1 Ar-ari 13:1-34
13 Ket adtoy immay idiay Bethel ti maysa a lalaki+ ti Dios manipud Juda babaen iti sao+ ni Jehova, bayat a sitatakder idi ni Jeroboam iti sibay ti altar+ tapno mangpataud iti asuk a sakripisio.+
2 Idin nagpukkaw maibusor iti altar babaen iti sao ni Jehova ket kinunana: “O altar, altar, daytoy ti kinuna ni Jehova, ‘Adtoy! Maysa nga anak nayanak iti balay ni David, nga agnagan Josias!+ Ket iti rabawmo pudno unay nga isakripisionanto ti papadi dagiti nangato a disso a mangpatpataud iti asuk a sakripisio iti rabawmo, ken tultulang ti tattao ti puorannanto iti rabawmo.’”+
3 Ket nangted iti maysa a tanda+ iti dayta nga aldaw, a kunkunana: “Daytoy ti tanda a sinao ni Jehova: Adtoy! Marakrak a mapagsina ti altar, ket pudno unay a maibellengto ti nataba a dapdapo nga adda iti rabawna.”
4 Ket naaramid nga, apaman a nangngeg ti ari ti sao nga impukkaw ti lalaki ti pudno a Dios maibusor iti altar idiay Bethel, dagus nga inyunnat ni Jeroboam ti imana manipud iti altar, a kunkunana: “Dakayo a lallaki, isu gammatanyo!”+ Dagus a gimmango ti imana nga inyunnatna maibusor kenkuana, ket saanna a nabaelan nga isanud dayta iti bagina.+
5 Ket narakrak a napagsina ti mismo nga altar iti kasta naibelleng ti nataba a dapdapo manipud iti altar, sigun iti tanda nga inted ti lalaki ti pudno a Dios babaen iti sao ni Jehova.+
6 Simmungbat ita ti ari ket kinunana iti lalaki ti pudno a Dios: “Paluknengem, pangngaasim, ti rupa ni Jehova a Diosmo ket agkararagka maigapu kaniak tapno ti imak mapasubli koma kaniak.”+ Gapu itoy ti lalaki ti pudno a Dios pinaluknengna+ ti rupa ni Jehova, iti kasta ti ima ti ari napasubli kenkuana, ket nagbalin a kas idi damo.+
7 Ket kinuna ti ari iti lalaki ti pudno a Dios: “Kumuyogka kaniak iti balay ket agtaraonka,+ ket bay-am nga ikkanka iti sagut.”+
8 Ngem ti lalaki ti pudno a Dios kinunana iti ari: “Uray itedmo kaniak ti kagudua ti balaymo+ saanak a kumuyog kenka+ ken mangan iti tinapay wenno uminum iti danum iti daytoy a lugar.
9 Ta kasta ti panangbilinna kaniak babaen iti sao ni Jehova, a kunkunana, ‘Dika mangan iti tinapay+ wenno uminum iti danum, ket dika agsubli babaen iti dalan a napanam.’”
10 Ket nangrugi a mapan babaen iti sabali a dalan, ket saan a nagsubli babaen iti dalan nga immayanna idiay Bethel.
11 Ket ti maysa a lakay a mammadto+ agnanaed idi idiay Bethel, ket simrek ita ti annakna ket insalaysayda kenkuana ti isuamin nga aramid nga inaramid ti lalaki ti pudno a Dios iti dayta nga aldaw idiay Bethel ken ti sasao a sinaona iti ari, ket insalaysayda dagita iti amada.
12 Idin sinao kadakuada ti amada: “Iti ania a dalan, ngarud, ti napananna?” Gapuna ti annakna impakitada kenkuana ti dalan a napanan ti lalaki ti pudno a Dios nga immay manipud Juda.
13 Kinunana ita iti annakna: “Siliaanyo ti asno maipaay kaniak.” Iti kasta siniliaanda ti asno+ maipaay kenkuana, ket napan a sisasakay iti dayta.
14 Ket sinurotna ti lalaki ti pudno a Dios ket nasarakanna a situtugaw iti sirok ti dakkel a kayo.+ Idin kinunana kenkuana: “Sika kadi ti lalaki ti pudno a Dios nga immay manipud Juda?”+ nga iti dayta kinunana: “Siak.”
