1 Corinto 11:1-34
11 Agbalinkayo a tumutulad kaniak, kas met iti panangtuladko ken Kristo.+
2 Ita padayawankayo agsipud ta iti amin a bambanag silalagipkayo kaniak ket petpetpetanyo a siiirut dagiti tradision+ kas inyawatko ida kadakayo.
3 Ngem kayatko a maammuanyo a ti ulo ti tunggal lalaki isu ti Kristo;+ ket ti ulo ti babai isu ti lalaki;+ ket ti ulo ti Kristo isu ti Dios.+
4 Tunggal lalaki nga agkararag wenno agipadto nga adda aniaman a banag iti ulona ibabainna ti ulona;+
5 ngem tunggal babai nga agkararag wenno agipadto+ a ti ulona di nadalungdongan ibabainna ti ulona,+ ta kasta met laeng no isu koma ket babai a nakiskisan ti ulona.+
6 Ta no ti maysa a babai di agdalungdong, mapukisan met koma; ngem no nakababain iti maysa a babai ti mapukisan wenno makiskisan,+ agdalungdong koma.+
7 Ta ti lalaki saan a rebbeng a dalungdonganna ti ulona, ta isu ladawan+ ken dayag+ ti Dios; ngem ti babai dayag ti lalaki.+
8 Ta ti lalaki di nagtaud iti babai, no di ket ti babai nagtaud iti lalaki;+
9 ken, kanayonanna pay, ti lalaki di naparsua maipagapu iti babai, no di ket ti babai maipagapu iti lalaki.+
10 Dayta ti makagapu a ti babai rebbeng a maaddaan iti pagilasinan ti kinaturay iti rabaw ti ulona+ gapu kadagiti anghel.+
11 Malaksid pay, mainaig iti Apo awan ti babai no awan lalaki ket awan ti lalaki no awan babai.+
12 Ta no kasano a ti babai nagtaud iti lalaki,+ kasta met a ti lalaki ket baeten iti babai;+ ngem amin a bambanag nagtaudda iti Dios.+
13 Ipatoyo iti bagbagiyo: Mayanatup kadi a ti maysa a babai di nakadalungdong nga agkararag iti Dios?
14 Saan aya a ti mismo a nakaparsuaan isurona kadakayo a no ti lalaki atiddog ti buokna, pakaibabainan kenkuana dayta;
15 ngem no ti babai atiddog ti buokna, dayag+ kenkuana dayta? Agsipud ta ti buokna ti naited kenkuana imbes a dalungdong.+
16 Nupay kasta, no ti asinoman a tao kasla makisupiat+ iti sabali pay a kadawyan,+ awanantayo iti sabali pay, uray dagiti kongregasion ti Dios.
17 Ngem, bayat ti panangitedko kadagitoy a pammilin, saankayo a padayawan agsipud ta, saan a pagsayaatan, no di ket pagdaksan nga agtataripnongkayo.+
18 Ta umuna iti amin, no aguurnongkayo iti maysa a kongregasion, mangngegko nga adda panaglalasin iti nagtetengngaanyo;+ ket adda bassit panamatik iti dayta.
19 Ta masapul met nga adda dagiti sekta+ iti nagtetengngaanyo, tapno dagiti tattao a naanamongan maiparangarang met iti nagtetengngaanyo.+
20 Gapuna, no aguurnongkayo iti maysa a lugar, saan a mabalin a kanen ti pangrabii ti Apo.+
21 Ta, no kanenyo dayta, tunggal maysa kanenna a nasaksakbay ti bukodna a pangrabii, iti kasta ti maysa mabisinan ngem ti sabali mabartek.
22 Saan kadi a pudno nga adda balbalayyo a panganan ken paginuman?+ Wenno umsienyo aya ti kongregasion ti Dios ket babainenyo dagidiay awanan?+ Anianto ti kunaek kadakayo? Padayawankayto aya? Saankayo a padayawan iti daytoy.
23 Ta inawatko iti Apo daydiay inyawatko met kadakayo, a ni Apo Jesus iti rabii+ a pannakayawatna nangala iti tinapay
24 ket, kalpasan a nakapagyaman, pinispisina+ ket kinunana: “Daytoy kaipapananna ti bagik+ maigapu kadakayo. Itultuloyyo nga aramiden daytoy kas panglaglagip+ kaniak.”
25 Kasta met ti inaramidna maipapan iti kopa,+ kalpasan a nakapangrabii, a kunkunana: “Daytoy a kopa kaipapananna ti baro a tulag+ babaen ti bileg ti darak.+ Itultuloyyo nga aramiden daytoy, a masansan nga uminumkayo iti dayta, kas panglaglagip+ kaniak.”
26 Ta no masansan+ a kanenyo daytoy a tinapay ken uminumkayo itoy a kopa, iwarwaragawagyo ti ipapatay+ ti Apo, agingga iti idadatengna.+
27 Iti kasta siasinoman a mangan iti tinapay wenno uminum iti kopa ti Apo a di maikari makabasolto+ maipapan iti bagi ken dara+ ti Apo.
28 Umuna anamongan koma ti maysa a tao ti bagina kalpasan ti naannad a panangsukimat,+ ket iti kasta mangan iti tinapay ken uminum iti kopa.
29 Ta daydiay mangan ken uminum kanen ken inumenna ti pannakaukom+ maibusor iti bagina no saanna a mailasin ti bagi.
30 Dayta ti makagapu nga adu kadakayo ti nakapuy ken masaksakit, ket sumagmamano ti matmaturog+ ken patay.
31 Ngem no mailasintayo no aniatayo, saantayo a maukom.+
32 Nupay kasta, no maukomtayo,+ disiplinaennatayo ni Jehova,+ tapno saantayo a makondenar+ a mairaman iti lubong.+
33 Iti kasta, kakabsatko, no aguurnongkayo a mangan iti dayta,+ agiinnuraykayo.
34 No ti asinoman mabisin, mangan koma idiay pagtaengan,+ tapno dikay aguurnong a maipaay iti pannakaukom.+ Ngem ti nabatbati a bambanag urnosekto inton makagtengak dita.
