1 Ar-ari 9:1-28
9 Ket naaramid nga, apaman a nalpas nga imbangon ni Solomon ti balay+ ni Jehova ken ti balay ti ari+ ken ti tunggal matarigagayan a banag ni Solomon a nagragsakanna nga aramiden,+
2 idin ni Jehova nagparang ken Solomon iti maikadua a daras, kas met laeng ti panagparangna idi kenkuana idiay Gabaon.+
3 Ket kinuna kenkuana ni Jehova: “Nangngegko ti kararagmo+ ken ti panagkiddawmo iti parabur a babaen iti dayta nagkiddawka iti parabur iti sanguanak. Sinantipikarko+ daytoy a balay nga imbangonmo babaen ti panangikabilko iti naganko+ sadiay agingga iti tiempo a di nakedngan; ket dagiti matak+ ken ti pusok pudno unay nga addadanto sadiay a kanayon.+
4 Ket sika, no magnakanto+ iti sanguanak, kas iti pannagna ni David+ nga amam, buyogen ti kinatarnaw+ ti puso ken buyogen ti kinalinteg+ babaen ti panagaramidmo maitunos iti amin nga imbilinko kenka,+ ket salimetmetamto dagiti alagadek+ ken dagiti hudisial a pangngeddengko,+
5 pudno nga ipasdekkonto met ti trono ti pagariam iti Israel agingga iti tiempo a di nakedngan, kas iti inkarik ken David nga amam, a kinunak, ‘Awanto ti lalaki kenka a magessat manipud panagtugaw iti trono ti Israel.’+
6 No dakayo ken ti annakyo silalawag a tumallikudkayo manipud isusurot kaniak+ ket saanyo a salimetmetan dagiti bilinko ken dagiti paglintegak nga inkabilko iti sanguananyo, ket pudno a mapankayo ket agserbikayo kadagiti sabali a didios+ ket agruknoykayo kadakuada,
7 gessatekto met ti Israel manipud rabaw ti daga nga intedko kadakuada;+ ket ti balay a sinantipikarko a maipaay iti naganko ibellengkonto manipud sanguanak,+ ket ti Israel pudno nga agbalinto a maysa a pagkukuna a proverbio+ ken maysa a pangrurod iti tengnga ti amin nga il-ili.
8 Ket daytoy met laeng a balay agbalinto a bumbunton dagiti rebba.+ Tunggal maysa a lumabas iti dayta mulagatannanto a sisisiddaaw+ ken pudno unay nga agsagawisiwto ket kunaenna, ‘Iti ania a rason nga inaramid ni Jehova ti kasta iti daytoy a daga ken iti daytoy a balay?’+
9 Ket kasapulanto a kunaenda, ‘Iti rason a pinanawanda ni Jehova a Diosda a nangiruar kadagidi ammada manipud daga ti Egipto,+ ket kimpetda kadagiti sabali a didios+ ket nagruknoyda kadakuada ket nagserbida kadakuada. Dayta ti makagapu a ni Jehova impagtengna kadakuada ti isuamin daytoy a didigra.’”+
10 Ket naaramid iti ngudo ti duapulo a tawen, a panangibangon ni Solomon iti dua a balay, ti balay ni Jehova+ ken ti balay ti ari,+
11 (ni Hiram+ nga ari ti Tiro tinulonganna ni Solomon+ iti kaykayo dagiti sedro ken iti kaykayo dagiti parwa ken kadagiti balitok kas iti kaadu ti pakaragsakanna idi,)+ nga iti dayta a tiempo inikkan ni Ari Solomon ni Hiram iti duapulo a siudad iti daga ti Galilea.+
12 Iti kasta napan ni Hiram manipud Tiro tapno kitaenna dagiti siudad nga inted kenkuana ni Solomon, ket saanda nga apagpag-isu kadagiti matana.+
13 Gapuna kinunana: “Ania a kita ti siudad dagitoy nga intedmo kaniak, kabsatko?” Ket naawaganda iti Daga ti Cabul agingga itoy nga aldaw.
