1 Ar-ari 16:1-34
16 Ti sao ni Jehova dimteng ita ken Jehu+ nga anak ni Hanani+ maibusor ken Baasa, a kunkunana:
2 “Yantangay imbangonka manipud iti tapok+ tapno itudingka koma a panguluen iti ilik nga Israel,+ ngem nagnaka iti dalan ni Jeroboam+ ket ngarud napagbasolmo ti ilik nga Israel babaen ti panangrurodmo kaniak gapu kadagiti basolda,+
3 adtoy mangaramidak iti naan-anay a panangsagad ken Baasa ken iti balayna, ket pudno unay nga itudingkonto ti balayna a kas iti balay ni Jeroboam nga anak ni Nebat.+
4 Ti asinoman a kukua ni Baasa a matay idiay siudad kanento dagiti aso; ket ti asinoman a kukuana a matay idiay tay-ak kanento dagiti agtatayab iti langlangit.”+
5 No maipapan iti dadduma pay kadagiti pasamak ni Baasa ken iti inaramidna ken iti kinamannakabalinna, saanda aya a naisurat iti libro+ dagiti pasamak iti al-aldaw ti ar-ari ti Israel?
6 Kamaudiananna nakikaidda ni Baasa kadagidi ammana ket naitabon idiay Tirza;+ ket ni Elah nga anakna nangrugi nga agturay a mangsandi kenkuana.
7 Ken kasta met a babaen ken Jehu nga anak ni Hanani a mammadto, ti met laeng sao ni Jehova dimteng maibusor ken Baasa ken iti balayna,+ agpadpada a gapu iti isuamin a kinadakes nga inaramidna kadagiti mata ni Jehova babaen ti panangrurodna+ kenkuana gapu iti aramid dagiti imana,+ tapno agbalin dayta a kas iti balay ni Jeroboam, ken agsipud ta isu kinabilna.+
8 Iti maikaduapulo ket innem a tawen ni Asa nga ari ti Juda, ni Elah nga anak ni Baasa nagbalin nga ari iti Israel idiay Tirza iti dua a tawen.
9 Ket ni adipenna a Zimri+ a panguluen ti kagudua kadagiti karuahe rinugianna ti makikumplot maibusor kenkuana, bayat nga adda idi idiay Tirza nga umin-inum+ nga agbartek idiay balay ni Arza, nga agay-aywan iti sangakabbalayan+ idiay Tirza.
10 Ket ni Zimri simrek ket isu kinabilna+ ken pinapatayna iti maikaduapulo ket pito a tawen ni Asa nga ari ti Juda, ket nangrugi nga agturay a mangsandi kenkuana.
11 Ket naaramid nga idi isu nangrugi nga agturay, apaman a nagtugaw iti tronona, kinabilna ti intero a balay ni Baasa. Saanna nga impalubos a matedda ti asinoman a kukuana nga umisbo iti pader+ wenno kadagiti manangibalesna iti dara+ wenno kadagiti gagayyemna.
12 Gapuna tinalipupos ni Zimri ti intero a balay ni Baasa,+ maitunos iti sao ni Jehova+ a sinaona maibusor ken Baasa babaen ken Jehu a mammadto,+
13 maigapu iti amin a basbasol ni Baasa ken iti basbasol ni Elah+ nga anakna a kadagita a nagbasolda ken kadagita a napagbasolda ti Israel babaen ti panangrurodda ken Jehova a Dios ti Israel gapu kadagiti ubbaw nga idoloda.+
14 No maipapan iti dadduma pay kadagiti pasamak ni Elah ken amin nga inaramidna, saanda aya a naisurat iti libro+ dagiti pasamak iti al-aldaw ti ar-ari ti Israel?
15 Iti maikaduapulo ket pito a tawen ni Asa nga ari ti Juda, ni Zimri nagbalin nga ari iti pito nga aldaw+ idiay Tirza, bayat nga agpakpakarso idi dagiti umili maibusor iti Gibbeton,+ a kukua dagiti Filisteo.
16 Idi agangay dagiti umili a nagpakarso nangngegda a naikuna: “Ni Zimri nakikumplot ket kinabilna met ti ari.” Gapuna ti intero nga Israel pinagbalinda ni Omri,+ ti panguluen ti buyot, nga ari iti Israel iti dayta nga aldaw idiay pakarso.
17 Ni Omri ken ti intero nga Israel a naikuyog kenkuana simmang-atda ita manipud Gibbeton ket rinugianda a lakuben+ ti Tirza.
