1 Corinto 2:1-16
2 Ket gapuna, idi immayak kadakayo, kakabsat, saanak nga immay a buyogen ti nadaeg a panagsasao+ wenno sirib a mangidekdeklara kadakayo ti sagrado a palimed+ ti Dios.
2 Ta inkeddengko a saan nga ammuen ti aniaman a banag kadakayo malaksid ken Jesu-Kristo,+ ken isuna a nailansa.
3 Ket immayak kadakayo a sikakapuy ken sibubuteng ken buyogen iti kasta unay a panagpigerger;+
4 ket ti panagsasaok ken ti inkaskasabak saan a nabuyogan ti makaguyugoy a sasao ti sirib no di ket nabuyogan ti panangiparangarang iti espiritu ken pannakabalin,+
5 tapno ti pammatiyo adda koma, saan nga iti sirib dagiti tattao,+ no di ket iti pannakabalin ti Dios.+
6 Ita sawenmi ti sirib kadagidiay a natataengan,+ ngem saan a ti sirib+ daytoy a sistema ti bambanag wenno uray ti sirib dagiti agtuturay daytoy a sistema ti bambanag,+ isuda a mapukaw.+
7 No di ket sawenmi ti sirib ti Dios iti sagrado a palimed,+ ti nailemmeng a sirib, a nasaksakbay nga intuding ti Dios kasakbayan ti sistema+ ti bambanag maipaay iti dayagtayo.
8 Daytoy a sirib saan a naammuan+ ti uray maysa kadagiti agtuturay+ daytoy a sistema ti bambanag, ta no naammuanda dayta saanda koma nga inlansa+ ti nadayag nga Apo.
9 Ngem kas iti adda a naisurat: “Saan a nakita ti mata ket saan a nangngeg ti lapayag, saan met a simnek iti puso ti tao ti bambanag nga insagana ti Dios kadagidiay agayat kenkuana.”+
10 Ta kadatayo nga impalgak+ ida ti Dios babaen ti espirituna,+ ta ti espiritu+ sukimatenna ti amin a bambanag, uray pay ti nauneg+ a bambanag ti Dios.
11 Ta siasino kadagiti tattao ti makaammo iti bambanag ti maysa a tao malaksid ti espiritu+ ti tao nga adda kenkuana? Gapuna, met, awan ti nakaammo iti bambanag ti Dios, malaksid ti espiritu+ ti Dios.
12 Ita inawattayo, saan a ti espiritu+ ti lubong, no di ket ti espiritu+ nga aggapu iti Dios, tapno maammuantayo ti bambanag a siaasi nga impaay kadatayo ti Dios.+
13 Dagitoy a banag sawenmi met, saan a babaen ti sasao nga insuro ti natauan a sirib,+ no di ket babaen kadagidiay insuro ti espiritu,+ ta itiponmi ti naespirituan a bambanag iti naespirituan a sasao.+
14 Ngem ti pisikal a tao saanna nga awaten ti bambanag ti espiritu ti Dios, ta kinamaag kenkuana dagita; ket saanna a mabalin nga ammuen ida,+ agsipud ta naespirituan ti pannakasukimatda.
15 Nupay kasta, ti naespirituan+ a tao pudno a sukimatenna ti amin a bambanag, ngem isu saan a sukimaten+ ti asinoman a tao.
16 Ta “siasino ti nakaammo iti panunot ni Jehova,+ tapno isurona koma?”+ Ngem addaantayo iti panunot+ ni Kristo.