14 Kabayatanna nangipatulod ni Hiram iti ari iti sangagasut ket duapulo a talento a balitok.+
15 Ita daytoy ti salaysay kadagidiay naipasalista a maipaay iti pinuersa a panagtrabaho+ a kinalikaguman ni Ari Solomon a mangibangon iti balay ni Jehova+ ken iti bukodna a balay ken iti Muntuon+ ken iti pader+ ti Jerusalem ken ti Hasor+ ken ti Megiddo+ ken ti Gezer.+
16 (Ni met laeng Faraon nga ari ti Egipto simmang-at ket kalpasanna kinautibona ti Gezer ket pinuoranna dayta iti apuy, ket pinapatayna dagiti Canaanita+ nga agnanaed iti siudad. Iti kasta intedna dayta kas sagut ti panagsina iti anakna a babai,+ ti asawa ni Solomon.)
17 Ket ni Solomon binangonna ti Gezer ken ti Makimbaba a Bet-horon,+
18 ken ti Baalat+ ken ti Tamar idiay let-ang, iti daga,
19 ken amin dagiti siudad a pagidulinan+ a nagbalin a kukua ni Solomon ken dagiti siudad ti karuahe+ ken dagiti siudad a maipaay kadagiti kumakabalio, ken ti matarigagayan a bambanag ni Solomon+ a tinarigagayanna nga ibangon idiay Jerusalem ken idiay Libano ken iti intero a daga a pagturayanna.
20 No maipapan iti amin a tattao a natedda kadagiti Amoreo,+ kadagiti Heteo,+ kadagiti Perizeo,+ kadagiti Heveo+ ken kadagiti Jebuseo,+ a saan a paset ti annak ti Israel,+
21 ti annakda a nabati kalpasanda iti daga isuda a di nabalinan ti annak ti Israel nga ipaay iti pannakadadael,+ intultuloy a kinalikaguman ida ni Solomon maipaay iti mangadipen a pinuersa a panagtrabaho agingga itoy nga aldaw.+
22 Ket awan iti annak ti Israel ti intuding ni Solomon a tagtagabo;+ ta isuda dagiti mannakigubat ken ad-adipenna ken piprinsipena ken ay-ayudantena ken papanguluen dagiti kumakaruahena ken dagiti kumakabaliona.+
23 Dagitoy ti papanguluen dagiti diputado nga agaywan iti trabaho ni Solomon, lima gasut ket limapulo, dagiti kapatas nga agaywan kadagiti tattao nga aktibo iti trabaho.+
24 Nupay kasta, ti met laeng anak a babai ni Faraon+ simmang-at manipud Siudad ni David+ a mapan iti bukodna a balay nga imbangonna a maipaay kenkuana. Iti daydin nga imbangonna ti Muntuon.+
25 Ket ni Solomon nagtultuloy a mamitlo+ iti makatawen a mangidaton kadagiti mapuoran a sakripisio ken kadagiti sakripisio a pakikaykaysa iti rabaw ti altar nga imbangonna a maipaay ken Jehova,+ ket adda idi ti panangpataud iti asuk a sakripisio iti altar,+ nga adda iti sanguanan ni Jehova; ket lineppasna ti balay.+
26 Ket adda idi ti maysa a bunggoy dagiti barko nga inaramid ni Ari Solomon idiay Ezion-geber,+ nga adda iti igid ti Elot,+ iti takdang ti Nalabaga a Baybay iti daga ti Edom.+
27 Ket intultuloy ni Hiram nga imbaon iti bunggoy dagiti barko ti bukodna nga ad-adipen,+ dagiti marino, nga addaan pannakaammo iti baybay, a maikuyog iti ad-adipen ni Solomon.
28 Ket napanda idiay Ofir+ ket nangalada sadiay iti uppat a gasut ket duapulo a talento a balitok+ ket inyegda dayta ken Ari Solomon.