18 Ket naaramid nga apaman a nakita ni Zimri a nakautibon ti siudad, iti kasta isu simrek iti pagnaedan a torre ti balay ti ari ket pinuoranna ti balay ti ari iti apuy bayat nga adda iti uneg, iti kasta isu natay,+
19 maipaay kadagiti basolna a kadagita a nagbasol babaen ti panangaramidna no ania ti dakes kadagiti mata ni Jehova+ babaen ti pannagnana iti dalan ni Jeroboam ken iti basolna nga inaramidna babaen ti panamagbasolna iti Israel.+
20 No maipapan iti dadduma pay kadagiti pasamak ni Zimri ken iti kumplotna a nakikumplotanna, saanda aya a naisurat iti libro+ dagiti pasamak iti al-aldaw ti ar-ari ti Israel?
21 Iti daydin a dagiti umili iti Israel rinugianda a bingayen ti bagbagida iti dua a paset.+ Adda maysa a paset dagiti umili a nagbalin a paspasurot ni Tibni nga anak ni Ginat, tapno isu pagbalinenda nga ari, ket ti sabali a paset paspasurot ni Omri.
22 Kamaudiananna dagiti umili a simmursurot ken Omri pinarmekda dagiti umili a simmursurot ken Tibni nga anak ni Ginat; iti kasta ni Tibni napapatay, ket ni Omri nangrugi nga agturay.
23 Iti maikatallopulo ket maysa a tawen ni Asa nga ari ti Juda, ni Omri nagbalin nga ari iti Israel iti sangapulo ket dua a tawen. Nagturay idiay Tirza iti innem a tawen.
24 Ket ginatangna ti bantay ti Samaria manipud ken Semer iti dua a talento a pirak, ket rinugianna ti agbangon iti rabaw ti bantay ken panaganan ti siudad nga imbangonna iti nagan ni Semer nga apo ti bantay, a Samaria.+
25 Ket inar-aramid ni Omri no ania ti dakes kadagiti mata ni Jehova ket nagaramid a dakdakes ngem kadagiti amin nga immun-una kenkuana.+
26 Ket nagna iti isuamin a dalan ni Jeroboam nga anak ni Nebat+ ken iti basolna nga iti dayta a napagbasolna ti Israel babaen ti panangrurodna ken Jehova a Dios ti Israel gapu kadagiti ubbaw nga idoloda.+
27 No maipapan iti dadduma pay kadagiti pasamak ni Omri, ti inaramidna ken ti kinamannakabalinna a babaen iti dayta isu nagtignay, saanda aya a naisurat iti libro+ dagiti pasamak iti al-aldaw ti ar-ari ti Israel?
28 Kamaudiananna nakikaidda ni Omri kadagidi ammana ket naitabon idiay Samaria; ket ni Acab+ nga anakna nangrugi nga agturay a mangsandi kenkuana.
29 Ket no maipapan ken Acab nga anak ni Omri, nagbalin nga ari iti Israel iti maikatallopulo ket walo a tawen ni Asa nga ari ti Juda; ket ni Acab nga anak ni Omri nagtultuloy nga agturay iti Israel idiay Samaria+ iti duapulo ket dua a tawen.
30 Ket ni Acab nga anak ni Omri inaramidna ti dakdakes kadagiti mata ni Jehova ngem kadagidiay amin nga immun-una kenkuana.+
31 Ket naaramid a, kasla nagbassitan unay+ idi a banag kenkuana ti pannagna iti basbasol ni Jeroboam+ nga anak ni Nebat, innalana ita kas asawa+ ni Jezebel+ nga anak a babai ni Etbaal nga ari dagiti Sidonio+ ket inrugina ti mapan ken agserbi ken Baal+ ken agruknoy kenkuana.
32 Kanayonanna, nangipasdek iti maysa nga altar maipaay ken Baal iti balay+ ni Baal nga imbangonna idiay Samaria.
33 Ket inaramid ni Acab ti sagrado a teddek;+ ket ad-adu ti inaramid ni Acab a mamagrurod+ ken Jehova a Dios ti Israel ngem iti amin nga ar-ari ti Israel nga immun-una kenkuana.
34 Idi kaaldawanna ni Hiel a taga Bethel binangonna ti Jerico. Iti panangisaadna ti pamuon dayta napukaw ni Abiram nga inaunana, ket iti panangibangonna kadagiti ruanganna napukaw ni Segub nga inaudianna, maitunos iti sao ni Jehova a sinaona babaen ken Josue nga anak ni Nun.+
