova. Maus-usar para kadagiti daddadakkel a panagtataripnong dagiti kongregasion manipud iti maysa nga espesipiko a lugar. Mabalin met a maawagan dayta iti “Assembly Hall.”

Bagi a Manarawidwid Dagiti Saksi ni Jehova. Bassit a grupo dagiti panglakayen a naapointaran a mangaywan kadagiti naespirituan a kasapulan dagiti Saksi ni Jehova iti intero a lubong. Masansan a mapaababa kas “Bagi a Manarawidwid.” Direkta a karamanda iti pannakaisagana dagiti naibatay-Biblia a publikasion. Nupay ti Bagi a Manarawidwid ti mangidadaulo iti pannakayurnos dagiti aktibidad dagiti Saksi iti intero a lubong, bigbigenda a ni laeng Jesu-Kristo ti Lider dagiti Saksi ni Jehova. Ti opisina ti Bagi a Manarawidwid ket adda iti Sangalubongan a Hedkuarter dagiti Saksi ni Jehova idiay Warwick, New York, U.S.A.

Baro a Lubong a Patarus ti Nasantuan a Kasuratan. Ti kompleto a paulo ti napagtipon a Hebreo a Kasuratan (“Daan a Tulag”) ken ti Griego a Kasuratan (“Baro a Tulag”) nga impatarus ken impablaak dagiti Saksi ni Jehova. Mabalin met a maawagan iti Baro a Lubong a Patarus.

Bethel, Bethelite, pamilia ti Bethel. Ti “Bethel” ket Hebreo a sao a kaipapananna “Balay ti Dios.” Dayta ti awag kadagiti pasilidad nga us-usaren dagiti Saksi ni Jehova a mangiwanwan ken mangsuporta kadagiti naibatay-Biblia nga aktibidadda iti tunggal pagilian wenno rehion. Dagiti Saksi nga agtrabtrabaho kadagita a pasilidad ket paset ti narelihiosuan nga orden (religious order) ken maaw-awagan kas “Bethelite.” Saanda a masuelsuelduan. Kas maysa a grupo, maawaganda iti “pamilia ti Bethel.” Kas iti maysa a pamilia, agkakaduada nga agdaydayaw, agnanaed, ken agtrabtrabaho kadagita a pasilidad. Ti termino a “Bethelite” ket saan a pammadayaw a titulo.

brother. Lalaki a nabautisaran kas maysa a Saksi ni Jehova. No babassit a letra ti mausar, tukoyenna ti amin a lallaki a Saksi. Ngem no pormal a matukoy ti lalaki a Saksi, dakkel a letra ti mausar a kadua ti apelyidona (e.g., Brother Smith). Ngem saan a pammadayaw a titulo dayta. Kasta met laeng ti maaramid no matukoy ti babai a Saksi (e.g., Sister Smith).

 Dagiti Saksi ni Jehova. Maysa a Kristiano a relihion nga agdaydayaw ken Jehova a Dios ken mangisursuro iti Biblia iti nagduduma a pamay-an. Ti trabahoda a panangisuro iti Biblia ket nakapokus iti panangikasaba iti naimbag a damag maipapan iti gobierno wenno Pagarian ti Dios. (Mateo 24:14) Ti nagan ti relihionda idumana ida kadagiti dadduma a relihion ta saanna laeng a tukoyen no asino ti Dios nga ireprepresentarda, no di ket uray ti trabaho a boluntario nga ar-aramidenda maigapu iti nagan ti Dios. Maibilang laeng a Saksi ni Jehova ti maysa no isu ket addaanen iti umdas a pannakaammo kadagiti kangrunaan a pannursuro ti Biblia, kualipikadon a mangasaba a kadua ti maysa a kongregasion dagiti Saksi ni Jehova, ken nabautisaranen kas simbolo ti dedikasionna ken Jehova a Dios. Mausar koma ti opisial a nagan a “Dagiti Saksi ni Jehova” no damo a madakamat iti maysa nga artikulo. Mabalin met a mausar ti “dagiti Saksi.” No maysa nga indibidual ti matuktukoy, usaren ti “maysa a Saksi” wenno “maysa kadagiti Saksi ni Jehova,” saan ket a “Saksi ni Jehova” wenno “Jehovah Witness.”—Isaias 43:10.