15 Ket kinunana kenkuana: “Kumuyogka kaniak iti balay ket manganka iti tinapay.”
16 Ngem kinunana: “Saanko a mabalin ti agsubli a kumuyog kenka wenno sumrek a kumuyog kenka, ket saanak met a makipangan iti tinapay wenno makiinum kenka iti danum iti daytoy a lugar.+
17 Ta naisao kaniak babaen iti sao ni Jehova,+ ‘Dika mangan iti tinapay wenno uminum iti danum sadiay. Dika agsubli manen babaen iti dalan a napanam.’”+
18 Gapu itoy kinunana kenkuana: “Maysaak met a mammadto a kas kenka, ket ti maysa nga anghel+ nagsao a mismo kaniak babaen iti sao ni Jehova, a kunkunana, ‘Pagsubliem a kumuyog kenka iti balaymo tapno makapangan iti tinapay ken makainum iti danum.’” (Isu inallilawna.)+
19 Gapuna nagsubli a kimmuyog kenkuana tapno makapangan iti tinapay idiay balayna ken makainum iti danum.+
20 Ket naaramid, bayat a situtugawda iti panganan, a ti sao+ ni Jehova dimteng iti mammadto a nangpasubli kenkuana;
21 ket rinugianna a pukkawan ti lalaki ti pudno a Dios nga immay manipud Juda, a kunkunana: “Daytoy ti kinuna ni Jehova, ‘Iti rason a nagrebeldeka+ iti pammilin ni Jehova ket dika sinalimetmetan ti bilin nga imbilin kenka ni Jehova a Diosmo,+
22 no di ket nagsublika tapno makapanganka iti tinapay ken makainumka iti danum iti lugar a maipapan iti dayta sinaona kenka: “Dika mangan iti tinapay wenno uminum iti danum,” ti natay a bagim saanto a makagteng iti lugar a pagitabonan dagidi ammam.’”+
23 Ket naaramid kalpasan ti pannanganna iti tinapay ken kalpasan ti iyiinumna a dagus a siniliaanna ti asno maipaay kenkuana, awan sabali, maipaay iti mammadto a pinagsublina.
24 Ket napan iti dalanna. Kamaudiananna maysa a leon+ ti nakasarak kenkuana iti dalan ket isu pinapatayna,+ ket ti natay a bagina naiwalang iti dalan. Ket ti asno sitatakder idi iti sibay dayta, ket ti leon sitatakder iti sibay ti natay a bagi.
25 Ket adtoy adda idi tattao a lumablabas, iti kasta nakitada ti natay a bagi a naiwalang iti dalan ken ti leon a sitatakder iti sibay ti natay a bagi. Kalpasanna simrekda ket nagsaoda maipapan iti dayta idiay siudad a pagnanaedan ti lakay a mammadto.
26 Idi a nangngeg dayta ti mammadto a nangpasubli kenkuana manipud iti dalan, dagus a kinunana: “Dayta ti lalaki ti pudno a Dios a nagrebelde iti pammilin ni Jehova;+ ket iti kasta isu inted ni Jehova iti leon, tapno marumekna ken mapapatayna, maitunos iti sao ni Jehova a sinaona kenkuana.”+
27 Ket nagsao iti annakna, a kunkunana: “Siliaanyo ti asno maipaay kaniak.” Gapuna siniliaanda dayta.+
28 Kalpasanna napan iti dalanna ket nasarakanna ti natay a bagina a naiwalang iti dalan agraman ti asno ken ti leon a sitatakder iti sibay ti natay a bagi. Ti leon saanna a kinnan ti natay a bagi, saanna met a rinumek ti asno.+
29 Ket ti mammadto binagkatna ti natay a bagi ti lalaki ti pudno a Dios ket inkabilna iti rabaw ti asno ket insublina. Iti kasta dimteng iti siudad ti lakay a mammadto tapno dung-awanna ken itabonna.
30 Gapuna inkabilna ti natay a bagina iti bukodna a lugar a pagitabonan; ket indungdung-awda kenkuana:+ “Asika pay, kabsatko!”
31 Ket naaramid kalpasan ti panangitabonna kenkuana a kinunana iti annakna: “Inton matayak masapul nga itabondak iti lugar a pagitabonan a nakaitabonan ti lalaki ti pudno a Dios. Iti sibay dagiti tulangna ikabilyo dagiti bukodko a tulang.+
32 Ta di bumurong a maaramidto+ ti sao nga impukkawna babaen iti sao ni Jehova maibusor iti altar+ nga adda idiay Bethel ken maibusor kadagiti amin a balay dagiti nangato a disso+ nga adda kadagiti siudad ti Samaria.”+
33 Kalpasan daytoy a banag saan a timmallikud ni Jeroboam iti dakes a dalanna, no di ket nangaramid manen iti papadi dagiti nangato a disso manipud iti kaaduan nga umili.+ No maipapan iti asinoman a maragragsakan iti dayta, punnuenna ti imana iti pannakabalin,+ a kunkunana: “Ket isu agbalin koma a maysa kadagiti papadi dagiti nangato a disso.”
34 Ket iti daytoy a banag adda idi ti pakaigapuan ti basol iti biang ti sangakabbalayan ni Jeroboam+ ken maysa a pasamak a panangpunas kadakuada ken panangtalipupos kadakuada iti rabaw ti daga.+
