1 Corinto 16:1-24
16 Ita no maipapan iti panagur-or+ a maipaay kadagiti sasanto,+ kas kadagiti imbilinko kadagiti kongregasion ti Galacia,+ aramidenyo met ti kasta.
2 Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag a kas iti irarang-ayna, tapno inton dumtengak saanton a maaramid dagiti panagur-or.
3 Ngem inton makagtengak dita, siasinoman a lallaki nga anamonganyo babaen kadagiti surat,+ dagitoy ibaonkonto tapno ipanda ti naasi a sagutyo idiay Jerusalem.
4 Nupay kasta, no mayanatup a mapanak met sadiay, mapandanto sadiay a maikuyog kaniak.
5 Ngem umayakto kadakayo inton nalasatkon ti Macedonia, ta lumasatak idiay Macedonia;+
6 ket nalabit makipagyanakto wenno makipagpalabasak ti kalam-ekna kadakayo, tapno maituloddak+ iti pangasidegen nga agturong sadiay papanak.
7 Ta diak kayat nga ita laeng a makitakayo iti ilalabasko, ta inanamaek ti agtalinaed kadakayo iti sumagmamano a tiempo,+ no ipalubos+ ni Jehova.+
8 Ngem agtalinaedak idiay Efeso+ agingga iti piesta ti Pentecostes;
9 ta naluktan kaniak ti maysa a dakkel a ruangan a mangiturong iti panagaramid,+ ngem adu dagiti bumusbusor.
10 Nupay kasta, no dumteng ni Timoteo,+ kitaenyo nga awan pagamkanna kadakayo, ta ar-aramidenna ti trabaho ni Jehova,+ a kas met kaniak.
11 Ngarud, awan koma ti mangumsi kenkuana.+ Itulodyo a sitatalna iti pangasidegen, tapno makagteng kaniak ditoy, ta ur-urayek agraman dagiti kakabsat.
12 Ita maipapan ken Apolos+ a kabsattayo, nagpakaasiak kenkuana iti kasta unay tapno umay kadakayo a kadua dagiti kakabsat, ket kaskasdi a saanna pay a kayat ti umay ita; ngem umayto inton addaan iti gundaway.
13 Agtalinaedkayo a siririing,+ agtakderkayo a sititibker iti pammati,+ agtalinaedkayo a malalaki,+ bumilegkayo.+
14 Maaramid koma ti amin nga aramidyo buyogen ti ayat.+
15 Ita bagbagaankayo, kakabsat: ammoyo a ti sangakabbalayan ni Estefanas isu ti umuna a bungbunga+ ti Acaya ket inkeddengda ti bagbagida nga agserbi kadagiti sasanto.+
16 Itultuloyyo met koma nga ipasakup ti bagbagiyo kadagiti kasta a kita ti tattao ken iti tunggal maysa a makitintinnulong ken agbambannog.+
17 Ngem pagrag-oak ti kaadda ni Estefanas+ ken ni Fortunato ken ni Acaico, agsipud ta isuda ti nangisandi iti kaawanyo ditoy.
18 Ta pinabang-aranda ti espirituk+ ken ti espirituyo. Gapuna bigbigenyo dagiti kasta a kita ti tattao.+
19 Dagiti kongregasion iti Asia ipaw-itda kadakayo dagiti kablaawda.+ Da Aquila ken Prisca agraman ti kongregasion nga adda iti balayda+ naimpusuan a kablaawandakayo iti Apo.
20 Amin dagiti kakabsat kablaawandakayo. Agkikinnablaawkayo iti nasantuan nga agep.+
21 Adtoy ti kablaawko, ni Pablo, iti bukodko nga ima.+
22 No adda asinoman nga awan panagayatna iti Apo, mailunod koma.+ O Apomi, umayka!+
23 Maadda koma kadakayo ti di kaikarian a kinamanangngaasi ni Apo Jesus.
24 Ti ayatko maadda koma kadakayo amin a naikaykaysa ken Kristo Jesus.