Gilead, Eskuelaan ti Gilead. Napaababa a porma ti Watchtower Bible School of Gilead, a nairugi idi 1943. Ti damo a panggepna ket mangsanay kadagiti misionero. Lima a bulan daytoy a naun-uneg a panagadal iti Biblia para kadagiti Saksi ni Jehova a maawis iti daytoy nga eskuelaan. Babassit laeng a letra nga “eskuelaan” ti mausar no awan ti kaduana a sabali a sasao.

gimong iti tengnga ti lawas. Linawas a taripnong ti kongregasion a masansan a maaramid iti rabii iti tengnga ti lawas. Maawagan daytoy a gimong iti Panagbiag ken Ministeriotayo kas Kristiano, ken addaan iti tallo a paset. Nairanta daytoy a gimong a tumulong kadagiti Saksi nga agbalin a mas epektibo a ministro ti Dios. Kas iti amin a gimong dagiti Saksi ni Jehova, awan ti maaramid a panagkolekta ken libre ti umatender iti in-person wenno iti virtual.

 internasional a kombension. Tallo nga aldaw a panagtataripnong para iti panagdaydayaw ken panagadal iti Biblia nga inyurnos dagiti Saksi ni Jehova. Maar-aramid daytoy maminsan iti sumagmamano a tawen iti nagduduma a pagilian. Maawis nga umatender kas delegado dagiti Saksi manipud iti nagduduma a pagilian. Mabalin nga umatender ti asinoman kadagitoy a kombension. Ti panggepna ket matulongan dagiti umatender nga umasideg iti Dios ken mangpatibker iti panagkaykaysa dagiti Saksi ni Jehova iti intero a lubong. Masansan a maar-aramid dagiti internasional a kombension kadagiti narentaan a pasilidad ken maangay manipud Biernes agingga iti Domingo. Libre ti umatender ken awan ti maaramid a panagkolekta.

Jehova. Ti personal a nagan ti mannakabalin-amin a Dios ken Namarsua kas isursuro ti Biblia. (Salmo 83:18) Saan a husto nga usaren ti sao a “Jehova” a pangawag iti maysa a Saksi ni Jehova.

Jesu-Kristo. Ti bugbugtong nga Anak ti Dios. (Juan 3:16) Dagiti Saksi ni Jehova ibilangda ni Jesu-Kristo kas ti Liderda ken ikagkagumaanda a tuladen ti ulidanna ken iyap-aplikarda dagiti pannursurona. Isu ket ibilang dagiti Saksi kas ti katan-okan a tao a nagbiag, ti kapatgan a Saksi ni Jehova, ken ti usaren ti Dios a mangisalakan iti sangatauan.—Isaias 9:6, 7; Apocalipsis 1:5.

Kingdom Hall Dagiti Saksi ni Jehova. Pasdek a pagdaydayawan ti maysa wenno ad-adu pay a kongregasion. Masansan a maawagan dayta iti “Kingdom Hall.” Saanyo koma nga awagan dayta iti “simbaan.”

kombension. Kitaen ti:  internasional a kombension ken  rehional a kombension.

Komite ti Sangay. Iti tunggal sanga nga opisina, adda ti Komite ti Sangay a buklen ti tallo wenno ad-adu pay a panglakayen a naapointaran a mangiwanwan kadagiti aktibidad iti maysa wenno ad-adu pay a pagilian a sakup dayta a sangay.

kongregasion. Organisado a grupo dagiti Saksi a regular nga agtataripnong tapno agdaydayaw. Maysa a grupo dagiti panglakayen ti agtitinnulong a mangikondukta iti nagduduma a programa a mangisuro iti Biblia ken mangted iti naespirituan a panangiwanwan iti kongregasion ken iti tunggal indibidual. Mabalin nga atenderan ti asinoman dagiti gimong ti kongregasion. Libre ti umatender ken awan ti maaramid a panagkolekta.

manangaywan iti sirkito. Eksperiensiado a panglakayen nga iwanwanwan ti sanga nga opisina. Bisitaenna dagiti kongregasion iti sirkito, masansan a mamindua iti kada tawen. No adda asawana, kaduana ni baketna nga agbisita. Paregtaenna dagiti agibumbunannag iti tunggal kongregasion agraman dagiti panglakayen ken ministerial nga adipen, ken mangted pay kadakuada kadagiti instruksion. Mangisagana met isuna kadagiti palawag a maibagay iti tunggal kongregasion. Dayta a termino ket saan a pammadayaw a titulo.

