1 Corinto 3:1-23
3 Ket gapuna, kakabsat, diak nabalinan ti makisao kadakayo a kas kadagiti naespirituan a tattao,+ no di ket kas kadagiti nainlasagan a tattao, kas iti ub-ubbing+ ken Kristo.
2 Tinaraonankayo iti gatas, saan nga iti maysa a banag a kanen,+ ta awanankay pay idi iti umdas a pigsa. Iti kinapudnona, uray ita awanankay pay iti umdas a pigsa,+
3 ta nainlasagankayo+ pay laeng. Ta idinto nga adda imon ken ringgor iti nagtetengngaanyo,+ saan aya a nainlasagankayo ken saan aya a magmagnakayo a kas kadagiti tattao?+
4 Ta no ti maysa kunaenna: “Kaduanak ni Pablo,” ngem ti sabali kunaenna: “Siak kaduanak ni Apolos,”+ saankayo aya a tattao laeng?
5 Ania, ngarud, ni Apolos?+ Wen, ania ni Pablo? Ministro+ a babaen kadakuada nagbalinkayo a manamati, a kas iti inted ti Apo iti tunggal maysa.
6 Nagmulaak,+ ni Apolos nagsibug,+ ngem ti Dios ti nangpadpadakkel iti dayta;+
7 iti kasta saan a daydiay agmula ti napateg+ wenno uray daydiay agsibug, no di ket ti Dios a mangpadakkel iti dayta.+
8 Ita daydiay agmula ken daydiay agsibug maymaysada,+ ngem tunggal maysa a tao awatennanto ti bukodna a gunggona sigun iti bukodna a panagbannog.+
9 Ta katrabahuannakami ti Dios.+ Dakayo ti talonen a daga+ ti Dios, ti patakder ti Dios.+
10 Maitunos iti di kaikarian a kinamanangngaasi+ ti Dios a naited kaniak, kas masirib a manangiturong kadagiti trabaho nangisaadak iti pamuon,+ ngem adda sabali nga agibangbangon iti dayta. Ngem aluadan koma ti tunggal maysa no kasano ti panagibangonna iti dayta.+
11 Ta awan ti tao a makaisaad iti aniaman a sabali pay a pamuon+ no di ti naisaaden, nga isu ni Jesu-Kristo.+
12 Ita no ti asinoman agibangon iti pamuon iti balitok, pirak, napateg a batbato, kayo a material, garami, naggapasan,
13 maiparangarangto ti aramid ti tunggal maysa, ta ilatakto dayta ti aldaw, agsipud ta maipanayagto babaen ti apuy;+ ket paneknekanto ti mismo nga apuy no ania a kita ti aramid ti tunggal maysa.
14 No agtalinaed ti aramid nga imbangon iti dayta ti asinoman,+ isu umawatto iti gunggona;+
15 no mapuoran ti aramid ti asinoman, mapukawanto, ngem isu maisalakanto;+ kaskasdi, nupay kasta, kaslanto babaen ti apuy.+
16 Dikay aya ammo a dakayo ti templo ti Dios,+ ket ti espiritu ti Dios agnaed kadakayo?+
17 No ti asinoman dadaelenna ti templo ti Dios, isu dadaelento ti Dios;+ ta ti templo ti Dios ket nasantuan,+ a dayta a templo+ ket dakayo.+
18 Awan koma ti mangal-allilaw iti bagina: No ti asinoman kadakayo pagarupenna nga isu masirib+ iti daytoy a sistema ti bambanag, agbalin koma a maag, tapno agbalin a masirib.+
19 Ta ti sirib daytoy a lubong ket kinamaag iti Dios;+ ta adda a naisurat: “Tiliwenna dagiti masirib iti bukodda a kinasikap.”+
20 Ken manen: “Ammo ni Jehova a barengbareng dagiti panagrasrason ti mamasirib a tattao.”+
21 Gapuna awan koma ti agpasindayag kadagiti tattao; ta amin a bambanag kukuayo,+
22 uray ni Pablo wenno ni Apolos+ wenno ni Cefas wenno ti lubong wenno ti biag wenno ti ipapatay wenno ti bambanag nga addan wenno ti bambanag nga umay,+ amin a bambanag kukuayo;
23 kalpasanna kukuanakayo ni Kristo;+ ni Kristo, kalpasanna, kukua ti Dios.+