Memorial ti ipapatay ni Kristo. Ti tinawen a pananglaglagip iti ipapatay ni Jesu-Kristo. Maawagan met iti Pangrabii ti Apo, Maudi a Pangrabii, Memorial, wenno Pananglaglagip iti ipapatay ni Jesus. Ibilang dayta dagiti Saksi ni Jehova a kapatgan nga okasion ti tawen. Dayta laeng ti narelihiosuan a seremonia nga imbilin ni Kristo a selebraran dagiti pasurotna.—Lucas 22:19, 20.

ministerial nga adipen. Lalaki a Saksi a nataengan iti naespirituan a tumultulong kadagiti panglakayen a mangaywan iti kongregasion. Tapno makapagserbi ti maysa kas ministerial nga adipen, masapul nga agtultuloy a ragpatenna dagiti Nainkasuratan a kualipikasion a nadakamat iti 1 Timoteo 3:8-10, 12, 13 ken Tito 2:6-8. Ar-aramiden dagiti ministerial nga adipen ti dadduma a napapateg a mangsuporta a trabaho iti uneg ti kongregasion. Ti ministerial nga adipen ket saan a masuelsuelduan kadagita nga ar-aramidenna ken saan met nga empleado iti kongregasion nga ayanna wenno iti aniaman a korporasion a konektado kadagiti Saksi ni Jehova. Kaaduan a ministerial nga adipen ket addaan iti sekular a trabaho tapno masuportaranda ti bagida ken ti pamiliada. Inton agangay, dadduma a ministerial nga adipen ti makualipikar nga agserbi kas panglakayen. Dayta a termino ket saan a pammadayaw a titulo.

misionero. Bautisado a Saksi nga ibaon ti Bagi a Manarawidwid Dagiti Saksi ni Jehova iti nagduduma a lugar iti intero a lubong. Situtulok dagiti misionero a mangpanaw iti balayda ken mabalin nga umakarda iti sabali a pagilian tapno tumulongda a mangikasaba iti naimbag a damag maipapan iti Pagarian.—Mateo 24:14.

Miting Publiko. Linawas a taripnong ti kongregasion a masansan a maaramid iti ngudo ti lawas. Maiparang nga umuna ti 30 a minuto a palawag a naibatay iti Biblia para iti publiko. Sarunuen daytoy ti Panagadal iti Pagwanawanan, a maysa oras a saludsod ken sungbat a panagadal iti Biblia a mausar ti maysa nga artikulo ti pagadalan nga edision Ti Pagwanawanan. Kas iti amin a gimong dagiti Saksi ni Jehova, awan ti maaramid a panagkolekta ken libre ti umatender iti in-person wenno iti virtual.

panagkakabsat. Ti sangalubongan a grupo dagiti Saksi ni Jehova (lallaki ken babbai).—1 Pedro 5:9.

panangasaba. Kitaen ti:  tay-ak ti serbisio.

panglakayen. Lalaki a Saksi a nataengan iti naespirituan a nadutokan a mangisuro ken mangaywan kadagiti agibumbunannag iti kongregasion para iti naespirituan a pagsayaatanda. Masapul nga agtultuloy a maragpatna dagiti kualipikasion nga adda iti Biblia kas nadakamat iti 1 Timoteo 3:1-7; Tito 1:5-9; Santiago 3:17, 18; ken 1 Pedro 5:2. Saan a masuelsuelduan dagiti panglakayen ken saanda nga empleado iti kongregasion nga ayanda wenno iti aniaman a korporasion a konektado kadagiti Saksi ni Jehova. Kaaduan a panglakayen ket addaan iti sekular a trabaho tapno masuportaranda ti bagida ken ti pamiliada. Awan ti klero wenno ranggo kadagiti Saksi. Dayta a termino ket saan a pammadayaw a titulo.

payunir. Awag iti maysa a bautisado a Saksi a mangbusbusbos iti espesipiko nga oras iti tay-ak ti ministerio. Kaaduanna a maus-usar a pangababaan nga awag iti maysa a “regular pioneer,” a masapul a mangbusbos iti 600 nga oras kada tawen (50 nga oras iti kada bulan). No dadduma, maus-usar met a pangababaan nga awag iti maysa nga “auxiliary pioneer,” a masapul a mangbusbos iti 15 wenno 30 nga oras iti maysa a bulan wenno agsasaruno a bulan. Saan a masuelsuelduan dagiti payunir iti panangasabada ken saanda met nga empleado iti kongregasion nga ayanda wenno iti aniaman a korporasion a konektado kadagiti Saksi ni Jehova. Kaaduan a payunir ket addaan iti sekular a trabaho tapno masuportaranda ti bagida. Dayta a termino ket saan a pammadayaw a titulo.

 rehional a kombension. Tallo nga aldaw a panagtataripnong dagiti nagduduma a kongregasion nga adda iti maysa a rehion ken maaramid maminsan iti kada tawen. Nairanta dayta a tumulong kadagiti tattao nga umasideg iti Dios. Mabalin nga atenderan dayta ti uray asinoman. Makatulong met ti programa tapno magunggonaan dagiti umatender kadagiti balakad ti Biblia, aniaman ti edadda. Adda met dagiti maipabuya nga eksena a naibatay kadagiti pakasaritaan iti Biblia ken kadagiti pakaipaspasanguantayo iti inaldaw a mangipakita no kasano a mayaplikar dagiti prinsipio ti Biblia. Kaaduanna a maaramid daytoy iti dadakkel a marentaan a pasilidad kas iti arena, stadium, ken convention center. Dagiti basbassit a rehional a kombension ket mabalin a maangay kadagiti Assembly Hall Dagiti Saksi ni Jehova. No maaramid daytoy iti in-person, masansan a mayeskediul manipud Biernes agingga iti Domingo. Iti nabiit pay, adda dagiti nairekord a programa a mabuya online. Kas iti amin a gimong dagiti Saksi ni Jehova, libre ti umatender ken awan ti maaramid a panagkolekta.

sanga nga opisina. Pasilidad nga ayan ti Komite ti Sangay a mangsupsuporta ken mangiwanwanwan kadagiti naespirituan nga aktibidad dagiti Saksi ni Jehova iti maysa wenno ad-adu pay a pagilian. Maawagan met daytoy no maminsan iti “sangay.”

sirkito. Grupo dagiti kongregasion dagiti Saksi ni Jehova iti maysa nga espesipiko a lugar.

sister. Babai a nabautisaran kas maysa a Saksi ni Jehova. No babassit a letra ti mausar, tukoyenna ti amin a babbai a Saksi. Ngem no pormal a matukoy ti babai a Saksi, dakkel a letra ti mausar a kadua ti apelyidona (e.g., Sister Smith). Ngem saan a pammadayaw a titulo dayta. Kasta met laeng ti maaramid no matukoy ti lalaki a Saksi (e.g., Brother Smith).

 tay-ak ti serbisio. Ti ministerio dagiti Saksi ni Jehova kas panangsurot iti bilin ni Jesus nga ikasaba ti “naimbag a damag maipapan iti Pagarian” kadagiti tattao “iti intero a daga tapno maammuan ti amin a nasion.”—Mateo 24:14; 28:19.

Ti Pagwanawanan Mangibumbunannag iti Pagarian ni Jehova. Ti kompleto a paulo ti kangrunaan a magasin nga ipabpablaak ken iwarwaras dagiti Saksi ni Jehova. Maawagan met iti Pagwanawanan. Kasta ti nagan daytoy a magasin gapu ta kayatna a tulongan dagiti agbasbasa nga agbalin a nasiput iti pannakatungpal dagiti panggep ti Dios. (Mateo 24:42) Ti publiko nga edision Ti Pagwanawanan ket maited a libre kadagiti interesado nga agbasa. Ti met pagadalan nga edision Ti Pagwanawanan ket maus-usar iti linawas a saludsod ken sungbat a panagadal kadagiti kongregasion iti intero a lubong. Maipabpablaak Ti Pagwanawanan manipud 1879. Dayta ti maysa kadagiti kaaduan a maiwarwaras a magasin iti intero a lubong.

PALAGIP: No mangaramidkayo iti artikulo maipapan kadagiti Saksi ni Jehova, usarenyo koma ti kompleto nga awag kadakuada no damo a dakamatenyo ida. Para iti ad-adu pay nga impormasion, kitaen ti:  Dagiti Saksi ni Jehova.